Apocalypsis Revelata #437
437. "Et alarum (illarum) sicut vox curruum equorum multorum currentium in bellum," significat ratiocinia illorum sicut ex veris doctrinae e Verbo plene intellectis, pro quibus ardenter pugnandum est. - "Vox alarum" significat ratiocinia, quia "volare" significat percipere et instruere (245, 415); "currus" significant doctrinalia, de quibus sequitur; "equi" significant intellectum Verbi (298), et "equi multi" plenarium; quod "currere in bellum" significet ardorem pugnandi, patet. Quod "currus" significet doctrinam, constat ex his locis:
"Currus Dei sunt binae myriades, milleni pacificorum, Dominus in illis," (Psalm. 68:18 (B.A. 17));
"Jehovah ponit nubes Currus Suos, ambulat super alis venti," (Psalm. 104:3) 1
Jehovah, "equitas super equis Tuis, Currus Tui salus," (Habakuk 3:8);
"Ecce Jehovah in igne veniet, et sicut procella Currus Ipsius," (Esaias 66:15);
"Satiabimini super mensa Mea Equo et Curru; sic dabo gloriam Meam inter gentes," (Ezechiel 39:20(, 21));
"Exscindam Currum ex Ephraimo, et Equum ex Hierosolyma," (Sacharias 9:10); 2
"Evertam Thronum regnorum, evertam Currum, et equitantes in eo," (Haggaeus 2:22);
"Constitue speculatorem, qui spectet, nuntiet, vidit ergo Currum, par equitum, currum Cameli, et Currum viri, et dixit, Cecidit, cecidit Babel," (Esaias 21:6-7, 9). 3
Quoniam "Elias" et "Elisaeus" repraesentabant Dominum quoad Verbum, et inde significabant Doctrinam e Verbo, sicut omnes Prophetae (8), ideo vocati sunt "Currus Israelis et Equites ejus;"
et ideo Elias visus est in Caelum auferri in Curru ignis, et circum Elisaeum a puero ejus visi sunt Currus et equi ignei, (2 Regnum 2:11-12; 6:17; 4 13:14);
Praeter alibi, ubi "Currus" (ut Esaias 31:1; 37:24; 66:20; 5 Jeremias 17:25; 22:4; 46:2-3, 8-9; 50:37-38; 51:20-21; Ezechiel 26:7-8, 10-11; Daniel 11:40; Nahum 3:1-3; Joel 2:1-5). 6
Footnotes: