1. INCWADI KAGENESIS

Kakho umuntu ongabona ngokusukela engqondweni yemvelo yeZwi yeThestamente eliDala ukuthi lengxenye yeZwi imumethe izimfihlo zasezulwini ezijulile, nokuthi konke okuqukethwe kuyo, kabanzi nangemininingwane, kuphathelene neNkosi, nezulu laYo, nesonto, nenkolo, nazozonke izinto ezixhumene nalezizinto. Ngokuba engqondweni yemvelo noma yamabala yalengxenye yeZwi, umuntu angabona kuphela—kabanzi—ukuthi zonke izinto kuyo ziphathelene namasiko nemithetho eSonto lamaJuda. Nokho iqiniso elimsulwa wukuthi kulolo nke leloZwi kukhona okungaphakathi okungaveli nakancane kokungaphandle ngaphandle kokuyingcosane okwadalulwa futhi kwachazwa yiNkosi kuBafundi baYo; njengokuthi imihlabelo ifanekisa iNkosi; ukuthi izwe laseK-hanana neJerusalema kufanekisa izulu—okuyisizathu sokuba kubizwe ngeKhanana lasezulwini nangeJerusalema lasezulwini—nokuthi iPharadisi lifanekisa okufanayo. (Mathewu 6:33)

1783. INGQONDO ENGAPHAKATHI. Njengoba sekuke kwaphawulwa, okukhulunywa ngakho kulesiSahluko kuyizinto ezenzeka ngempela; okungukuthi, kuyiqiniso ukuthi uJehova wakhuluma noAbrama njengoba kuchaziwe; U-Abrama wathenjiswa izwe laseKhanani njengefa; empeleni wayalwa njengoba kushiwo ukuba ahlele isithokazi, imbuzikazi, inqama, ihobhe, nephuphu lejuba; amanqe ehlela ngempela ezidunjini; wabulala ngempela ubuthongo obujulile, nakulokho kulala lwamshaya ngempela uvalo lokwesaba ubumnyama; nalapho ilanga selishonile wakubona ngempela okufana neziko elishunqayo nelangabi lomlilo elalidabula phakathi kwezingxenye zezilwane ezabe zahlukanisiwe; neminye imininingwane eshiwo. Lezizinto zenzeka ngempela emlandweni, kodwa zonke lezozenzeko, ngisho nezincane kakhulu, ziyafanekisa; ngisho namazwi noma amagama asetshenziswe ekuchazeni lezozenzeko, nezingxenye ezincane zalawomagama, agodle incazelo kamoya, okungukuthi, yonke imininingwane yalowomagama imumethe ingqondo engaphakathi. Ngokuba yilowo nalowomniningwane weZwi ufunzelelwe, nanjengoba yonke ifunzelelwe, ngakhoke kayinakuba nomsuka ngaphandle kowasezulwini; okungukuthi, kucashe izinto zezulu lamazulu nezinto zezulu likamoya ekujuleni kwalo. Ukuba iZwi belingazimumethe lezizinto ngabe kakulona iZwi leNkosi.

[2] Izinto zezulu lamazulu nezinto zezulu likamoya yizona ezimumethwe engqondweni engaphakathi yeZwi. Lapho lengqondo ivela obala, ingqondo yemvelo inyamalala sengathi kayikho, nalapho futhi kunakwa ingqondo yemvelo noma engaphandle kuphela ingqondo engaphakathi inyamalala sengathi kayikho. Ubudlelwane obuphakathi kwalezizingqondo zombili bufana nobudlelwane bokukhanya kwasezulwini ekukhanyeni kwasemhlabeni, nangokuphendukisa, bufana nobudlelwane bokukhanya kwasemhlabeni ekukhanyeni kwasezulwini. Lapho kubonakala ukukhanya kwasezulwini, ukukhanya kwasemhlabeni bufana nesigayegaye, nalokhu ngaziswe khona ngokuzibonela mathupha. Kepha lapho umuntu esekukhanyeni kwasemhlabeni, ukukhanya kwasezulwini, uma ekubona, kungaba yisigayegaye. Kunjalo nangomqondo womuntu: kumuntu onaka inhlakanipho yobuntu kuphela noma ulwazi lwasemhlabeni kuphela, inhlakanipho yasezulwini ibonakala iyinto efiphele neyize; kodwa kumuntu onenhlakanipho yasezulwini, inhlakanipho yobuntu efiphele neyize kakhulu, nokuyinto eyisigayegaye, ngaphandle uma leyonhlakanipho ihlatshwa yimisebe yokukhanya kwasezulwini.

1869. ISIQHUBEZO MAYELANA NEZIBHALO EZINGCWELE NOMA IZWI.

Ukuthi ziningi kangakanani izinto eziqukethwe wumusho owodwa weZwi ngakhonjiswa khona ngesu lokuvulwa kubonakale imiqondo ebumba umcabango. Lokhu kuyenzeka empilweni engemuva kokufa—ekubeni lokhu kungezinye zezimangaliso zakuleyompilo—futhi kwenzeka ngendlela echache kangangokuba imiqondo uqobo lwayo iba yizakheko ezibonakala ngamehlo, sengathi imiqondo iyizithombe ezigqamile. Ngavulelwa ngakhonjiswa kanjalo imiqondo yomuntu obephila impilo yesisa senhliziyo noma yothando olwenananayo, nobethola injabulo noma ubumnandi obukhulu ngokufunda iZwi esaphila emhlabeni. Kwabonakala kulemiqondo yakhe izinto eziningi ezinhle, kanye nalezo ezazimnandi futhi zithokozisa kakhulu. Ngatshelwa nokuthi izinto ezibonakala emiqondweni eyizakheko zingabuye zivulwe ingaphakathi lazo futhi, nalapho zivulwa futhi kubonakala izinto ezinhle nezimnandi ngaphezulu, kanye nalezo ezibumba injabulo uqobo. Yonke imiqondo yezingelosi iwuloluhlobo, ngokuba ivuleka ngokusukela eNkosini uQobo.

[2] Emimoyeni eyayimangaliswa wukuthi empilweni yangemuva kokufa imiqondo yomcabango ingavulwa ibonakale ngalendlela, iqiniso lakho lakhonjiswa ngesu lesibonelo sokubona kweso, okuwukubona okubuthuntu nokufiphele kangangokuba izinto zemvelo ezincane kakhulu nezinemininingwane eminingi ngokungenakubalwa kazibonakali kulo, ngaphandle kokubonakala zifiphele, zimnyama futhi zingenasimo. Kodwa lapho lezizinto zibukwa ngemasikilophu (microscope) imininingwane noma okungaphakathi kwazo kuyabonakala, futhi kubonakala kuxhumene ngokulandelana okuthandekayo nangehlelo elihle ngokubabazekayo. Kusobala futhi ukuthi imininingwane yalezizinto ezincane ibingavuleka nangaphezulu kwalokho ukuba ibibukwa ngemasikilophu enamandla kakhulu. Lesisibonelo sakwenza kwachacha kuleyomimoya ukuthi isimilo sokubona kwangaphakathi sinjani, okumisebe yakho kayilutho olunye ngaphandle kwemiqondo; ngokuba oqotsheni lwayo lemiqondo iqatha kangangoba kakukho lutho oluqatha ngaphezu kwayo kulesosiyingi, yize umuntu ekuphika lokho. Nokho okunye okumalungana nemiqondo kuzophawulwa kamuva ngomusa weNkosi woBunkulunkulu.