404. "Et facta est tertia pars maris sanguis," significat quod omnia communia vera apud illos falsificata essent. - Per "tertiam partem" significantur omnia (400); per "sanguinem" significatur falsificatio veri Verbi (379); per "mare" significatur Ecclesia apud illos qui in externis ejus sunt, et in sola fide (398, 402); ¹ quod apud hos communia vera falsificata sint, est quia in illis solis sunt, non enim sciunt singularia fidei istius, sicut Clerici; ex communibus veris apud illos est, quod appareant sicut in mari in mundo spirituali; causa est, quia aquae significant vera (50); et mare est commune receptaculum illarum (238).

Footnotes:

400. "Et missa in terram, et tertia pars arborum combusta est," significat quod apud illos qui in internis Ecclesiae sunt et in sola fide, omnis affectio et perceptio veri, quae faciunt hominem Ecclesiae, perierint. - Per "terram," in quam "grando et ignis mixta sanguine" missa sunt, significatur Ecclesia apud illos qui (in) internis ejus sunt et in sola fide, qui quod sint Clerici, videatur supra (398); per "tertiam partem" significatur omne quoad verum, sicut per "quartam partem omne quoad bonum (322); quod per "tria" seu "tres," significetur omne, plenum et prorsus, videbitur infra (505), inde per "tertium" quod est "tertia pars," significatur simile: per "comburi" significatur perire, hic per falsum ex amore infernali, quod intelligitur per "grandinem et ignem mixta sanguine," de quibus mox supra (399). Per "arborem" significatur homo; et quia homo est homo ex affectione quae est voluntatis et ex perceptione quae est intellectus, ideo hae quoque per "arborem" significantur: est etiam correspondentia inter hominem et arborem; quare in Caelo apparent paradisi ex arboribus, quae affectionibus et inde perceptionibus Angelorum correspondent; et quoque sunt alicubi in Inferno sylvae ex arboribus quae malos fructus ferunt, secundum correspondentiam cum concupiscentiis et inde cogitationibus illorum ibi. Quod "arbores" in genere significent homines quoad affectiones et inde perceptiones illorum, constare potest ex sequentibus locis:

"Cognoscent omnes Arbores agri, quod Ego Jehovah humiliem Arborem altam, exaltem Arborem humilem, et arefaciam Arborem viridem, et germinare faciam Arborem aridam," (Ezechiel 17:24);

"Beatus vir qui confidit in Jehovah; erit sicut Arbor plantata juxta aquas, non cessabit a ferendo fructum," (Jeremias 16:7, 8); ¹

"Beatus vir cujus in Lege (Jehovae) beneplacitum; erit sicut Arbor plantata juxta rivos aquarum, quae fructum dabit in tempore suo," (Psalm. 1:1-3); ²

Laudate Jehovam "Arbores fructus," (Psalm. 148:9);

"Saturantur Arbores Jehovae," (Psalm. 104:16);

"Securis ad radicem Arboris jacet, omnis Arbor non faciens fructum bonum exscindetur," (Matthaeus 3:10; 7:16-20; ³

"Aut facite Arborem bonam et fructum bonum, aut facite Arborem putrem et fructum putrem, ex fructu enim cognoscitur Arbor," (Matthaeus 12:33; ⁴ Luca 6:43-44);

"Incendam ignem, qui comedet omnem Arborem viridem et omnem Arborem aridam," (Ezechiel 21:3 (B.A. 20:47)).

Quoniam "arbor" significat hominem, ideo statutum fuit, quod Fructus Arboris inserviens esui in terra Canaane praeputiaretur (Leviticus 23-25);

tum,

Quando aliqua urbs obsidebatur, non securim mitterent in aliquam Arborem fructus boni, (Deuteronomius 20:19-20);

ut et quod In Festo Tabernaculorum acciperent fructus Arboris honoris, et laetarentur coram Jehovah, (Leviticus 23:40-41).

(Praeter plura, quae hic propter copiam non afferuntur.)

Footnotes:

50. "Et Vox Ipsius tanquam Vox aquarum multarum," Significat Divinum Verum Naturale. - Quod "Vox," cum a Domino, significet Divinum Verum, videatur supra (37); quod "Aquae" significent vera, et in Specie vera naturalia, quae sunt cognitiones ex Verbo, constat ex multis locis in Verbo, ex quibus sequentia solum adducentur:

"Plena est Terra scientia Jehovae, sicut Aquae mare contegunt," (Esaias 11:9);

"Tunc haurietis Aquas cum laetitia ex fontibus salutis," (Esaias 12:3);

"Qui ambulat in justitiis, et loquitur rectitudines, Panis dabitur et Aqua fidelis," (Esaias 33:15-16);

"Pauperes et egeni quaerentes Aquam, sed non; lingua eorum siti defecit: aperiam super clivis fluvios, et in medio vallium fontes ponam, desertum in stagnum Aquarum, et terram siccam in scaturigines Aquarum, ut videant, agnoscant, attendant et intelligant," (Esaias 41:17-18, 20); ¹

"Effundam Aquas super sitientem, et fluenta super aridam, effundam Spiritum Meum," (Esaias 44:3);

"Exorietur in tenebris lux tua, ut sis sicut hortus irriguus, et sicut exitus Aquarum, cujus Aquae non mentientur," (Esaias 57:10, 11); ²

"Duo mala fecit populus Meus, Me deseruerunt, Fontem Aquarum vivarum, ad excidendum sibi foveas, quae non continent Aquas," (Jeremias 2:13);

"Magnates miserunt minorennes Aquae causa, venerunt ad foveas, nec invenerunt Aquas, reversa sunt vasa eorum vacua," (Jeremias 14:3);

"Deseruerunt Fontem Aquarum vivarum Jehovam, (Jeremias 17:13); ³

"Cum fletu venient, et, cum fletu adducam eos, ducam eos ad fontem Aquarum in via recti," (Jeremias 31:9);

"Frangam baculum Panis, et Aquas in mensura et stupore bibent, ut contabescant propter iniquitates," (Ezechiel 4:16-17; 12:18-19; Esaias 51:14);

"Ecce dies venient, quibus immittam famem in terram; non famem ad panem, nec sitim ad Aquas, sed ad audiendum Verbum Jehovae; vagabuntur a mari ad mare, et discurrent ad audiendum Verbum Jehovae, nec invenient: in die illo deficient virgines et juvenes siti," (Amos 8:11-13);

"In die illo exibunt Aquae vivae ex Hierosolyma," (Sacharias 14:8); ⁴

"Jehovah Pastor meus, ad Aquas quietum deducet me," (Psalm. 23:1-2); ⁵

"Non sitient. Aquas e Petra effluere faciet illis, et findet Petram ut effluant Aquae," (Esajas 48:21); ⁶

"Deus, mane quaero Te, sitit anima mea, lassus sine Aquis," (Psalm. 63:2 (B.A. 1));

"Jehovah mittit Verbum, spirare facit ventum, ut fluant Aquae," (Psalm. 147:18-19)

"Laudate Jehovam Caeli caelorum, et Aquae quae desuper Caelis," (Psalm. 148:4);

Jesus ad fontem Jacobi sedens dixit mulieri, "Omnis qui biberit ex hac Aqua, ⁷ sitiet iterum; qui vero biberit ex Aqua, quam Ego dabo, non sitiet in aeternum; et Aqua quam Ego dabo, fiet in eo fons Aquae salientis in vitam aeternam," (Johannes 4:7-15);

"Jesus dixit, Si quis sitiverit, venito Me, et bibito; quisquis credit in Me, sicut dicit Scriptura, flumina ex ventre illius fluent Aquae viventis," (Johannes 7:37-38); ⁸

"Sitienti dabitur ex fonte Aquae vitae gratis," (Apocalypsis 21:6);

"Ostendit illi fluvium Aquae vitae exeuntem e throno Dei et Agni," (Apocalypsis 22:1);

"Spiritus et Sponsa dicunt (Veni), et qui audit dicat Veni, et qui sitit veniet, et qui vult accipiet Aquam vitae gratis," (Apocalypsis 22:17);

Per "Aquas" in his locis intelliguntur vera; unde patet quod per "vocem aquarum multarum" intelligatur Divinum Verum Domini in Verbo, pariter in his locis:

"Ecce gloria Dei Israelis venit ex via Orientis, et vox Ipsius sicut Vox Aquarum multarum, et terra illustrata est a Gloria Ipsius," (Ezechiel 43:2); ⁹

"Audivi vocem e Caelo, tanquam Vocem Aquarum multarum," (Apocalypsis 14:2);

"Vox Jehovae super Aquis, Jehovah super Aquis multis," (Psalm. 29:3). ¹⁰

Cum scitur quod per "Aquas" in Verbo intelligantur Vera in naturali homine, constare potest quid significatum est per Lavationes in Ecclesia Israelitica; et quoque quid significatur per Baptismum; et quoque per haec Domini verba apud Johannem:

"Nisi homo generatus fuerit ex Aqua et Spiritu, non potest ingredi in Regnum Dei," (3:5);

"ex Aqua" significat per Vera, et "ex Spiritu" significat Vitam secundum illa. Quod "Aquae" in opposito sensu significent falsa, videbitur in sequentibus.

Footnotes: