3882. ‘Et substitit a pariendo’: quod significet per scalam ascensum a terra usque ad Jehovam seu Dominum, constat a significatione ‘parere seu partus’ quod sit verum et bonum, nam haec sunt partus in sensu spirituali, homo enim regeneratur seu e novo nascitur per verum et bonum; haec etiam sunt quae significata sunt per quatuor partus Leae, Reubenem ¹ , Shimeonem, Levi et Jehudam; per ‘Reubenem’ verum quod primum regenerationis seu renascentiae est, hoc modo est quoad scientiam, ita scire verum; per ‘Shimeonem’ verum quod alterum regenerationis seu renascentiae est, hoc verum est quoad voluntatem, ita velle verum; per ‘Levi’ verum quod tertium regenerationis seu renascentiae est, hoc quoad affectionem est', ita affici vero, quod idem est cum charitate; per ‘Jehudam’ autem bonum quod quartum regenerationis seu renascentiae est, quod est caeleste amoris; cum regeneratus seu e novo natus ad hoc pervenit, tunc apparet ei Dominus, ascenderat enim tunc ab infimo gradu sicut per scalam usque ad gradum ubi Dominus;

[2] hic etiam ascensus est qui significatus est per scalam in somnio visam Jacobo statutam terrae cujus caput pertingeret caelum, et in qua angeli Dei ascenderent et descenderent, et super qua Jehovah seu Dominus staret, de qua i capite praecedente xxviii, vers. 12; inde patet quod per ‘substitit a pariendo’ illud significetur. Quod per concipere et parere quater dicta, progressus ab externo ad internum, seu a vero ad bonum, hoc est, e terra ad caelum, significatus sit, videatur n. 3860, 3868, 3874, 3879 Descensus dein sequitur, descendere enim homo non potest nisi prius ascenderat; descensus autem non aliud est quam ex bono prospicere verum, sicut a monte, ad quem homo enisus est, illa quae infra jacent quod tunc uno intuitu comprehendere possit innumerabilia prae ² illis qui infra aut in valle stant, unicuique patet; similiter ³ se prorsus habet cum illis qui in bono sunt, hoc est, in amore in Dominum e in charitate erga proximum, prae illis qui modo in vero sunt, hoc est in sola fide.

Footnotes: