247. Quod ‘serpens super ventre ambularet’ sit quod sensuale non amplius posset spectare sursum ad caelestia ut prius, sed deorsum ad corporea et terrestria, constat inde quod antiquitus per ‘ventrem’ significata sint ea quae proxima terrae; per ‘pectus’ quae supra terram, et per ‘caput’ quae suprema; ita hic, quod sensuale, quod in se est infimum hominis quia se convertit: ad terrestre, quod ‘ambularet super ventre’. Hoc quoque in Ecclesia Judaica significatum est per depressionem ventris usque ad terram, et per conspersionem pulveris super caput;

apud Davidem ita, Quare facies Tuas occultas, oblivisceris miseriae nostrae, et oppressionis nostrae; quia incurvata est ad pulverem anima nostra, et adhaeret terrae venter noster; surge auxilium ¹ nobis, et redime nos propter misericordiam Tuam, Ps. 44:25-27 [KJV Ps. 44:24-26];

ubi quoque constat cum avertit homo se a facie Jehovae, quod adhaerescat pulveri et terrae ventre. Apud Jonam etiam per ventrem piscis magni in quem conjectus, significantur infera terrae; ut constat a prophetia apud eum, E ventre inferni clamavi, audivisti vocem meam, Jon. 2:3;

ubi ‘infernum’ pro terra infera.

Footnotes: