723. "Et vidi Mulierem sedentem super Bestia coccinea, plena nominibus blasphemiae," significat Religiosum illud super Verbo ab illis prophanato. -Per "Mulierem" significatur Religiosum Catholico Romanum seu Babylonicum, nam sequitur, "super fronte ejus nomen scriptum, Mysterium, Babylon magna, mater scortationum et abominationum terrae. "Quod" mulier "significet Ecclesiam ex affectione veri, videatur 434, hic Religiosum Romano Catholicum, quod est in affectione opposita; per "Bestiam coccineam" significatur Verbum, de quo sequitur; et per "plenam nominibus blasphemiae" significatur prorsus prophanatum; per "blasphemiam" enim significatur negatio Divini Domini in Humano Ipsius, et adulteratio Verbi (571, 582, 692, 715) ¹ , ita prophanatio; nam qui non agnoscit Divinum Domini in Humano Ipsius, et falsificat Verbum, sed non ex proposito, quidem prophanat, at leviter; sed qui addicant sibi omnem potentiam Divini Humani Domini, et propterea negant illud, et qui applicant omnia Verbi ad acquirendum sibi dominium super Sancta Ecclesiae et Caeli, et propterea adulterant Verbum, illi prophanant graviter. Ex his constare potest, quod per "vidi Mulierem sedentem super Bestia coccinea, plena nominibus blasphemiae," significetur Religiosum illud super Verbo ab illis prophanato; per "coccineum" significatur Verum Verbi ex origine caelesti. Quod per "Bestiam coccineam" significetur Verbum quoad Divinum Verum Caeleste, ex prima cogitatione apparet sicut remotum et alienum, imo absonum, quia vocatur "Bestia;" sed quod per "bestiam" in Sensu spirituali significetur affectio naturalis, et quod dicatur de Verbo, de Ecclesia et de Homine, 239, 405, 567. ² Quod "quatuor Animalia," quorum unum erat Leo, alterum Vitulus, et quartum Aquila, significent Verbum, et quoque apud Ezechielem vocantur "Bestiae," 239, 275, 286, 672. Quod "Equus," qui etiam est bestia, significet intellectum Verbi, 298; quod "Agnus" significet Dominum, quod "Ovis" hominem Ecclesiae, et quod "Grex" ipsam Ecclesiam, notum est. Haec allata sunt, ne quis miretur quod per "Bestiam coccineam" significetur Verbum. Et quia Religiosum Catholico Romanum super Verbo fundat suum robur et suam dignitatem, ideo visa est Mulier illa sedens "super Bestia coccinea," ut prius "super aquis multis," (vers. 1), per quas significantur veritates Verbi adulteratae et prophanatae (supra, 719). ³ Quod per "Bestiam" illam significetur Verbum, patet manifeste ex illis quae de ea in sequentibus hujus capitis dicuntur, ut in versu 8: "Bestia, quam vidisti, erat et non est; et mirabantur habitantes super terra, videntes Bestiam, quae erat et non est, attamen est." In versu II: "Bestia, quae erat et non est, ipsa Rex octavus est, et de septem est, et in interitum abit." In vers. 12, 13: quod "decem Cornua decem Reges sint, qui potentiam et potestatem suam Bestiae tradent." In versu 17: "Deus dedit in corda eorum dare Regnum suum Bestiae." Talia non possunt dici nisi de Verbo.

Footnotes:

298. (Vers. 2.) "Et vidi et ecce Equus albus" significat intellectum veri et boni ex Verbo apud hos. - Per "Equum" significatur intellectus Verbi, et per "Equum album" intellectus veri ex Verbo; "album" enim praedicatur de veris (167). Quod "Equus" significet intellectum Verbi, ostensum est in singulari Opusculo de Equo Albo; at quia ibi solum aliqua loca allata sunt, in confirmationem hic afferentur plura; hoc patet manifeste ex eo, quod visi sint "equi" exire ex Libro quem Agnus aperuit, et quod "Animalia" dixerint, "veni et aspice;" per "Animalia" enim significatur Verbum (239, 275, 286) per "Librum" similiter (256) ¹ et per "Filium Hominis," Qui hic est "Agnus," Dominus quoad Verbum (44); ex his primum patet, quod non aliud per "equum" hic intelligatur, quam intellectus Verbi. Hoc manifestius constare potest ex his infra in Apocalypsi:

"Vidi Caelum apertum, dum ecce Equus Albus, et Sedens super illo vocatur Verbum Dei; et habet super vestimento et super femore Suo Nomen scriptum, Rex regum et Dominus dominorum; et Exercitus Ejus in Caelis sequebantur Ipsum super Equis albis," (19:11, 13-14, 16).

Quod "equus" significet intellectum Verbi, adhuc constare potest a sequentibus locis:

"Num contra mare excandescentia Tua, Jehovah, quod equites super Equis Tuis; Currus Tui salus, calcasti Mare Equis Tuis, lutum aquarum," (Habakuk 3:8, 15);

"Ungulae Equorum Jehovae sicut rupes reputantur," (Esaias 5:28);

"Die illo percutiam omnem Equum stupore, et Equitem ejus furore; et omnem Equum populorum percutiam caecitate," (Sacharias 12:4);

"In die illo erit super tintinnabulis Equi sanctitas Jehovae," (Sacharias 14:20);

"Quia oblivisci fecit eam Deus sapientiam, nec impertitus est intelligentiam, quo tempore in altum se attollit, ridet Equum et Equitem ejus," (Hiob 39:17-18, seq.);

"Exscindam Equum ex Hierosolyma, contra loquetur pacem gentibus," (Sacharias 9:10);

"Prae increpatione Tua, Deus Jacobi, ² obdormivit et currus et Equus," (Psalm. 76:7 (B.A. Psalm. 76:6); ³

"Evertam thronum regnorum, ac evertam Currum et Equitantes in eo, et descendent Equi et Equites eorum," (Haggaeus 2:22);

"Dispergam per Te regna, dispergam per Te Equum et Equitem ejus," (Jeremias 51:20-21);

Congregate vos a circuitu super sacrificium Meum; satiabimini super mensa Mea Equo et Curru; sic dabo gloriam Meam inter gentes, (Ezechiel 39:17, 20-21);

"Congregamini ad Caenam magnam Dei, et comedetis carnes Equorum et Sedentium super illis," (Apocalypsis 19:17-18);

Dan erit aspis super semita, mordens calcaneos Equi, et cadet Eques ⁴ ejus retrorsum; salutem Tuam exspecto Jehovah," (Genesis 49:17-18);

"Accinge gladium Tuum, Potens, conscende, Equita super Verbo veritatis," (Psalm. 45:4-5 (B.A. 3-4)); ⁵

"Cantate Deo, extollite Equitantem super nubibus," (Psalm. 68:5 (B.A. 4));

"Ecce Jehovah Equitans super nube," (Esaias 19:1); ⁶

"Psallite Domino Equitanti super Caelo Caeli antiquitatis," (Psalm. 68:33-34 (B.A. 32-33)); ⁷

"Deus Equitavit super Cherubo," (Psalm. 18:11 (B.A. 10));

"Tunc deliciaberis in Jehovah, et Equitare te faciam super excelsa terrae," (Esaias 58:14);

"Jehovah solus duxit eum, et Equitare fecit eum super excelsa terrae, (Deuteronomius 32:12-13);

"Equitare faciam Ephraimum," (Hoschea 10:11);

"Ephraimus" etiam significat intellectum Verbi. Quoniam Elias et Elisaeus repraesentabant Dominum quoad Verbum, ideo illi vocati sunt "Currus Israelis et Equites ejus:"

Elisaeus dixit ad Eliam, "Pater mi, Pater mi, Currus Israelis et Equites ejus," (2 Regnum 2:12)

Et Joas Rex ad Elisaeum, "Pater mi, Currus Israelis et Equites ejus," (2 Regnum 13:14);

"Aperuit Jehovah oculos pueri Elisaei, et vidit et ecce mons plenus Equis et Curribus igneis circum Elisaeum," (2 Regnum 6:17);

"currus" significat doctrinam e Verbo, et "eques" sapientem inde. Similia significantur per Quatuor Currus exeuntes inter montes aeris, et per quatuor Equos illis alligatos, qui erant rufi, nigri, albi et grandinati, qui etiam vocantur quatuor Spiritus, et dicuntur exivisse a stando juxta Dominum totius terrae, (Sacharias 6:1-8, 15).

In his locis per "equos" significatur intellectus Verbi seu intellectus veri ex Verbo; pariter aliis in locis. Hoc adhuc constare potest ex "equis" in sensu opposito nominatis, in quo significant intellectum Verbi et veri per ratiocinia falsificatum, et quoque deperditum, tum propriam intelligentiam; ut in sequentibus:

"Vae descendentibus in Aegyptum pro auxiliis, et super Equis innituntur, et non respiciunt ad Sanctum Israelis: nam Aegyptus homo et non Deus, et Equi ejus caro et non spiritus," (Esaias 31:1, 3);

"Pones supra Israelem Regem, quem elegerit Jehovah: modo non multiplicet sibi Equos, ne reducat populum in Aegyptum, ut multiplicet Equos," (Deuteronomius 17:15-16); ⁸

haec dicta sunt, quia per "Aegyptum" significatur scientia ac ratiocinatio ex propria intelligentia, unde falsificatio veri Verbi, quae hic est "equus."

"Aschur non servabit nos, super Equo non Equitabimus," (Hoschea 14:4 (B.A. Hoschea 14:3));

"Hi in Curru et illi in Equis, nos vero in Nomine Dei nostri gloriabimur," (Psalm. 20:8 (B.A. 7)); ⁹

"Mendacium Equus ad salutem," (Psalm. 33:17);

"Jehovah non in robore Equi delectatur," (Psalm. 147:10);

"Dixit Sanctus Israelis, in fiducia erit virtus Vestra: sed dixistis, Non super Equo fugiemus, et super Veloce Equitabimus," (Esaias 30:15-16);

Ponet Jehovah Jehudam sicut Equum gloriae: pudefient Equitantes Equis," (Sacharias 10:3, 5; ¹⁰

"Vae urbi sanguinum, tota mendacio plena, et Equus hinniens, et Currus saltitans; Eques ascendere faciens," (Nahum 3:1-4);

"Adducam contra Tyrum Regem Babelis cum Equo et cum Curru et cum Equitibus; prae abundantia Equorum obteget te pulvis eorum, prae voce Equitis et Currus commovebuntur muri tui; per ungulas Equorum suorum conculcabit omnes plateas tuas," (Ezechiel 26:7-11);

per "Tyrum" significatur Ecclesia quoad cognitiones veri, hic eas in illa falsificatas, quae sunt "equi Babelis."

(Praeter aliis in locis, ut Esaias 5:26, 28; Jeremias 6:22-23; 8:16; 46:4, 9; 50:37-38, 42; ¹¹ Ezechiel 17:15; 23:6, 20; ¹² Habakuk 1:6, 8-10; Psalm. 66:12) ¹³

Intellectus Verbi deperditus etiam significatur per "equum rufum," "nigrum," et "pallidum" in nunc sequentibus. Quod "equus" significet veri ex Verbo, sit ex apparentiis in mundo spirituali, videatur in Opusculo de Equo Albo.

Footnotes:

256. CAPUT V.

1. ET vidi in dextra Sedentis super Throno Librum scriptum intus et a tergo, obsignatum sigillis septem.

2. Et vidi Angelum fortem praedicantem voce magna, Quis est dignus aperire Librum, et solvere sigilla ejus.

3. Et nemo potuit in Caelo, nec super terra, neque sub terra, aperire Librum, nec ¹ inspicere eum.

4. Et ego flebam multum, quod nemo dignus inventus sit aperire et legere Librum, nec inspicere eum.

5. Et unus ex Senioribus dicit mihi, Ne fleto; ecce Leo, qui est ex tribu Jehudae, Radix Davidis, aperire Librum, et solvere septem sigilla ejus.

6. Et vidi, et ecce in medio Throni, et quatuor Animalium, et in medio Seniorum, Agnum stantem tanquam occisum, habentem cornua septem, et oculos septem, qui sunt septem Dei Spiritus emissi in omnem terram.

7. Et venit et accepit Librum e dextra Sedentis super Throno.

8. Et cum accepisset Librum, quatuor Animalia et Viginti quatuor Seniores prociderunt coram Agno habentes unusquisque citharas, et phialas aureas plenas suffitibus, quae sunt preces sanctorum.

9. Et canebant canticum novum, dicentes, Dignus es accipere Librum, et aperire sigilla ejus, quia occisus es, et redemisti Deo nos in sanguine Tuo, ex omni tribu et lingua, et populo et gente.

10. Et fecisti nos Deo nostro reges et sacerdotes, et regnabimus super terra.

11. Et vidi et audivi vocem angelorum multorum circum Thronum, et Animalia, et Seniores, et erat numerus eorum myriades myriadum, et chiliades chiliadum;

12. Dicentes voce magna, Dignus est Agnus occisus accipere potestatem et divitias et sapientiam et honorem et gloriam et benedictionem.

13. Et omne creatum, quod est in Caelo, et in terra, et sub terra, et in mari quae sunt, et quae in illis omnia, audivi dicentes, Sedenti super Throno et Agno, benedictio et honor et gloria et robur in saecula saeculorum.

14. Et quatuor Animalia dicebant, Amen; et viginti quatuor Seniores prociderunt et adoraverunt Viventem in saecula saeculorum.

SENSUS SPIRITUALIS.

CONTENTUM TOTIUS CAPITIS.

QUOD DOMINUS IN DIVINO HUMANO JUDICIUM FACTURUS SIT EX VERBO ET SECUNDUM ILLUD, QUIA IPSE EST VERBUM: ET QUOD HOC AGNITUM SIT AB OMNIBUS IN TRIBUS CAELIS.

CONTENTA ² SINGULORUM VERSUUM.

1. "Et vidi in dextra Sedentis super Throno Librum scriptum intus et a tergo," significat Dominum quoad Ipsum Divinum Suum ad aeterno, Cui Omnipotentia et Omniscientia, et Cui est Verbum (256)"; obsignatum sigillis septem," significat illud prorsus absconditum angelo et homini (257).

2. "Et vidi Angelum fortem praedicantem voce magna," significat Divinum Verum a Domino influens penitus apud Angelos et homines (258); "Quis est dignus aperire Librum et solvere sigilla ejus," significat quis in potentia est nosse status vitae omnium in Caelis et in Terris, et judicare unumquemvis secundum suum (259).

3. "Et nemo potuit in Caelo, nec super terra, neque sub terra," significet quod nullus in Caelis superioribus et in Caelis inferioribus (260); "aperire librum," significat nosse statas vitae omnium, et judicare unumquemvis secundum suum (261); "nec inspicere eum," significat ne hilum (262).

4. "Et ego flebam multum, quod nemo (dignus) inventus sit aperire et legere Librum, nec inspicere eum," significat dolorem cordis, quod si non aliquis posset, perirent omnes, (11, 263).

5. "Et unus ex senioribus dicit ³ mihi, Ne fleto," significat consolationem (264); "ecce vicit Leo, Qui est ex tribu Jehudae. Radix Davidis," significat Dominum, quod ex propria potentia subjugaverit Inferna, et redegerit in ordinem omnia cum fuit in Mundo, per Divinum Bonum unitum Divino Vero in Suo Humano (265, 266); "aperire Librum, et solvere septem sigilla ejus," significat hic ut prius (267).

6. "Et vidi, et ecce in medio Throni, et quatuor Animalium, et in medio Seniorum," significat ab intimis et inde in omnibus Caeli, Verbi, et Ecclesiae (268); "Agnum stantem tanquam occisum," significat Dominum quoad Humanum non in Ecclesia pro Divino agnitum (269); "habentem cornua septem," significat Ipsius Omnipotentiam (270); "et oculos septem, significat Ipsius Omniscientiam et Divinam Sapientiam (271); "qui sunt septem Dei Spiritus emissi in omnem terram," significat quod ex illa sit Divinum Verum in universo terrarum orbe, ubi religio (272).

7. "Et venit et accepit Librum e dextra Sedentis super Throno," significat quod Dominus quoad Divinum Humanum Suum sit Verbum, et quod hoc ex Divino Suo in Ipso, et quod ideo ex Divino Humano Suo facturus sit judicium (273).

8. "Et cum accepisset Librum," significat quando Dominus instituit facere judicium, et per id omnia in Caelis et super terris redigere in ordinem (274); quatuor Animalia et viginti quatuor Seniores prociderunt coram Agno," significat humiliationem, et adorationem Domini ex superioribus Caelis (275); "habentes unusquisque citharas," significat confessionem Divini Humani Domini ex veris spiritibus (276); "et phialas aureas plenas suffitibus," significat confessionem Divini Humani Domini ex bonis spiritualibus (277); "quae sunt preces sanctorum," significat cogitationes quae sunt fidei ex affectionibus quae sunt charitatis, apud illos qui ex bonis et veris spiritualibus colunt Dominum (278).

9. "Et canebant canticum novum," significat agnitionem et glorificationem Domini, quod Solus sit Judex, Redemptor et Salvator, ita Deus Caeli et terrae (279); "dicentes, Dignus es accipere Librum, et aperire sigilla ejus," significat hic ut prius (280); "quia occisus es, et redemisti Deo nos in sanguine Tuo," significat liberationem ab inferno, et salvationem per conjunctionem cum Ipso (281); "ex omni tribu et lingua et populo et gente," significat quod a Domino redempti sint, qui in Ecclesia aut in aliqua Religione in veris quoad doctrinam et in bonis quoad vitam sunt (282).

10. "Et fecisti nos Deo nostro reges et sacerdotes," significat quod illi a Domino in sapientia ex Divinis veris et in amore ex Divinis bonis sint (283); "et regnabimus super terra," significat et erunt in Regno Ipsius, Ipse in illis et illi in Ipso (284, 285).

11. "Et vidi et audivi vocem Angelorum multorum circum Thronum, et Animalia, et Seniores," significat confessionem et glorificationem Domini ob angelis inferiorum Caelorum (86); ("et erat numerus eorum myriades myriadum, et chiliades chiliadum," significat omnes in veris et in bonis) (287).

12. "Dicentes voce magna. Dignus est Agnus occisus accipere potestatem et divitias et sapientiam et honorem et gloriam," significat confessionem ex corde, quod Domino quoad Divinum sit Omnipotentia, Omniscientia, Divinum Bonum et Divinum Verum, (11, 288); "et benedictionem," significat omnia illa in Ipso, et ab Ipso in illis (289).

13. "Et omne creatum, quod est in Caelo, et in terra, et sub terra, et in mari, quae sunt, et quae in illis omnia, audivi dicentes," significat confessionem et glorificationem Domini ab angelis infimorum caelorum (290); "Sedenti super Throno et Agno, benedictio et honor et gloria et robur in saecula saeculorum," significat quod in Domino ab aeterno et inde in Divino Humano Ipsius sit omne Caeli et Ecclesiae, Divinum Bonum et Divinum Verum, et Divina Potentia, et ob Ipso in illis (291).

14. "Et quatuor Animalia dicebant, Amen," significat Divinam confirmationem ex Verbo (292); "et viginti quatuor Seniores prociderunt et adoraverunt Viventem in saecula saeculorum," significat humiliationem coram Domino, et ex humiliatione adorationem Ipsius ab omnibus (in) Caelis, a Quo et in Quo est Vita aeterna (293).

EXPLICATIO.

(Vers. 1.) "Et vidi in dextra Sedentis super Throno Librum scriptum intus et a tergo," significat Dominum quoad Ipsum Divinum Suum ab aeterno, Cui Omnipotentia et Omniscientia, et Qui est Verbum, Qui et status vitae omnium in Caelis et in terris, in omni particulari et in omni communi, ex Se Ipso novit. - Per "Sedentem super Throno" intelligitur Dominus quoad Ipsum Divinum, ex Quo Humanum Ipsius, nam sequitur quod" Agnus acceperit Librum e dextra Sedentis super Throno," (vers. 7), et per "Agnum" intelligitur Dominus quoad Divinum Humanum; per "Librum scriptum intus et a tergo" intelligitur Verbum in omni particulari et in omni communi; per "intus" in omni particulari, et per "a tergo" in omni communi; per "intus et a tergo" intelligitur etiam Verbi Sensus interior, qui est spiritualis, et Sensus ejus exterior qui est naturalis; per "dextram" intelligitur Ipse quoad omnipotentiam et omniscientiam, quia de exploratione omnium in Caelis et in terris, super quos Ultimum Judicium erit, et de separatione eorum, agitur. Quod Dominus ut Verbum sciat status vitae omnium in Caelis et in terris a Se Ipso, est quia est Ipsum Divinum Verum, et Ipsum Divinum Verum ex Se Ipso novit omnia; sed hoc arcanum est, quod in Sapientia Angelica de Divino Amore et Divina Sapientia detectum est. Quod Dominus quoad Ipsum Divinum ab aeterno fuerit Verbum, hoc est, Divinum Verum, patet ab his apud Johannem:

"In principio erat Verbum, et Verbum erat apud Deum, et Deus erat Verbum," (1:1);

et quod Dominus etiam quoad Humanum factus sit "Verbum," apud eundem:

"Et Verbum Caro factum est," (1:14).

Inde constare potest quid intelligitur per quod Liber fuerit in dextra Sedentis super Throno, et quod Agnus acceperit Librum inde (vers. 7). Quoniam Dominus est Verbum, et Verbum est Divinum Verum, quod in communi facit Caelum et Ecclesiam, et in particulari angelum ut in illo Caelum sit, et hominem ut in illo Ecclesia sit, et quia Verbum hic intelligitur per "Librum," ex quo et secundum quod omnes judicandi sunt, ideo passim dicitur "inscribi Libro," "judicari ex Libro," "deleri ex Libro," ubi de statu vitae aeternae alicujus agitur; ut in his locis:

Antiquus Dierum judicium consedit, "et Libri aperti sunt," (Daniel 7 (9,) 10);

Eripietur populus omnis, qui invenietur "scriptus In Libro," (Daniel 12 (9));

"Non latuit Te os meum, super Libro Tuo omnes scripti sunt dies, et non unus ex illis deest," (Psalm. 139:15-16);

Moses dixit, "Dele me quaeso ex Libro quem scripsisti; et dixit Jehovah, Illum qui peccavit Mihi, delebo e Libro," (Exodus 32:32-33)

"Deleantur e Libro vitae, et cum justis non scribantur," (Psalm. 69:29 (B.A. 28));

"Vidi quod Libri aperti sint; et Liber alius apertus est, qui est vitae; et judicati sunt mortui juxta ea quae scripta sunt in libris ⁴ secundum opera illorum, et si quis non inventus est in Libri vitae scriptus, ejectus est in stagnum ignis," (Apocalypsis 20:12, 15); ⁵

"Non ingredientur in Novam Hierosolymam, nisi qui scripti sunt in Libro vitae Agni," (Apocalypsis 21:26 (B.A. 27));

"Adorabunt bestiam omnes, quorum nomina non scripta sunt in Libro vitae Agni," (Apocalypsis 13:8; 17:8).

Quod per "Librum" intelligatur Verbum, apud Davidem:

"In Volumine Libri scriptum est de Me," (Psalm. 40:8 (B.A. 7));

et apud Ezechielem:

"Vidi et ecce manus emissa ad me, et in ea Volumen Libri scriptum ante et post," (2:9-10); ⁶

"Liber verborum Esajae," (Luca 3:4);

"Liber psalmorum," (Luca 20:42).

Footnotes: