404. "Et facta est tertia pars maris sanguis," significat quod omnia communia vera apud illos falsificata essent. - Per "tertiam partem" significantur omnia (400); per "sanguinem" significatur falsificatio veri Verbi (379); per "mare" significatur Ecclesia apud illos qui in externis ejus sunt, et in sola fide (398, 402); ¹ quod apud hos communia vera falsificata sint, est quia in illis solis sunt, non enim sciunt singularia fidei istius, sicut Clerici; ex communibus veris apud illos est, quod appareant sicut in mari in mundo spirituali; causa est, quia aquae significant vera (50); et mare est commune receptaculum illarum (238).

Footnotes:

400. "Et missa in terram, et tertia pars arborum combusta est," significat quod apud illos qui in internis Ecclesiae sunt et in sola fide, omnis affectio et perceptio veri, quae faciunt hominem Ecclesiae, perierint. - Per "terram," in quam "grando et ignis mixta sanguine" missa sunt, significatur Ecclesia apud illos qui (in) internis ejus sunt et in sola fide, qui quod sint Clerici, videatur supra (398); per "tertiam partem" significatur omne quoad verum, sicut per "quartam partem omne quoad bonum (322); quod per "tria" seu "tres," significetur omne, plenum et prorsus, videbitur infra (505), inde per "tertium" quod est "tertia pars," significatur simile: per "comburi" significatur perire, hic per falsum ex amore infernali, quod intelligitur per "grandinem et ignem mixta sanguine," de quibus mox supra (399). Per "arborem" significatur homo; et quia homo est homo ex affectione quae est voluntatis et ex perceptione quae est intellectus, ideo hae quoque per "arborem" significantur: est etiam correspondentia inter hominem et arborem; quare in Caelo apparent paradisi ex arboribus, quae affectionibus et inde perceptionibus Angelorum correspondent; et quoque sunt alicubi in Inferno sylvae ex arboribus quae malos fructus ferunt, secundum correspondentiam cum concupiscentiis et inde cogitationibus illorum ibi. Quod "arbores" in genere significent homines quoad affectiones et inde perceptiones illorum, constare potest ex sequentibus locis:

"Cognoscent omnes Arbores agri, quod Ego Jehovah humiliem Arborem altam, exaltem Arborem humilem, et arefaciam Arborem viridem, et germinare faciam Arborem aridam," (Ezechiel 17:24);

"Beatus vir qui confidit in Jehovah; erit sicut Arbor plantata juxta aquas, non cessabit a ferendo fructum," (Jeremias 16:7, 8); ¹

"Beatus vir cujus in Lege (Jehovae) beneplacitum; erit sicut Arbor plantata juxta rivos aquarum, quae fructum dabit in tempore suo," (Psalm. 1:1-3); ²

Laudate Jehovam "Arbores fructus," (Psalm. 148:9);

"Saturantur Arbores Jehovae," (Psalm. 104:16);

"Securis ad radicem Arboris jacet, omnis Arbor non faciens fructum bonum exscindetur," (Matthaeus 3:10; 7:16-20; ³

"Aut facite Arborem bonam et fructum bonum, aut facite Arborem putrem et fructum putrem, ex fructu enim cognoscitur Arbor," (Matthaeus 12:33; ⁴ Luca 6:43-44);

"Incendam ignem, qui comedet omnem Arborem viridem et omnem Arborem aridam," (Ezechiel 21:3 (B.A. 20:47)).

Quoniam "arbor" significat hominem, ideo statutum fuit, quod Fructus Arboris inserviens esui in terra Canaane praeputiaretur (Leviticus 23-25);

tum,

Quando aliqua urbs obsidebatur, non securim mitterent in aliquam Arborem fructus boni, (Deuteronomius 20:19-20);

ut et quod In Festo Tabernaculorum acciperent fructus Arboris honoris, et laetarentur coram Jehovah, (Leviticus 23:40-41).

(Praeter plura, quae hic propter copiam non afferuntur.)

Footnotes:

505. (Vers. 9.) "Et videbunt ex populis et tribubus et linguis et gentibus corpora illorum dies tres et dimidium," significat cum omnes qui in falsis doctrinae et inde in malis vitae ex sola fide fuerunt et erunt, ad finem Ecclesiae quae adhuc est ad principium Novae, audiverunt et audituri sunt de binis Essentialibus, quae sunt Agnitio Domini et Operum secundum Decalogum. - Per "populos et tribus et linguas et gentes" intelliguntur omnes ex Reformatis qui in falsis doctrinae et inde in malis vitae ex sola fide fuerunt et erunt; per "populos" significantur qui in falsis doctrinae sunt (483), per "tribus" falsa et mala Ecclesiae (349), per "linguas" confessio et receptio illorum (483), et per "gentes" qui in malis vitae (483); inde per quatuor illa, omnes et singuli qui fuerunt et erunt, ita qui fuerunt "in magna illa urbe," et erunt qui e mundo adhuc venturi sunt illis similes. Per "corpora illorum," seu "duorum testium," significantur duo Essentialia Ecclesiae Novae, de quibus supra (501); per "videbunt" significatur dum audiverunt et audituri sunt de illis, quoniam "videre" dicitur de corporibus, et "audire" de binis illis Essentialibus; per "dies tres et dimidium" significatur ad finem et principium, hoc est, ad finem Ecclesiae quae adhuc est, et ad principium Novae. Ex his nunc in unum sensum collatis, patet, quod per "videbunt ex populis et tribubus et linguis et gentibus corpora illorum tres dies et dimidium," in Sensu spirituali supradicta significentur. Quod "dies tres et dimidium" significent ad finem et principium, est quia "dies" significat statum, numerus "tria" completum usque ad finem, ac "dimidium" principium; simile enim per "dies tres et dimidium" significatur quod per "septimanam," cujus sex dies significant completum usque ad finem, et dies septimus significat sanctum; nam numerus "3 1/2," est dimidius numeri "7" qui facit septima nam, ac duplicatum et divisum ex quo, simile significant. Quod "tria" significent completum, ita ad finem, videri potest ex his in Verbo:

Quod "Esajas iret nudus et discalceatus Tres annos," (Esaias 20:3);

Quod Jehovah Ter vocaverit Samuelem, et Samuel Ter cucurrerit ad Eli, et quod Eli Tertia vice intellexerit, (1 Samuelis 3:1-8);

Quod "Elias se mensus sit super filium viduae Tribus vicibus," (1 Regnum 17:21);

Quod Elias jusserit quod funderent aquam super holocaustum Tribus vicibus, (1 Regnum 18:34);

Quod Jesus dixerit, quod "Regnum caelorum sit simile fermento, quod accipiens mulier abscondidit in (farinae) Tribus satis, donec fermentaretur totum," (Matthaeus 13:33);

Quod Jesus dixerit ad Petrum, quod Ter abnegaturus sit Ipsum, (Matthaeus 26:34);

Quod Dominus Ter interrogaverit Petrum, "amasne Me," (Johannes 21:15-17);

Quod "Jonas fuerit in ventre ceti Tribus diebus et Tribus noctibus," (Jonas 2:1 (B.A. 1:17));

Quod Jesus dixerit, quod Templum dissolveret, et Ipse illud per Tres dies aedificaret, (Matthaeus 26:61); ¹

Quod Jesus in Gethsemane Tribus vicibus oraverit, (Matthaeus 26:39-44);

Quod Jesus Tertio die resurrexerit, (Matthaeus 28:1(, seq.)).

(Praeter pluries alibi, ut Esaias 16:14; Hoschea 6:2; Exodus 3:18; 10:22-23; 19:1, 11, 15-16, 18; Leviticus 19:23-25; Numeri 19:11 ad fin.; 31:19-25; Deuteronomius 19:2-3; ² 26:12; Joshua 1:11; 3:2; 1 Samuelis 20:5, 12, 19-20, 35-36, 41; 2 Samuelis 24:11-13; Daniel 10:1-3; ³ Marcus 12:2, 4-6; Luca 20:12; ⁴ 13:32-33).

"Septem" aeque ac "tria" significant plenum et completum, at "septem" dicuntur de rebus sanctis, "tria" autem de rebus non sanctis.

Footnotes: