3096. ‘Et currebat adhuc ad puteum’: quod significet affectionem veri inferiorem, constat a significatione ‘putei’ quod sit verum, de qua n. 2702, sed verum quod inferius est; et quia de initiatione veri hic agitur, significatur affectio inferior veri, ut nunc supra n. 3094 dictum; quae differentia significationis fontis et ‘putei’ sit in sensu interno, videatur in loco citato, quod nempe ‘fons’ dicatur cum agitur de puriore et cum de superiore vero, ‘puteus’ autem cum de non ita puro et cum de inferiore vero, ut quoque in hoc capite, in quo nunc dicitur fons, nunc puteus; naturale verum est inferius verum, et affectio veri naturalis est affectio veri inferior; ex hac illustrantur proxime scientifica communia, quae illustratio quod penetret ulterius et afficiat penitius, videatur n. 3094.