158. (Vers. 2.) "Esto vigilans," significat ut in veris sint, et in vita secundum illa. - Non aliud per "vigilare" in Verbo significatur; nam qui vera addiscit et vivit secundum illa, est sicut qui e Somno expergiscitur et fit vigilat qui non in veris est, sed solum in cultu, est sicut qui dormit et somniat: vita naturalis in se spectata, seu absque vita spirituali, nec aliud est quam somnus; at vita naturalis in qua est vita spiritualis, est vigilia; et haec non aliunde comparatur quam per vera, quae in luce sua et in die suo sunt, quando homo est in vita secundum illa. Hoc per "vigilare" significatur in his locis:
"Vigilate, quia nescitis qua hora Dominus venturus est," (Matthaeus 24:42);
"Beati servi, quos cum Dominus venit, invenerit eos Vigilantes: estote parati, quia qua hora non putatis, Filius Hominis veniet," (Luca 12:37, 40); 1
"Vigilate quia nescitis quando Dominus domus veniet, ne cum repente venerit inveniet vos Dormientes: quae dico vobis, omnibus dico, Vigilate," (Marcus 13:35-37)
Virgines, morante Sponso, Dormiverunt et Obdormiverunt; et quinque stultae venientes dixerunt, Domine aperi nobis: sed respondebit Dominus, Non novi vos; "Vigilate ergo, quia neque illum diem, neque illam horam scitis, qua Filius Hominis veniet," (Matthaeus 25:1-13).
Quia Adventus Domini vocatur "Mane (151), et tunc aperiuntur vera, et fit lux, ideo Illud tempus vocatur "Principium Vigiliarum," (Threni 2:19);
Ac Dominus vocatur "Vigil," (Daniel 4:10 (B.A. 13));
et dicitur apud Esajam,
"Vivent mortui tui, Evigilate habitatores pulveris," (26:19).
Quod autem status hominis, qui non in veris est, dicatur "Dormitio" et "Somnus," videatur, (Jeremias 51:39, 57; Psalm. 13:4 (B.A. 3); 76:7 (B.A. 6)); Matthaeus 13:25; 2 et alibi).
Footnotes:
