Nehemia 12

¹ Shaltiel sawchapawpa Zerubabel nata Zesua hnohta a khypa theihthaipa zy nata Livai sahlaozy cha hezy he ama châ: Seraiah zy, Zeremiah zy,

² Amaria zy, Malu zy, Hatu zy,

³ Shekaniah zy, Rehu zy Meremô zy,

⁴ Idô zy, Kinethô zy, Abizah zy,

⁵ Miami zy, Maadiah zy, Bilka zy,

⁶ Shemaiah zy, Zôiari zy. Zedaiah zy,

⁷ Salu zy, Amôka zy, Hilkiah zy, Zediah zy. He sahlao he Zesua a hro nota theihthaipa hryta nata ama unawhpa zy hryta a hyutuhpa zy ama cha.

⁸ Chazy leipa chhao Livai sahlaozy: Zesua zy, Binui zy. Kadmiel zy, Sherebiah zy, Zudah zy alyna bie reina liata hyutuhpa Mataniah zy, ano nata a unawhpa zy cha.

⁹ Babukia nata Uni nata ama unawhpa zy chhao cha a py py ta adadypa ta y tyh ei ta.

¹⁰ Chatawhcha Zesua chata Zôiaki sa ta, Zôiaki chata Eliashi sa ta, Eliashi chata Zôiada sa ta,

¹¹ Zôiada chata Zawnatha sa ta, Zawnatha chata Zadua sa ta.

¹² He sahlao he Zôiaki hro nona chata theihthaipa ama chhôhkha pawhrâhpa zy ama châ: Seraiah pathla liatahpa Merai zy; Zeremiah pathla liatahpa Haniah zy;

¹³ Ezra pathla liatahpa Mesula zy: Amaria pathla liatahpa Zehôhana zy;

¹⁴ Maluki pathla liatahpa Zawnatha zy; Shebaniah pathla liatahpa Zawsi zy;

¹⁵ Hari pathla liatahpa Adana zy: Meraiô pathla liatahpa Helkai zy;

¹⁶ Idô pathla liatahpa Mesula zy;

¹⁷ Abiah pathla liatahpa Zikri zy; Miniami pathla liatahpa zy, Môadiah pathla liatahpa Piltai zy;

¹⁸ Bilka pathla liatahpa Shamua zy; Shemaiah pathla liatahpa Zehônatha zy;

¹⁹ Zôiari pathla liatahpa Matenai zy; Zedaiah pathla liatahpa Uzi zy;

²⁰ Salu pathla liatahpa Kalai zy; Amôka pathla liatahpa Eba zy;

²¹ Hilkiah pathla liatahpa Hasabiah zy; Zedaiah pathla liatahpa Nethanel zy.

²² Eliashi zy, Zôiada zy, Zôhana zy, Zadua zy hro nota Livai sahlaozy cha chhôhkha pawhrâhpa ta ropa châ ei ta; Persia chyhsa Daria a bei nota theihthaipa zy chhao.

²³ Eliashi sawchapawpa Zôhana hro no taihta Livai saw chhôhkha pawhrâhpa zy cha thâtih rona châbu liana chata ropa ta ama y.

²⁴ Chatawhcha Livai sahlao pawhrâhpa zy: Hasabiah zy, Sherebiah zy, Kadmiel sawchapawpa Zesua zy nata unawhpa Khazohpa chyhsa Davi a piepa hawhta a py py ta adadypa ta reithaipa nata alyna bie a reituh awpa zy chhaota.

²⁵ Mataniah zy, Babukia zy, Ôbadia zy, Mesula zy, Talmô zy, Aku zy cha ochhi kiapâh ta hmo sona o nata chhikao vaihtuhpa zy ama châ.

²⁶ Hezy he Zesua, Zôzada sawchapaw sawchapawpa Zôiaki a hro no tahpa nata râh avaotuhpa Nehemia nata Ezra theihthaipa nata chârohtuhpa hro no tahpa châ ei ta.

²⁷ Zerusale kuh ama hlâna liana chata paotlâ zy, tlaipi zy, totâ zy chhaota, hlasapa nata alyna bie reipa, aly ngaitapa ta a hlâna liata a hlao awpa ta Zerusale lâ a vaw chhi awpa ta Livai sahlao zy cha ama su zydua tawhtapa tlua khai ei ta.

²⁸ Zerusale chheipâh tawhtapa nata Netôpha sahlao khihzy tawhta hla satuhpa sahlao sawzy a pahmaohpakhy ei ta;

²⁹ Bekilka tawhta nata Keba nata Bethamô râh tawhtapa chhao; hla satuhpa zy chata Zerusale chheipâh liana chata khih vaw tao chyu tlôh ei ta.

³⁰ Chatawhcha theihthaipa zy nata Livai sahlaozy cha a pathaisa ei ta; zawpi zy, kuh zy, a ochhi zy pathaisa ei ta.

³¹ Chatanachata Zudah sahlao molaipa zy cha kuh chô lâna chata a chhi na ta, alyna bie reipa ta a pazipa ta a sie awpa py lai ngaitapa, py no rao na ta. Py kha cha Hnaihny Chhikao lâta kuh chô chachâh lâchhâh ta sie ei ta;

³² âmo cha Hôsai nata Zudah sahlao molaipa khophie zy,

³³ Azariah zy, Ezra zy, Mesula zy,

³⁴ Zudah zy, Benzami zy, Shemaiah zy, Zeremiah zy,

³⁵ chiahmie a chabapa theihthaipa sawchapawpa thokha zy; Asapha sawchapawpa Zaku, cha sawchapawpa Mikai, cha sawchapawpa Mataniah, cha sawchapawpa Shemiah, cha sawchapawpa Zawnatha, cha sawchapawpa Zekaria zy;

³⁶ a unawhpa Shemaiah zy, Azarel zy, Milalai zy, Kilalai zy, Maai zy, Nethanel zy, Zudah zy, Khazohpa chyhsa Davi tô tyhpa hmozy a chabapa Hanani zy chata pazi ei ta; chatawhcha chârohtuhpa Ezra ta hmia a sa ta.

³⁷ Tikhao Chhikao ama tlô nahta, kuh lâ khyna a thaona liata ama dady Davi khih hleidy lâ khypa ta, Davi o machhuah lâta sie ei ta, nochhi lâchhâh ta Ti Chhikao tlôna taihta.

³⁸ Alyna bie a reituhpa py hropa zy cha âmo a tyh awpa ta sie ei ta, chatawhcha kei nata zawpi khophie zy chhaota Meihô Patina O sâhpa machhuah lâta kuh chô liata Kuh Chhahpa taihta zi pi ta,

³⁹ Ephrai Chhikao chô liata zy, Chhikao Parohpa chô liata zy, Nga Chhikao chô liata zy, Hananel O sâhpa nata Zakha O sâhpa chô liata zy, Mietahkupa Chhikao tlôna taihta; chatawhcha Vaina-o Chhikao liana chata aduah ei ta.

⁴⁰ Chatanachata alyna bie a reituhpa sahlao py no zy cha Khazohpa o liata aduah ei ta, kei nata ryureituhpa sahlao khophie zy chhaota;

⁴¹ chatawhcha chiahmie a chabapa theihthaipa sahlao Eliakima zy, Maasei zy, Miniami zy, Mikai zy, Eliônai zy, Zekaria nata Hananiah zy chhaota,

⁴² Maasei zy, Shemaiah zy, Eliaza zy, Uzi zy, Zehôhana zy, Malkizah zy, Elama zy, Eza zy chhao. Chatawhcha hla satuhpa zy chata ama hyutuhpa Zezrahiah zy chhaota a paro ngaitapa ta sa ei ta.

⁴³ Cha noh liana chata atheihna thata hlâ ei ta, thapha ngaitapa ta y ei ta, Khazohpa ta ama tha thata paphasa ta; chatawhcha chanô zy nata hawti zy taih chhaota thaphana cha lâ hlapi tawh chhao thei ei ta.

⁴⁴ Cha noh liana chata thyuna zy, hiepa hlana zy, chichei hmiatuapa zy, su hrawh liata su khazy sona chhôhpadâhpa zy liata hyutuhpa ryhpa ta a raopa hawhta theihthaipa nata Livai sahlao tovyuh khi to ama taopa lymâ hawhta a pakhytuh awpa zy rao ei ta; Zuzy cha chakaotuhpa theihthaipazy nata Livai sahlao vâna chata aly ngaita ei ta.

⁴⁵ Ama Khazohpa chakaonazie awpa nata a pathaisana ryhpa cha zyh ei ta, hla satuhpa zy nata ochhivaihtuhpazy chhaota Davi nata a sawchapawpa Sawlawmaw biepiepa hawhna chata.

⁴⁶ Hlâno ta Davi nata Asapha hro nona chata hla sapa py hyutuhpa y tyh ei ta, Khazohpa reithaina nata alyna hlazy ama sa tyh.

⁴⁷ Zerubabel hro no nata Nehemia hro nona chata Izarel zydua ta hla satuhpazy nata ochhi­vaihtuhpazy cha noh chareih ta amâ daih awpa ta tovyuh taopa tyh ei ta; chatawhcha Livai sahlao tovyuh pananopa hra ta; chatawhcha âmo Livai sahlaozy cha Arawna sawchapawpazy tovyuh pananopa tyh ei ta.