New Christian Bible Study

From Swedenborg's Works

 

De Coelo et de Inferno #267

Study this Passage

  
/ 603  
  

267. Quod angeli tantam sapientiam recipere possint. est quia aperta sunt interiora eorum, et sapientia sicut omnis perfectio crescit versus interiora, ita secundum aperitionem eorum. 1 Sunt tres gradus vitae, qui correspondent tribus caelis, apud unumquemvis angelum (videatur 29-40); illi, apud quos primus gradus apertus est, in caelo primo seu ultimo sunt illi, apud quos secundus gradus apertus est, in caelo secundo seu medio sunt illi autem apud quos tertius gradus apertus est, in caelo tertio seu intimo sunt: secundum hos gradus est sapientia angelorum in caelis inde sapientia angelorum intimi caeli immensum transcendit sapientiam angelorum medii caeli, et horum sapientia sapientiam angelorum ultimi caeli (videatur supra, 209, 210; et quales gradus sint, 38). Quod talia discrimina sint, est quia illa quae in superiori gradu sunt, singularia sunt, et quae in inferiori communia, et communia sunt continentia singularium se habent singularia ad communia sicut millia aut myriades ad unum, ita sapientia angelorum superioris caeli ad sapientiam angelorum inferioris caeli respective. Sed horum sapientia usque similiter transcendit sapientiam hominis, nam homo in corporeo et ejus sensualibus est, et sensualia corporea hominis sunt in infimo gradu. inde patet. qualis sapientia est illis qui ex sensualibus cogitant, hoc est, illis qui sensuales homines vocantur, quod nempe non sint in aliqua sapientia, sed solum in scientia. 2 Aliter vero illi homines, quorum cogitationes elevatae sunt supra sensualia, et magis quorum interiora aperta sunt usque in lucem caeli.

Footnotes:

1. [Swedenborg's footnote] Quod quantum homo ab externis elevatur versus interiora, tantum in lucem, ita tantum in intelligentiam veniat (6183, 6313).

Quod actualis sit elevatio (7816, 10330).

Quod elevatio ab externis ad interiora sit sicut a nimbo in lucem (4598).

Quod exteriora remotiora sint a Divino apud hominem, quare obscura respective sunt (6451).

Et quoque inordinata respective (996, 3855).

Quod interiora sint perfectiora quia propiora Divino (5146, 5147).

Quod in interno millia et millia sint, quae in externo apparent ut commune unum (5707).

Quod inde cogitatio et perceptio quo interior eo clarior (5920).

2. [Swedenborg's footnote] Quod sensuale sit ultimum vitae hominis adhaerens et inhaerens corporeo ejus (5077, 5767, 9212, 9216, 9331, 9730). Quod is sensualis homo dicatur, qui omnia judicat et concludit ex sensibus corporis, et qui nihil credit nisi quod oculis videt et manibus tangit (5094, 7693).

Quod talis homo cogitet in externis et non interius in se (5089, 5094, 6564, 7693).

Quod interiora ejus clausa sint, ut ibi nihil veri spiritualis videat (6564, 6844, 6845).

Verbo, qui in crasso lumine naturali est, et sic nihil percipit quod e luce caeli (6201, 6310, 6564, 6598, 6612, 6614, 6622, 6624, 6844, 6845).

Quod interius sit contra illa quae caeli et ecclesiae sunt (6201, 6316, 6844, 6845, 6948, 6949).

Quod tales fiant eruditi qui se confirmaverunt contra vera ecclesiae (6316).

Quod sensuales homines astuti sint et malitiosi prae reliquis (7693, 10236).

Quod ratiocinentur acriter et solerter, sed ex memoria corporea, in qua ponunt omnem intelligentiam (195, 196, 5700, 10236).

Sed quod ex fallaciis sensuum (5084, 6948, 6949, 7693).

  
/ 603  
  

From Swedenborg's Works

 

Arcana Coelestia #6845

Study this Passage

  
/ 10837  
  

6845. ‘Quia locus quo tu stas super, humus sanctitatis ille’: quod significet quod alioquin Divinum intrare nequeat, constat ex significatione ‘loci’ quod sit status, de qua n. 2625, 2837, 3356, 3387, 4321, 4882, 1 5605; inde ‘locus quo tu stas super’ est status in quo adhuc est; et ex significatione ‘humi sanctitatis’ quod sit sanctum quod procedit ex 2 Domino; ita est status sancti procedentis a Divino Humano Domini, qui per illa verba intelligitur. Quod significetur quod alioquin Divinum intrare nequeat, sequitur ex 3 antecedentibus; si nempe 4 homo non removeretur a sensualibus quae sunt externa naturalis, hoc est, si non elevaretur ab illis ad interiora, quod Divinum non posset influere; causa quod Divinum non influere possit apud hominem quamdiu ille est in sensualibus illis, est quia influxus a Divino pergit usque ad illa quae in ordine ultima sunt, ita usque ad sensualia quae sunt externa naturalis apud hominem, 5 si inibi mere corporea et terrestria sunt, Divina quae influunt, ibi dissipantur, nam non concordant; quapropter cum homo recepturus est Divinum, hoc est, illa quae fidei et amoris sunt, elevatur is a sensualibus, et cum elevatus est ab illis, tunc Divinum non amplius influit illuc, nempe in sensuale externum 6 , sed in planum interius in quod homo elevatus est. Quod ita sit, a multa experientia scire datum est.

Footnotes:

1. The editors of the third Latin edition made a minor correction here. For details, see the end of the appropriate volume of that edition.

2. Divino

3. The Manuscript inserts mox.

4. The Manuscript places this after removeretur.

5. The Manuscript inserts quae.

6. The Manuscript inserts influit Divinum.

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

From Swedenborg's Works

 

Arcana Coelestia #10236

Study this Passage

  
/ 10837  
  

10236. ‘Et basin ejus aere’: quod significet bonum ultimi naturalis, quod est sensualis, constat ex significatione ‘baseos’ labri in quo aqua pro lavatione, quod sit ultimum naturalis, quod vocatur sensuale, et ex significatione ‘aeris’ quod sit bonum, de qua supra n. 10235; quod ‘basis’ sit ultimum naturalis, quod 1 vocatur sensuale externum, est quia per ‘labrum’ quod supra est, significatur naturale in quo purificatio 2 ; inde per id quod infra est significatur quod in infimo loco, 3 hoc est, in ultimo est, ita sensuale externum hominis; naturale hominis est externum, est medium, et est internum; externum naturalis communicat cum mundo et vocatur sensuale externum, naturale internum est quod communicat cum interno homine, qui est in caelo, 4 naturale medium est conjungens utrumque, nam ubi externum et internum, erit medium conjungens; quod homini sit naturale externum, medium, et internum 5 , videatur n. 4009, 4570, 5118, 6 5126, 5649, 7 9215.

[2] Per sensuale quod ultimum naturalis 8 , intelligitur proprie id quod caro vocatur, et perit cum homo moritur, ita quod inservivit homini pro ejus functionibus in mundo, sicut sensuale visus, auditus, olfactus, gustus, et tactus; quod id sensuale sit planum ultimum in quo vita hominis terminatur et super quo ut super basi se reponit, constare potest, nam immediate exstat mundo, 9 et per illud ut extremum intrat mundus et exit caelum; sed hoc sensuale 10 est homini commune cum brutis animalibus, at sensuale externum quod non ita homini 11 commune est cum illis, et usque est sensuale externum, est quod homini in memoria est ex mundo, 12 et constituitur ex solis rebus mundanis, corporeis, et terrestribus ibi; homo qui 13 ex illis solum cogitat et ratiocinatur, et non ex interioribus, vocatur 14 homo sensualis; hoc sensuale manet homini 15 post mortem, sed quiescit; 16 hoc sensuale externum 17 est quod proprie significatur per ‘basin’;

[3] quale hoc sit, repraesentatum est per bases decem labrorum, quae juxta templum erant posita; bases illae ita describuntur, Salomo fecit bases decem ex aere, quattuor cubiti longitudo basis cujusvis, et quattuor cubiti latitudo; tres cubiti altitudo. Super clausuris quae inter scalas, leones, boves, et cherubi; ac super scalis similiter superius. Insuper quattuor rotae basi cuique, et tabulae aeris; at quattuor angulis ejus umeri; subter labro umeri fusi: opus rotarum sicut opus rotae curtus; manus earum, et terga earum, et canthi earum, et radii earum omnia fusile: juxta hoc fecit decem bases; fusura una, mensura una, proportio una omnibus illis. Inde fecit decem labra ex aere; quadraginta bathos continebat unumquodque labrum; quattuor cubiti labrum unumquodvis, 1 Reg. 7:27-39;

[4] quale sensualis externi apud hominem hic per repraesentativa describitur, ac imprimis tutela Domini, ne homo ex 18 suo sensuali, ita ex mundo, intret in illa quae caeli 19 seu Ecclesiae sunt; hoc enim est ordini Divino contrarium, nam mundus in caelum 20 intrare nequit, sed caelum in mundum; quod fit cum Dominus per caelum influit apud hominem, illustrat illum, docet illum, et ducit illum, per Verbum; 21 quod e mundo intrare in illa quae caeli sunt sit contra Divinum ordinem, constare potest ex illis qui ex sensuali suo, ita qui ex scientificis quae ex mundo intrant, quod prorsus nihil credant;

[5] tutela ne hoc fiat significatur per ‘leones’, ‘boves’, et ‘cherubos’; per ‘leones’ enim significatur tutela ne vera intrent, nam leones sunt vera in sua potentia, n. 6367, 6369, per ‘boves’ significatur tutela ne bona intrent, boves enim sunt bona in sua potentia, n. 2781; quod per ‘cherubos’ significetur tutela Domini ne id fiat, videatur n. 308, 9509, 22 quod ‘umeri’ quorum etiam mentio fit, sint potentia, ac resistentia, videatur n. 1085, 4931-4937, 9836; per ‘rotas sicut currus’ significatur facultas sapiendi cum intrant omnia e caelo, sic enim omnia secundum ordinem progrediuntur, rotae enim currus sunt facultas progrediendi, ita discendi, n. 23 8215, 9872, et currus sunt 24 quae doctrinae caeli et Ecclesiae 25 , n. 5321, 8215.

[6] Quid sensualis homo, iterum paucis dicetur: homo sensualis dicitur qui cogitat solum ex talibus quae in memoria sunt ex mundo, et qui versus interiora elevari non potest; tales imprimis sunt qui nihil de caelo et de Divino credunt quia non vident illa, fidunt enim solum sensibus; et quae non coram illis apparent, nihil esse 26 credunt; accedunt tales prope ad genium brutorum animalium, quae etiam solum ex sensibus externis ducuntur; 27 sunt usque astuti et sollertes in agendo et ratiocinando, sed non vident verum ex luce veri; dicti fuerunt tales olim serpentes arboris scientiae; turba infernalis pleraque talis est. 28 Sed quid sensualis homo et quid sensuale, videatur in locis citatis, n. 9331 fin. , tum n. 9726, 9730, 9731, 9922 fin. , 9996, et quid sit elevari supra sensualia, seu abduci ab illis, 29 in locis citatis n. 9922 fin.

[7] Bonum sensualis, quod significatur per ‘basin ex aere’, est quod vocatur volupe et 30 jucundum afficiens cogitationem imaginativam, quae cogitatio est ex meris talibus, quae sunt 31 terrestria, corporea, et mundana, et dinoscitur ab aliis jucundis per id quod non spectet alios usus quam qui sunt 32 sui aut propter se, nam sensualis homo est in amore sui et mundi 33 , et jucunda quae ei, sunt illorum amorum; 34 et quia amores sensualis hominis tales sunt, patet quod ille prae aliis sollers in ratiocinando sit, et in agendo propter lucra et honores; corpus enim ejus flagrat ex igne illius amoris, ac ille ignis accendit lumen, quod vocatur lumen naturale; et cum hoc usque ad splendorem accensum est, tunc lux caeli, quae interioris hominis est, prorsus obscuratur; inde quae 35 hujus lucis sunt, quia in caligine, dicuntur nihil esse; aliter apud illos qui ex igne caeli agunt, et ex luce inde cogitant. Ex his constare potest quid intelligitur per bonum sensualis, quod significatur per basin labri ex aere.

Footnotes:

1. est sensuali

2. The Manuscript inserts, ut mox supra ostensum.

3. seu ultimo, quod id sit sensuale externum constat ex illis quae de sensuale externo hominis passim ostensa est

4. The Manuscript inserts et.

5. The Manuscript inserts sit.

6. The editors of the third Latin edition made a minor correction here. For details, see the end of the appropriate volume of that edition.

7. The editors of the third Latin edition made a minor correction here. For details, see the end of the appropriate volume of that edition.

8. The Manuscript inserts est.

9. The Manuscript deletes et, and inserts quare.

10. The Manuscript inserts externum.

11. cum brutis commune est

12. ita

13. inde solum cogitur

14. The following two (or in some cases more) words are transposed in the Manuscript.

15. The Manuscript inserts etiam.

16. inde patet quod

17. describitur ulterius per bases labrorum, quae juxta Templum posita erant, quae describuntur, ideo super clausuris decem labra juxta Templum

18. The following two (or in some cases more) words are transposed in the Manuscript.

19. et

20. The Manuscript places this before mundus.

21. quod contrarium sit Divino ordini, constare potest ex illis qui ex sensuali suo, hoc est, ex se et non ex Domino in illa quae coeli sunt, intrant

22. The Manuscript inserts et.

23. The editors of the third Latin edition made a minor correction here. For details, see the end of the appropriate volume of that edition.

24. The Manuscript inserts talia.

25. The Manuscript inserts sunt.

26. The following word or phrase is crossed out in the Manuscript, but it does appear in the first edition.

27. sunt plerique ex illis, sicut quidem bestiae, astuti et solertes in agendo et ratiocinando; et solertes sed usque non vident aliquid verum ex luce veri

28. In the Manuscript all that is written from here to illorum amorum in the last line of the page is crossed through. In the margin is written apart blad ( = on a separatesheet) but no rewriting of this section appears in the Manuscript. Differences between the deleted section of the Manuscript and what appears in the First Latin Edition are shown here in notes 6-10.

29. loci citati

30. The Manuscript inserts est.

31. ex corpore

32. proprii appetitus et voluptates

33. The Manuscript inserts est propter se, .

34. Et quia amor illorum talis est, et inde voluptas, patet, quod prae aliis solertes in ratiocinando sint

35. illius

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org