240. Quod autem "nudus" significet illos qui absque intellectu veri quia absque voluntate boni, constat etiam ex locis in Verbo ubi "nudus" et "nuditas" nominatur, quae infra adducentur.

Quod "nudus" et "nuditas" illa significent, est quia "vestimenta" significant vera quae intellectus; et qui absque veris est is quoque absque bono est, nam omne bonum spirituale comparatur per vera; bonum spirituale absque illis seu nisi per illa non datur; bonum spirituale est charitas. "Nudus" et "nuditas" significant deprivatum seu deprivationem ab intelligentia et ab amore, ita ab intellectu boni et a voluntate ejus, etiam ex causa, quia vestes tegunt corpus et carnem; et per "corpus" et "carnem" significatur bonum, inde per "vestes" significantur illa quae tegunt bonum.

[2] Est intellectus veri et est intellectus boni; intellectus veri est intellectus talium quae fidei sunt, ac intellectus boni est intellectus talium quae amoris et charitatis sunt. Est quoque voluntas veri et voluntas boni; voluntas veri est apud illos qui e spirituali regno Domini sunt, voluntas autem boni est apud illos qui e regno caelesti Domini sunt. Hi quia in amore in Dominum et inde in amore mutuo, qui illis est charitas erga proximum, vera habent inscripta cordibus suis, et inde faciunt illa; et quod procedit ex corde est ex voluntate boni; "cor" est voluntas boni. At illi qui in amore erga proximum sunt, qui amor est charitas, non habent vera inscripta cordibus, sed memoriae et inde menti intellectuali; et quod inde procedit ex affectione est voluntas veri. Ita distinguuntur angeli spirituales ab angelis caelestibus. Hi nudi apparent in caelo, illi autem vestiti. Causa quod angeli caelestes nudi appareant est quia non opus habent memoria retinere vera, nec intellectu inde comprehendere illa, quia habent inscripta cordi, hoc est, amori et voluntati, ac inde vident illa: at quod angeli spirituales vestiti appareant, est quia habent vera inscripta memoriae et inde intellectui, ac vera memoriae et inde intellectus sunt quae correspondent vestibus, quare omnes ex illis vestiti apparent secundum intelligentiam. (Quod angeli ita vestiantur, videantur in opere De Caelo et Inferno 177-182.) Ex his constare potest quid "nudus" significat in utroque sensu; nempe quod in uno significet illos qui in bono caelesti sunt, in altero autem illos qui non in bono sunt quia non in veris.

[3] Sed haec melius videri possunt ex locis in Verbo ubi "nudus" ac "nuditas" nominantur, quae loca sunt sequentia:

- Apud Esaiam,

Dixit Jehovah Prophetae, "Exue saccum desuper lumbis tuis, et calceum tuum exue desuper pede tuo: et fecit ita Tunc dixit Jehovah, Sicut ivit servus meus Jeschajah nudus et discalceatus sic ducet rex Aschuris captivitatem Aegypti, et turbam deportandam Kuschi, pueros et senes, nudum et discalceatum, et detectos nates, nuditatem Aegypti" (20:2-4):

quid ecclesiae et caeli in his reconditum latet, nemo videre potest nisi sciat sensum eorum spiritualem; in Verbi enim singulis aliquid ecclesiae et caeli inest, quia Verbum est spirituale; quare explicabitur. Per "prophetam" hic intelligitur doctrina ecclesiae; per "exuere saccum desuper lumbis" seu nudos sistere lumbos, intelligitur revelare spurcos amores; per "saccum" solennem prophetae hic intelliguntur femoralia quae tegunt, et per "lumbos" significantur illi amores; per "exuere calceum desuper pede", seu discalceare plantas pedis, significatur revelare foeda naturae; per quod "rex Aschuris ducet captivitatem Aegypti, et turbam deportandam Kuschi", intelligitur quod perversum rationale confirmabit mala et falsa per scientifica et per fallacias; per "pueros et senes" intelligitur per omnia, tam communia quam particularia; per "nudum et discalceatum" intelliguntur deprivati ab omni vero et ab omni bono; per "detectos nates" intelliguntur mala amoris sui; per "nuditatem Aegypti" intelliguntur falsa inde. Inde patet de qua re ecclesiae et caeli hic agitur; quod nempe de eo, quod perversum rationale, quod est rationale quod negat Deum et Naturae omnia tribuit, confirmet se per scientifica et per fallacias, usque ut sit absque omni intellectu veri et voluntate boni. (Quod per "prophetam" in Verbo intelligatur doctrina, videatur n. 2534, 7269; quod per "lumbos" amores in utroque sensu, n. 3021, 4280, 5059; quod per "pedes", naturalia apud hominem, et per "plantas pedum" illa quae in ultimis, n. 2162, 3147, 3761, 3986, 4280, 4938-4952; quod per "calceos", eadem illa quoad tegumentum eorum, n. 1748, ¹ 2162, (4835,) 6844; quod per "regem Aschuris", rationale in utroque sensu, n. 119, 1186; quod per "Aegyptum", scientificum quod naturalis hominis etiam in utroque sensu, bono et malo, n. 1164, 1165, 1186, 1462, 5700, 5702, 6015, 6651, 6679, 6683, 6692, 7296, 9340, 9391; quod per "Kuschum" fallaciae sensuum, n. 1163, 1164, 1166.)

[4] Apud Ezechielem,

"Cum praeterivi praeter te et vidi te operui nuditatem tuam et lavi te, ... et vestivite:... sed cum confisa es pulchritudini tuae, et scortata es, ... non recordata ² dierum juventutis tuae, cum esses nuda et denudata;... scortata es cum filiis Aegypti... et cum filiis Aschuris, ... et multiplicasti scortationem tuam usque ad Chaldaeam;... propterea revelata est nuditas tua per scortationes tuas;... ideo lapidabunt te lapide, et dissecabunt te gladiis, et accendent domos tuas igne" (16:6, seq.):

agitur ibi de Hierosolyma, per quam intelligitur ecclesia quoad doctrinam; et per illa verba et per plura in eodem capite describitur qualis fuerat in principio, et qualis facta est cum deflexit a bono et a vero. Qualis instaurata fuit a Domino, ita qualis in principio, describitur per haec, "Cum praeterivi praeter te et vidi... operui nuditatem tuam, ... lavi te... et vestivi te"; "operire nuditatem" significat amovere mala voluntatis et falsa intellectus, "lavare" significat purificare a malis, et "vestire" significat veris instruere. Qualis autem facta est cum deflexit a bono et vero, describitur per sequentia; quod "confisa sit pulchritudini suae", significat intelligentiam ex proprio quod ea delectata fuerit; per quod "scortata sit", significat quod sic imbuerit falsitates; per "scortari cum filiis Aegypti et cum filiis Aschuris", significantur falsificationes confirmatae per scientifica et inde rationalia; per "multiplicare scortationem usque ad Chaldaeam", significatur usque ad profanationem veri: inde patet quid significat "propterea revelata est nuditas tua per scortationes tuas", quod nempe ecclesia per falsa et per falsificationes deprivata sit omni intellectu veri: per "lapidabunt te lapide" significatur quod moritura sit per falsa; per "dissecabunt te gladiis", significatur quod prorsus moritura per falsificationes veri; et per "accendent domos tuas igne", significatur quod tota peritura sit per amores infernales ("domus" sunt omnia quae apud hominem, et "ignis" est amor infernalis). Ex his patet quid caeli et ecclesiae continetur in illis verbis, et quod ³ illud solum appareat ex sensu spirituali.

(Quod "lavare" significet purificare a malis et falsis, videatur n. 3147, 10237, 10240, 10243; quod "vestire" significet instruere veris, n. 1073, 2576, 5248, 5319, 5954, 9212, 9216, 9952, 10536:

quod "pulchritudo" significet intelligentiam, n. 3080, 4985, 5299; hic intelligentiam ex proprio: quod "scortari", imbuere falsa, supra, n. 141:

quod "Aegyptus" scientificum, et "Aschur" rationale, videatur mox supra; quod " Chaldaea" profanationem veri, n. 1182, 1283, 1295, 1304, 1306, 1307, 1308, 1321, 1322, 1326:

quod "lapidare lapide" significet mori per falsa, n. 5156, 7456, 8575, 8799; quod "gladius" significet falsum pugnans contra verum et destruens illud, n. 2799, 4499, 7102; inde "dissecare gladiis" est prorsus mori per falsificationes veri: quod "ignis" significet amorem infernalem, n. 1861, 5071, 6314, 6832, 7575, 10747; et quod "domus" significet totum hominem, et illa quae apud eum, ita quae ejus intellectus et voluntatis sunt, n. 710, ⁴ 2231, ⁵ 2233, ⁶ 2559, 3128, 3538, 4973, 5023, 6690, 7353, 7848, 7910, 7929, 9150. Inde patet quid significatur per "accendent domos tuas igne.")

[5] Apud Hoscheam,

"Contendite cum matre vestra, ... ut removeat scortationes, ... et adulteria sua, ... ne forte exuam eam nudam, ... et ponam eam sicut desertum, ... sicut terram siccitatis, et occidam eam per sitim, et filiorum ejus non miserebor, quia filii scortationum illi" (2:2-4):

etiam hic agitur de ecclesia lapsa in falsa et mala: "mater" cum qua contenderent, significat ecclesiam; "scortationes et adulteria" significant falsa et inde mala; "ponere illam sicut desertum, sicut terram siccitatis" significat absque bono et vero; "occidere eam per sitim", significat defectum totalem veri: "filii ejus" quorum "non miserebor", significant omnia falsa ejus in genere, quare vocantur "filii scortationum."

(Quod "mater" significet ecclesiam, videatur n. 289, 2691, 2717, 3703, 4157, ⁷ 5581, 8897; quod "desertum" significet non bonum quia non verum, n. 2708, 4736, 7055:

quod "terra siccitatis" significet ubi non verum, est qua "aqua" significat verum fidei, n. 2702, 3058, 5668, 8568, 10238; "occidi sit", quod significant perire ex defectu veri, n. 8568 fin. : quod "filii" significent affectiones veri et vera in genere, n. 2362, 3963, 6729, 6775, ⁸ 6779, 9055; ita in sensu opposito affectiones falsi et falsa in genere. Inde constare potest quid significatur per "exuere illam nudam", quod nempe ut sit absque bono et vero.)

[6] In Threnis,

"Peccatum peccavit Hierosolyma, ideo... omnes qui honoraverunt illam vilipendunt illam, quia viderunt nuditatem ejus" (1:8).

Apud Ezechielem,

Ohola, quae Samaria, scortata est cum Aegyptiis, cumque filiis Aschuris; illi revelarunt nuditatem ejus, filios ejus et filias ejus ceperunt, et illam gladio tandem occiderunt: "ideo dabo te in manum eorum quos odisti, ... ut agant tecum ex odio, et sument omnem laborem tuum. et te relinquent nudam et denudatam, ut reveletur nuditas scortationum tuarum" (23:4, 8-10, 18, 28, 29):

agitur in eo capite de Samaria quae vocatur "Ohola", et de Hierosolyma quae vocatur "Oholiba", et per utramque significatur ecclesia; per "Samariam" ubi filii Israelis, significatur ecclesia in qua non vera sed falsa, et per "Hierosolymam" ecclesia in qua non bona sed mala. Quid significatur per "scortari cum Aegyptiis et cum filiis Aschuris", et quid per "occidere filias et filios ejus gladio", supra explicatum est. Exinde patet quod per "relinquere illam nudam et denudatam" significetur absque vero et bono.

[7] Apud Esaiam,

"Dominus decalvabit verticem filiarum Zionis, et Jehovah podicem earum nudabit" (3:17):

"filiae Zionis significant ecclesiam caelestem et quae illius ecclesiae sunt, hic autem illam perversam; "vertex" illarum qui decalvabitur, significat intelligentiam qua deprivabitur; et "podex" qui nudabitur significat amorem mali et falsi.

[8] Apud Nahum,

"Vae urbi sanguinum, tota mendacio et rapina plena, ... prae multitudine scortationum ejus, ... retegam fimbrias super facies tuas, et ostendam gentibus nuditatem tuam, et regnis ignominiam" (3:1, 4, 5);

"urbs sanguinum" significat doctrinam falsi quae violentiam infert bono charitatis.

[9] Apud Habakuk,

"Vae facienti socium bibere, ... etiamque inebriando, ut introspicas nuditates eorum;... bibe etiam tu ut praeputium reveletur" (2:15, 16);

"facere socium bibere inebriando" significat imbuere falsis usque ut non videat verum; "introspicere nuditates" est ut appareant falsa quae intellectus et mala quae voluntatis; "ut praeputium reveletur" est ut amores spurci.

(Quod "bibere" sit institui in veris, videatur n. 3069, 3772, 4017, 4018, 8562, 9412; inde in opposito sensu est inbuere falsa: quod "inebriari "sit insanire ex falsis, ita non videre vera, n. 1072:

quod "praeputium" significet amores corporeos et terrestres, n. 4462, 7045.) Inde constare potest quid significatur per

Quod Noachus biberit vinum et inebriatus sit, ita ut jaceret nudus in medio tentorii sui: et quod Chamus riserit nuditatem patris sui;... (quod)schemus autem et Japhetus texerint nuditatem ejus, et quod facies suas averterint ut non viderent patris sui nuditatem (Genesis 9:21-23).

(Sed haec videantur in Arcanis Caelestibus explicata, ubi de illis agitur.)

[10] In Threnis,

"Etiam ad te", filia Edomi, "transibit calix, inebriaberis et nudaberis" (Threni 4:21):

hic simile per "inebriari et nudari" quod supra significatur (sed quinam illi sunt qui per "Edomum" intelliguntur, videatur n. 3322, 8314).

Apud Esaiam,

Filia Babelis et Chaldaeae, "sede in terra, ... sume molam et mole farinam, revela crines tuos, ... revela femur, transi flumina, reveletur nuditas tua, etiamque videatur opprobrium tuum" (47:1-3).

per "filiam Babelis" et "Chaldaeae" intelliguntur illi qui profanant bona et vera ecclesiae; per "molere farinam" intelligitur falsificare vera; per "revelare crines" et "femur", intelligitur deprivari intelligentia veri et voluntate boni; simile per "transire flumina" et "revelare nuditatem."

[11] Quia "nuditas" significabat deprivationem intellectus veri et voluntatis boni, ideo statutum fuit,

Quod Aharon et filii ejus (non) ascenderent in gradibus super altare, ne reveletur nuditas eorum super illo (Exodus 20:23 [B.A. 26]);

Tum quod illis facerent femoralia lini ad tegendum carnem nuditatis, et quod essent super illis cum intrarent tentorium conventus, et cum accederent ad altare, et quod alioqui portarent iniquitatem et morerentur (Exod 28:42, 43).

Ex his patet quid significatur per verba in sequenti versu in hoc capite, "Suadeo tibi emere a Me, ... vestimenta alba ut induaris, ne appareat pudor nuditatis tuae": tum in sequentibus hujus Libri Apocalypseos,

"Beatus qui vigilat, et servat Vestimenta sua, ne nudus ambulet et videantur pudenda ejus" (16:15).

[12] Praeterea per "nudum" in Verbo intelliguntur etiam illi qui non in veris sunt et inde non in bono, quoniam ignorant illa, et tamen desiderant illa; ut sunt qui intra ecclesiam sunt ubi illi qui. docent in falsis sunt, tum qui extra ecclesiam sunt et non Verbum habent, et inde non vera sciunt et nihil de Domino. Hi sunt qui intelliguntur in his locis:

- Apud Esaiam,

"Hoc jejunium quod eligo, ... frangere famelico panem, ... et cum videris nudum obtegere eum" (58:6, 7);

apud Ezechielem,

"Panem suum famelico det, et nudum tegat veste" (18:7);

et apud Matthaeum,

"Nudus fui et non induistis Me" (25:36, 38 (, 43, 44]);

"tegere veste" et "induere" significat instruere in veris (quod "vestes" sint vera, videatur supra, n. 195(c)).

(Quod "nudus" etiam significet bonum innocentiae, videatur in Arcanis Caelestibus, n. 165, 8375, 9060; et in opere De Caelo et Inferno 179, 180, 280.)

Footnotes:

6832. ‘In flamma ignis e medio rubi’: quod significet amorem Divinum in vero scientifico, constat ex significatione ‘flammae ignis’ quod sit amor Divinus, de qua sequitur; et ex significatione ‘rubi’ quod sit verum scientificum; quod ‘rubus’ sit verum scientificum, est quia omnes ‘arbusculae’ cujuscumque generis significant scientifica, ipsa autem ‘arboreta majora’ cognitiones et perceptiones; ‘rubus’ quia producit flores et bacas, significat verum scientificum. Verum scientificum Ecclesiae non aliud est quam Verbum in sensu litterae, et quoque omne repraesentativum et significativum Ecclesiae quod apud posteros Jacobi; haec in forma sua externa vocantur vera scientifica, at in forma interna sunt vera spiritualia; ¹ sed quia vera in forma interna, seu in forma spirituali, non apparere potuerunt posteritati ex Jacobo, ex causa quia in solis externis fuerunt et prorsus non scire voluerunt de aliquo interno; idcirco apparuit Dominus in rubo; Dominus enim cum apparet, secundum quale hominis apparet, nam homo non aliter recipit Divinum quam secundum quale suum; idcirco etiam cum Dominus apparuit super monte Sinai, apparuit populo ‘sicut ignis ardens usque ad cor caeli, et sicut tenebrae, ² nubes, et caligo’, Deut. 4:11, 5:19-22 [KJV 5:22-25], tum Exod. 19:18;

apparuisset prorsus aliter si populus qui sub monte aspectabat non talis fuisset; et quia populus ille modo in externis fuit, idcirco cum Moses intravit ad Dominum super monte Sinai, dicitur quod ‘intraverit in nubem’, Exod. 20:18, 24:2, 18, ³ 34:2-5;

quod ‘nubes’ sit externum Verbi, videatur Praefatio ad Gen. xviii, et n. 4060, 4391, 5922, 6343 fin. ; consequenter etiam repraesentativum Ecclesiae spectatum in forma externa.

[2] Quod Dominus appareat unicuique secundum quale ejus, constare potest ex eo quod Dominus appareat illis qui in intimo seu tertio caelo ut sol, ex quo lux ineffabilis, ex causa quia illi qui ibi in bono amoris in Dominum sunt; et quod appareat illis qui in medio seu secundo caelo ut luna, ex causa quia remotius et obscurius ibi in amore in Dominum sunt, sunt enim in amore erga proximum; in ultimo autem seu primo caelo non apparet Dominus ut sol nec ut luna, sed modo sicut lux, quae lux multum excedit lucem mundi; et quia Dominus apparet cuique secundum quale ejus, ideo etiam non apparere potest illis qui in inferno aliter quam sicut ⁴ furva nubes et caligo; nam ut primum lux caeli, quae a Domino, in aliquod infernum illabitur, fiunt ibi tenebrae et caligo ⁵ . Ex his nunc constare potest quod Dominus appareat unicuique secundum quale ejus quia secundum receptionem; et quia posteri ⁶ ex Jacobo erant solum in externis, idcirco apparuit Dominus Mosi in rubo, et quoque in nube cum intravit ad Dominum super monte Sinai.

[3] Quod ‘flamma’ sit amor Divinus, est quia amor in sua prima origine non aliud est quam ⁷ ignis ⁸ et flamma a Domino ut sole; solis hujus ignis seu flamma est quae dat esse vitae unicuique homini; et est ipse ignis vitalis, qui quod interiora hominis calore ⁹ impleat, constare potest ex amore, quantum enim amor crescit apud hominem, tantum homo calescit; et quantum amor decrescit, tantum frigescit; inde est quod cum Dominus apparuit in visione, ¹⁰ apparuerit sicut ignis et flamma; ut apud Ezechielem,

Aspectus quattuor animalium (quae fuerunt cherubi) sicut prunae ignis ¹¹ ardentes, juxta aspectum lampadum; is incedens inter animalia, ut splendor ignis, et ex igne exiens fulgur: supra expansum quod super capite eorum, quasi aspectus lapidis sapphiri, similitudo throni, et super similitudine throni similitudo quasi aspectus hominis super illo superius; et vidi speciem prunae ardentis juxta speciem ignis intra illam circumcirca, ab aspectu lumborum Ipsius et sursum, sed ab aspectu lumborum Ipsius et deorsum vidi quasi aspectum ignis, cui splendor circumcirca, 1:13, 26-28 ¹² ;

[4] quod singula in hac visione significativa et repraesentativa Divinorum sint, nullus negare potest, ¹³ sed nisi scitur quid significatur per ‘cherubos’, per ‘prunas ignis ardentis juxta aspectum lampadum’, per ‘thronum’, per ‘aspectum hominis super illo’, per ‘lumbos a quibus sursum et deorsum ignis, et ex igne splendor’, nusquam sciri potest sanctum arcanum quod inibi; quod ‘cherubi’ sint Providentia Domini, videatur n. 308; quod ‘thronus’ sit caelum, proprie Divinum Verum procedens a Domino quod format caelum, n. 5313; quod ‘aspectus hominis super throno superius’ sit Dominus quoad Divinum Humanum, patet; quod ‘lumbi’ sint amor conjugialis et inde omnis amor caelestis, n. 3021, 4277, 4280, 4575, 5050-5062; qui amor repraesentatus est ¹⁴ per ‘speciem prunae ardentis juxta speciem ignis cui splendor circumcirca’:

[5] apud Danielem,

Videns fui usque dum throni projecti ¹⁵ fuerunt, et Antiquus dierum sedit, vestis Ipsius sicut nix alba, et crinis capitis Ipsi sicut lana munda; thronus Ipsius flamma ignis; rotae Ipsius ignis ardens, flumen ignis emanans et exiens a coram Ipso, 7:9, 10;

Divinum Bonum Divini Amoris Domini etiam hic visum est ut flamma ignis ¹⁶ :

apud Johannem, Sedens super equo albo; oculi Ipsius sicut flamma ignis, Apoc. 19:[11, ] 12; quod ‘sedens super equo albo’ sit Dominus quoad Verbum, aperte ibi dicitur, vers. 13,, 1616;

ita ‘flamma ignis’ est Divinum Verum quod in Verbo, quod ex Divino Bono Domini:

apud eundem,

In medio septem candelabrorum similis Filio hominis, indutus talari, caput Ipsius et capilli albi sicut lana alba, sicut nix, sed oculi Ipsius sicut flamma ignis, Apoc. 1:13, 14;

hic quoque ‘oculi sicut flamma ignis’ est Divinum Verum procedens a Divino Bono Domini.

[6] Quod ‘flamma ignis’ sit Divinum Verum procedens a Domino, patet quoque apud Davidem,

Vox Jehovae illabens sicut flamma ignis, Ps. 29:7;

‘vox Jehovae’ pro Divino Vero. Ut repraesentaretur Divinum Verum procedens a Divino ¹⁷ Bono Domini, mandatum fuit ut candelabrum facerent ex puro auro cum septem lucernis, et quod poneretur in tentorio conventus ad mensam ubi panes propositionis, et quod lucernae arderent jugiter coram Jehovah, Exod. 25:31 ad fin. , ¹⁸ 37:17-24, 40:24, 25; Lev. 24:4; Num. 8:2; Sach. 4:2;

per ‘candelabrum cum septem lucernis’ repraesentabatur Divinum Verum procedens a Divino Bono Domini.

[7] Ut quoque repraesentaretur ipsum Divinum Bonum ¹⁹ , mandatum est ut ignis perpetuus esset super altari, Ignis super altari ardebit, ²⁰ et non ²¹ exstinguetur; sacerdos accendet super eo ligna sub auroris singulis: ignis jugiter ardebit super altari, ²⁰ et non exstinguetur, Lev. 6:5, 6 [KJV 12, 13].

Quod ‘ignis’ repraesentativum fuerit Divini Amoris, notissimum antiquis fuerit, ²² constare potest ex eo quod repraesentativum hoc emanaverit ab Antiqua Ecclesia usque ad ²³ gentes dissitas quae in cultu idololatrico fuerunt, quae quod ignem sacrum perennem instituerint, et ei praefecerint virgines quae vestales dictae sunt, notum est.

[8] Quod ‘ignis’ et ‘flamma’ in opposito sensu ²⁴ significent amores spurcos, sicut amores vindictae, crudelitatis, odii, adulterii, et in genere concupiscentias quae ex amoribus ²⁵ sui et mundi, constat etiam a pluribus locis in Verbo, quorum haec solum licet afferre:

apud Esaiam,

Ecce facti sunt sicut stipula, ignis adussit illos, non eripiunt animam suam e manu flammae; nulla pruna ad incalescendum, ignis ad sedendum coram eo, 47:14:

apud Ezechielem,

Ecce Ego incendam in te ignem, qui comedet in te omnem arborem viridem, et omnem arborem aridam, non exstinguetur flamma flammae gravis, unde comburentur omnes facies a meridie ad septentrionem, 21:3 [KJV 20:47];

hic per ‘ignem’ et ‘flammam’ ²⁶ significantur cupiditates mali et falsi quae exstinguunt omne bonum et verum Ecclesiae, inde hujus vastatio:

apud Lucam,

[9] Dives dixit ad Abrahamum, Pater Abraham, miserere mei, et mitte Lazarum ut intingat extremum digiti sui in aquam, et refrigeret linguam meam, quia crucior in flamma hac, 16:24;

qui non sciunt quod ignis vitalis apud hominem sit ex alia origine quam ignis elementaris, illi nequaquam aliter scire possunt quam quod per ‘ignem inferni’ intelligatur ignis qualis in mundo, cum tamen in Verbo non talis ignis intelligitur sed ignis qui est amoris, ita qui est vitae hominis, procedens a Domino ut Sole, qui ignis cum intrat apud illos qui in contrariis sunt, vertitur in ignem cupiditatum quae sunt, ut supra dictum, vindictae, odii, crudelitatis, scaturientes amore sui et mundi; hic ignis est qui cruciat illos qui in infernis, nam cum frenum laxatur cupiditatibus illorum, tunc ruit unus alterum, ac diris et ineffabilibus modis se mutuo cruciant; nam quisque supereminere vult et alteri auferre quae ejus sunt artibus occultis et apertis; cum haec cupit unus et alter, ²⁷ intestina ²⁸ odia inde existunt, et inde immanitates quae exercentur, imprimis per artes magicas et per phantasias, ²⁹ quae artes sunt innumerabiles et prorsus ignotae in mundo.

[10] Qui spiritualia non credunt, imprimis naturae cultores, nusquam possunt induci credere quod calor apud viventes, quae facit ipsam vitam internam, ex alia origine sit quam ex qua calor mundi, nam nequeunt scire, minus agnoscere, quod ignis caelestis sit procedens a Domino ut Sole, et quod ille Ignis sit purus amor; inde nec possunt scire innumerabilia quae in Verbo ubi non alius ignis intelligitur, nec scire possunt innumerabilia in homine, qui organum recipiens ejus est.

Footnotes: