New Christian Bible Study

The Bible

 

Genesis 35

Study

   

1 Interea locutus est Deus ad Jacob : Surge, et ascende Bethel, et habita ibi, facque altare Deo qui apparuit tibi quando fugiebas Esau fratrem tuum.

2 Jacob vero convocata omni domo sua, ait : Abjicite deos alienos qui in medio vestri sunt, et mundamini, ac mutate vestimenta vestra.

3 Surgite, et ascendamus in Bethel, ut faciamus ibi altare Deo : qui exaudivit me in die tribulationis meæ, et socius fuit itineris mei.

4 Dederunt ergo ei omnes deos alienos quos habebant, et inaures quæ erant in auribus eorum : at ille infodit ea subter terebinthum, quæ est post urbem Sichem.

5 Cumque profecti essent, terror Dei invasit omnes per circuitum civitates, et non sunt ausi persequi recedentes.

6 Venit igitur Jacob Luzam, quæ est in terra Chanaan, cognomento Bethel : ipse et omnis populus cum eo.

7 Ædificavitque ibi altare, et appellavit nomen loci illius, Domus Dei : ibi enim apparuit ei Deus cum fugeret fratrem suum.

8 Eodem tempore mortua est Debora nutrix Rebeccæ, et sepulta est ad radices Bethel subter quercum : vocatumque est nomen loci illius, Quercus fletus.

9 Apparuit autem iterum Deus Jacob postquam reversus est de Mespotamia Syriæ, benedixitque ei

10 dicens : Non vocaberis ultra Jacob, sed Israël erit nomen tuum. Et appellavit eum Israël,

11 dixitque ei : Ego Deus omnipotens : cresce, et multiplicare : gentes et populi nationum ex te erunt, reges de lumbis tuis egredientur,

12 terramque quam dedi Abraham et Isaac, dabo tibi et semini tuo post te.

13 Et recessit ab eo.

14 Ille vero erexit titulum lapideum in loco quo locutus fuerat ei Deus : libans super eum libamina, et effundens oleum :

15 vocansque nomen loci illius Bethel.

16 Egressus autem inde, venit verno tempore ad terram quæ ducit Ephratam : in qua cum parturiret Rachel,

17 ob difficultatem partus periclitari cœpit. Dixitque ei obstetrix : Noli timere, quia et hunc habebis filium.

18 Egrediente autem anima præ dolore, et imminente jam morte, vocavit nomen filii sui Benomi, id est, Filius doloris mei : pater vero appellavit eum Benjamin, id est, Filius dextræ.

19 Mortua est ergo Rachel, et sepulta est in via quæ ducit Ephratam, hæc est Bethlehem.

20 Erexitque Jacob titulum super sepulchrum ejus : hic est titulus monumenti Rachel, usque in præsentem diem.

21 Egressus inde, fixit tabernaculum trans Turrem gregis.

22 Cumque habitaret in illa regione, abiit Ruben, et dormivit cum Bala concubina patris sui : quod illum minime latuit. Erant autem filii Jacob duodecim.

23 Filii Liæ : primogenitus Ruben, et Simeon, et Levi, et Judas, et Issachar, et Zabulon.

24 Filii Rachel : Joseph et Benjamin.

25 Filii Balæ ancillæ Rachelis : Dan et Nephthali.

26 Filii Zelphæ ancillæ Liæ : Gad et Aser : hi sunt filii Jacob, qui nati sunt ei in Mesopotamia Syriæ.

27 Venit etiam ad Isaac patrem suum in Mambre, civitatem Arbee, hæc est Hebron, in qua peregrinatus est Abraham et Isaac.

28 Et completi sunt dies Isaac centum octoginta annorum.

29 Consumptusque ætate mortuus est : et appositus est populo suo senex et plenus dierum : et sepelierunt eum Esau et Jacob filii sui.

   

From Swedenborg's Works

 

Apocalypsis Explicata #660

Study this Passage

  
/ 1232  
  

660. [Vers. 10.] "Et habitantes super terra gaudebunt super illis et laetabuntur." - Quod significet jucunda ex amore infernali apud illos qui contra bona et vera ecclesiae, constat ex significatione "habitantium super terra", quod sint qui in ecclesia; hic qui in malis et inde falsis ibi, ita qui contra bona et vera ejus: et ex significatione "gaudere et laetari", quod hic sit jucundum amoris infernalis; omne enim gaudium et omnis laetitia est amoris, quisque enim gaudet et laetatur quando favetur ejus amori, et quando assequitur et obtinet quod amat; verbo, omne gaudium hominis procedit ex amore ejus, et omnis tristitia et dolor animi ex oppugnatione amoris.

[2] Quod dicatur "gaudere et laetari", est propter conjugium boni et veri; "gaudium" enim praedicatur de bono quia de amore, est enim proprie cordis et voluntatis, et "laetitia" praedicatur de vero quia de ejus amore, est enim proprie animi et ejus cogitationis; quare dicitur "gaudium cordis" et "laetitia animi": sunt enim ubivis in Verbo binae expressiones, quarum una se refert ad bonum et altera ad verum, et hoc quia conjunctio boni et veri facit et caelum et ecclesiam; inde tam caelum quam ecclesia comparatur conjugio, ex eo, quod Dominus dicatur Sponsus et Maritus, et caelum ac ecclesia sponsa et uxor; quapropter omnis qui non in illo conjugio est, non est angelus caeli, nec est homo ecclesiae: causa etiam est, quia bonum apud neminem datur nisi formatum per vera, nec verum apud aliquem datur nisi quod vivit ex bono; omne enim verum est forma boni, et omne bonum est esse veri; et quia unum absque altero non datur, sequitur quod conjugium boni et veri necessario esse debeat apud hominem ecclesiae sicut apud angelum caeli: omnis etiam intelligentia et sapientia est ex illo conjugio; nam ex illo nascuntur jugiter vera et bona, ex quibus formatur intellectus et voluntas.

[3] Haec dicta sunt ut sciatur cur dicitur "gaudere et laetari", quod nempe quia "gaudere" dicitur de bono ac de ejus amore seu affectione, et "laetari" de vero ac de ejus amore seu affectione; ut quoque pluries alibi in Verbo, ut in his locis: –

"Laetabuntur caeli, et gaudebit terra" (Psalmuss 96:11)

"Gaudeant et laetentur in Te omnes quaerentes Te" (Psalmuss 40:17 [B.A. 16] ; Psalmuss 70:54]);

"Justi laetabuntur et exultabunt coram Deo, et gaudebunt in laetitia" (Psalmuss 68:4 [B.A. 3]);

"Ut gaudeamus omnibus diebus nostris, laetifica nos juxta dies, afflixisti nos" (Psalmuss 90:14, 15);

"Laetamini in Hierosolyma, et exultate in ea, omnes amantes illam; gaudete cum ea gaudium, omnes lugentes super ea" (Esaias 66:10);

"Gaude et laetare, filia Edomi" (Threni 4:21);

"Ecce gaudium et laetitia occidere bovem" (Esaias 22:13);

"Gaudium et laetitia assequentur, fugient tristitia et gemitus" (Esaias 35:10; 51:11);

"Gaudium et laetitia invenietur in" Zione, "confessio et vox cantus" (Esaias 51:3);

"Audire 1 facies me gaudium et laetitiam" (Psalmuss 51:10 [B.A. 8]);

"Excisum est e domo Dei nostri laetitia et gaudium" (Joel 1:16);

"Jejunium decimi erit domui Jehudae in gaudium et in laetitiam" (Sacharia 8:19);

"Vox gaudii et vox laetitiae, et vox sponsi et vox sponsae" (Jeremias 7:34; 25:10; 33:11)

[4] Loco "gaudii" etiam dicitur "exultatio", quia "exultatio" similiter ac "gaudium" dicitur de bono, quia de amore, decorde et de voluntate; ut in sequentibus locis: –

"Exultabit Jacob, laetabitur Israel" (Psalmuss 14:7; Psalmuss 53:7 [B.A. :6]);

"Exulto et laetor in benignitate tua" (Ps. 31:8 2 7]);

"Laetamini in Jehovah, et exultate justi" (Psalmuss 32:11);

"Laetabitur mons Zionis, et exultabunt filiae Jehudae" (Psalmuss 48:12 [B.A.11]);

"Laetentur omnes confidentes in Te, et exultent in Te amantes nomen tuum" (Psalmuss 5:12 [B.A. 11]);

"Hic dies quem fecit Jehovah, exultemus et laetemur in eo" (Psalmuss 118:24);

"Exultemus et laetemur in salute Ipsius" (Esaias 25:9);

"Laetamini et exultate in aeternum super iis quae creo" ( 3 Esai. 65:18);

"Exulta et laetare, quod magnificaverit Jehovah faciendo" (Joel 2:21);

"Filii Zionis, exultate et laetamini in Jehovah Deo vestro" (Joel 2:23; Hab. 3:18 4 );

"Laetare et exulta ex omni corde, filia Hierosolymae" (Zephanias 3:14);

"Ablata est laetitia et exultatio de Carmele" (Esaias 16:10; Jeremias 48:33);

Dixit angelus ad Zachariam, "Erit tibi laetitia et exultatio, et multi super nativitate ejus gaudebunt" (Luca 1:14):

in omnibus his locis "exultatio" significat jucundum ex amore et affectione boni, ac "laetitia" amoenum ex amore et affectione veri.

Footnotes:

1. The editors made a correction or note here.
2. The editors made a correction or note here.
3. The editors made a correction or note here.
4. The editors made a correction or note here.

  
/ 1232  
  

The Bible

 

3 Regum 14:20

Study

       

20 Dies autem, quibus regnavit Jeroboam, viginti duo anni sunt : et dormivit cum patribus suis : regnavitque Nadab filius ejus pro eo.

©2024 New Christian Bible Study Corporation. All rights reserved. Printed from newchristianbiblestudy.org