788. (Vers. 19.) "Et miserunt pulverem super capita sua, et clamaverunt flentes et lugentes, dicentes, Vae, vae, urbs illa magna," significat dolorem et luctum eorum interiorem, et exteriorem, qui est lamentatio, quod tam eminens Religiosum prorsus destructum et damnatum sit.--Per "mittere pulverem super capita" significatur interior dolor et luctus propter destructionem et damnationem, de qua sequitur; per "clamare flentes et lugentes" significatur dolor et luctus exterior; per "flere" significatur luctus animae, et per "lugere" luctus cordis; per "Vae, vae, urbs ista" significatur gravis lamentatio super destructione et damnatione. Quod "vae" significet lamentationem super calamitate, infelicitate, et damnatione, et inde "vae, vae" gravem lamentationem, videatur 416, 769, 785; et quod "urbs" significet Religiosum illud, 785, et alibi. Quod per "mittere pulverem super caput" significetur interior dolor et luctus propter destructionem et damnationem, constat ex his sequentibus:

"Clamabunt amare, et ascendere facient Pulverem super capite suo, et in Cinere volvent se," (Ezechiel 27:30);

"Sedent in terra (seniores) filiae Zionis, ascendere fecerunt Pulverem super caput suum," (Threni 2:10);

Amici Hiobi "sciderunt tunicas suas, et sparserunt Pulverem super capita sua," (Hiob 2:12);

"Descende et sede super Pulvere, filia Babelis; sede in terra, non thronus tibi," (Esaias 47:1).

(Praeter alibi.)

Quod miserint pulverem super capita cum intime dolerent, erat causa, quia "pulvis" significabat damnatum (Ut patet ex Genesis 3:14; Matthaeus 10:14; Marcus 6:11; Luca 10:10-12); ¹

et "pulvis super capite" repraesentabat agnitionem quod ex se damnati essent, et sic paenitentiam (Ut Matthaeus 11:21; Luca 10:13);

quod "pulvis" significet damnatum, est quia terra super inferna in mundo spirituali consistit ex mero pulvere absque gramine et herba.

Footnotes: