3208. Vers. 66, 67. Et narrabat servus Jishako omnia verba quae fecit. Et introduxit illam Jishak in tentorium Sarae matris suae; et accepit Rebeccam, et erat ei in mulierem, et amavit illam; et consolatus est Jishakus post matrem suam. ‘Narrabat servus Jishako omnia verba quae fecit’ significat perceptionem ex Divino Naturali quomodo se res haberet: ‘et introduxit illam Jishak in tentorium Sarae matris suae’ significat sanctuarium veri in Divino Humano: ‘et accepit Rebeccam, et erat ei in mulierem, et amavit illam’ significat conjunctionem: ‘et consolatus est Jishakus post matrem suam’ significat statum novum.