899. "Habentem portas duodecim," significat ibi omnes cognitiones veri et boni, per quas homo introducitur in Ecclesiam. -Per "portas" significantur cognitiones veri et boni ex Verbo, quia per illas homo introducitur in Ecclesiam; "murus" enim in quo portae erant, significat Verbum, de quo mox supra (898); et in sequentibus dicitur, quod "duodecim portae duodecim margaritae essent, unaquaevis portarum una margarita," (vers. 21); et per "margaritas" significantur cognitiones veri et boni (727); quod homo per illas introducatur in Ecclesiam, sicut per portas in urbem, patet: quod "duodecim" significent omnes, videatur supra (348). Per "portas" significantur cognitiones veri et boni, etiam in his locis:

"Fundamenta tua ponam in sapphiris, et ponam pyropum soles tuos, et Portas tuas in lapides carbunculi," (Esaias 54:11-12);

"Amans Jehovah Portas Zionis prae omnibus habitaculis Jacobi; gloriosa praedicanda sunt ¹ in te, Urbs Dei," (Psalm. 87:2(, 3));

"Intrate per Portas Ipsius in confessione, confitemini Ipsi, benedicite Nomini Ipsius "(Psalm. 100:4);

"Stantes fuerunt pedes nostri in Portis tuis, Hierosolyma; Hierosolyma aedificata sicut Urbs quae cohaeret una," (Psalm. 122:2-3);

"Lauda Hierosolyma Jehovam, nam firmat vectes Portarum tuarum, benedicit filiis tuis in medio tui," (Psalm. 147:12-13);

"Ut enumerem omnes laudes tuas in Portis filiae Zionis," (Psalm. 9:15 (B.A. 14));

"Aperite Portas, ut ingrediatur Gens justa custodiens fidelitates," (Esaias 26:2); ²

"Extollite vocem ut veniant Portae principum," (Esaias 13:2);

"Beati qui faciunt mandata Ipsius, et per Portas ingrediuntur in Urbem," (Apocalypsis 22:14);

"Attolite Portae capita vestra, ut ingrediatur Rex gloriae," (Psalm. 24:7, 9);

"Viae Zionis lugentes, omnes Portae ejus devastatae sunt, sacerdotes ejus gemunt," (Threni 1:4);

"Luxit Jehudah, et portae ejus languescentes factae sunt," (Jeremias 14:12); ³

"Cogitavit Jehovah perdere Murum filiae Zionis, subsederunt in terram Portae ejus," (Threni 2:8-9);

'Qui peccare faciunt hominem in Verbo, et corripientem in Porta illa queant, (Esaias 29:21);

"Elegit deos novos, tunc oppugnare coepit Portas," (Judicum 5:8).

(Praeter alibi, ut Esaias 3:25-26; 14:31; 22:7; 24:12; 28:6; 62:10; Jeremias 1:15; 15:7; 31:38, 40; Micham 2:13; Nahum 3:13; Judicum 5:11).

Quoniam "portae" significabant vera introducentia, quae sunt cognitiones ex Verbo, ideo Seniores Urbis sedebant in Portis et judicabant (Ut patet ex Deuteronomius 21:18-21; ⁴ 22:15; Threni 5:14; Amos 5:12, 15; Sacharias 8:16).

Footnotes:

898. (Vers. 12) "Habentem murum magnum et altum," significat Verbum in Sensu literae ex quo doctrina Novae Ecclesiae. -Cum per "urbem sanctam Hierosolymam" intelligitur Nova Domini Ecclesia quoad doctrinam, per "murum" ejus non aliud intelligitur quam Verbum in Sensu literae, ex quo doctrina; ille enim Sensus tutatur Sensum spiritualem, qui intus latet, sicut murus urbem et habitatores ejus. Quod Sensus literae sit basis, continens et firmamentum Sensus spiritualis ejus, videatur in Doctrina Novae Hierosolymae de Scriptura Sacra 27-36; quodque ille Sensus sit custodia, ne Divina Vera interiora, quae sunt Sensus spiritualis ejus, laedantur (97 ibi); tum quod Doctrina Ecclesiae ex Sensu literae Verbi haurienda sit, et per illum confirmanda (50-61 ibi). Dicitur "murus magnus et altus," quia intelligitur Verbum quoad Divinum Bonum et Divinum Verum; "magnum" enim praedicatur de bono, et "altum" de vero, ut supra (896). Per "murum" significatur id quod tutatur, et ubi de Ecclesia, significatur Verbum in Sensu literae etiam in sequentibus locis:

"Super Muros tuos, Hierosolyma, constitui custodes; die et nocte non tacebunt, commemorantes Jehovam," (Esaias 62:6); "Vocabunt te Urbem Jehovae, Zionem Sancti Israelis; et vocabis salutem Muros tuos, et portas tuas laudem," (Esaias 60:14, 18);

Jehovah erit "in Murum ignis circum, et in gloriam in medio ejus," (Sacharias 2:9 (B.A. 5));

"Filii Arvadi super Muris tuis, et Gammadaei suspenderunt scuta sua super Muris circumcirca, et perfecerunt pulchritudinem tuam," (Ezechiel 27:11);

haec de Tyro, per quam significatur Ecclesia quoad cognitiones veri ex Verbo.

"Discurrite per plateas Hierosolymae, et videte si sit quaerens veritatem; ascendite in Muros ejus, et dejicite," (Jeremias 5:1, 10);

"Cogitavit Jehovah perdere Murum filiae Zionis; lugere fecit Antemurale et Murum, simul languent; non lex et prophetae," (Threni 2:8-9);

"In Urbe discurrent, in Muro current, in domos ascendent, per fenestras ingredientur," (Joel 2:9);

haec de falsificationibus veri.

"Interdiu et noctu circumeunt impii in urbe, super Muris ejus, perditiones in medio ejus," ¹ (Psalm. 55:11-12 (B.A. 10-11)).

(Praeter alibi, ut Esaias 22:5; 56:5; Jeremias 1:15; Ezechiel 27:11; Threni 2:7).

Quod Verbum in Sensu literae per "murum" significetur, patet clare ex sequentibus hujus capitis, quod de muro, ejus portis, fundamentis et mensuris multum agatur; causa est, quia Doctrina Novae Ecclesiae, quae per "urbem" significatur, unice est ex Sensu literae Verbi.

Footnotes: