1. SUMMARIA EXPOSITIO DOCTRINAE NOVAE ECCLESIAE, QUAE PER NOVAM HIEROSOLYMAM IN APOCALYPSI INTELLIGITUR.

Postquam aliqua Opera et Opuscula de NOVA HIEROSOLYMA, per quam intelligitur NOVA Ecclesia a Domino instauranda, intra aliquot annos a me promulgata sunt, et postquam Apocalypsis revelata est, in animum induxi Doctrinam illius Ecclesiae in sua plenitudine, ita integram, in lucem edere: sed quia hoc aliquot annorum opus est, consultum duxi aliquam Sciagraphiam ejus emittere, propter causam, ut communis idea de illa Ecclesia et ejus Doctrina primum concipiatur; quoniam dum communia praecedunt, postea omnia et singula in sua latitudine exstantia in luce apparent, haec enim in communia intrant, sicut homogenea in sua receptacula. Attamen Breviarium hoc non subjicitur judiciis ventilandum, sed modo communicatur ad notitiam, quia hujus Contenta in ipso Opere plene demonstrabuntur. Sed praemittenda sunt Doctrinalia hodierna de Justificatione, propter sequentia de Discordantiis dogmatum Ecclesiae hodiernae et Ecclesiae novae.

1. DE CONJUGIO II

DE REPRAESENTATIONE AMORIS CONJUGIALIS PER PULCHERRIMA

Amor vere conjugialis repraesentatur in coelo per varia, repraesentatur per auras adamantinas, sicut ex rubinis et pyropis scintillantes, tum etiam per irides pulcherrimas, et quoque pluvias aureas, quae cum conspiciuntur, implent adstantes tali amoenitate et talibus delitiis ut mentis intima afficiant; audivi angelos, cum amor conjugialis ita repraesentabatur, in paradisiacis coeli, et dicebant quod tali delitio implerentur ut non possint exprimere aliter quam quod esset ipsum delitium, ex quo sicut ex sua origine omnes reliquae delitiae exoriantur; et hoc delitium dicebatur fuisse delitium purum mentis, absque omni excitatione cupidinis; talis enim est amor conjugialis in sua origine.