New Christian Bible Study

The Bible

 

Ezechiel 29

Study

   

1 In anno decimo, decimo mense, undecima die mensis, factum est verbum Domini ad me, dicens :

2 Fili hominis, pone faciem tuam contra Pharaonem regem Ægypti, et prophetabis de eo, et de Ægypto universa.

3 Loquere, et dices : Hæc dicit Dominus Deus : Ecce ego ad te, Pharao rex Ægypti, draco magne, qui cubas in medio fluminum tuorum, et dicis : Meus est fluvius, et ego feci memetipsum.

4 Et ponam frenum in maxillis tuis, et agglutinabo pisces fluminum tuorum squamis tuis, et extraham te de medio fluminum tuorum, et universi pisces tui squamis tuis adhærebunt.

5 Et projiciam te in desertum, et omnes pisces fluminis tui : super faciem terræ cades ; non colligeris, neque congregaberis : bestiis terræ et volatilibus cæli dedi te ad devorandum.

6 Et scient omnes habitatores Ægypti quia ego Dominus, pro eo quod fuisti baculus arundineus domui Israël :

7 quando apprehenderunt te manu, et confractus es, et lacerasti omnem humerum eorum : et innitentibus eis super te comminutus es, et dissolvisti omnes renes eorum.

8 Proptera hæc dicit Dominus Deus : Ecce ego adducam super te gladium, et interficiam de te hominem et jumentum.

9 Et erit terra Ægypti in desertum et in solitudinem : et scient quia ego Dominus, pro eo quod dixeris : Fluvius meus est, et ego feci eum.

10 Idcirco ecce ego ad te, et ad flumina tua : daboque terram Ægypti in solitudines, gladio dissipatam, a turre Syenes usque ad terminos Æthiopiæ.

11 Non pertransibit eam pes hominis, neque pes jumenti gradietur in ea, et non habitabitur quadraginta annis.

12 Daboque terram Ægypti desertam in medio terrarum desertarum, et civitates ejus in medio urbium subversarum, et erunt desolatæ quadraginta annis : et dispergam Ægyptios in nationes, et ventilabo eos in terras.

13 Quia hæc dicit Dominus Deus : Post finem quadraginta annorum congregabo Ægyptum de populis in quibus dispersi fuerant.

14 Et reducam captivitatem Ægypti, et collocabo eos in terra Phathures, in terra nativitatis suæ, et erunt ibi in regnum humile.

15 Inter cetera regna erit humillima, et non elevabitur ultra super nationes, et imminuam eos ne imperent gentibus.

16 Neque erunt ultra domui Israël in confidentia, docentes iniquitatem ut fugiant, et sequantur eos : et scient quia ego Dominus Deus.

17 Et factum est in vigesimo et septimo anno, in primo, in una mensis : factum est verbum Domini ad me, dicens :

18 Fili hominis, Nabuchodonosor rex Babylonis servire fecit exercitum suum servitute magna adversum Tyrum : omne caput decalvatum, et omnis humerus depilatus est : et merces non est reddita ei, neque exercitui ejus, de Tyro, pro servitute qua servivit mihi adversus eam.

19 Propterea hæc dicit Dominus Deus : Ecce ego dabo Nabuchodonosor regem Babylonis in terra Ægypti : et accipiet multitudinem ejus, et deprædabitur manubias ejus, et diripiet spolia ejus : et erit merces exercitui illius,

20 et operi quo servivit adversus eam : dedi ei terram Ægypti pro eo quod laboraverit mihi, ait Dominus Deus.

21 In die illo pullulabit cornu domui Israël, et tibi dabo apertum os in medio eorum, et scient quia ego Dominus.

   

From Swedenborg's Works

 

Arcana Coelestia #7293

Study this Passage

  
/ 10837  
  

7293. ‘Erit in serpentem aqueum’: quod significet per id quod merae fallaciae et inde falsa regnabunt apud illos, constat ex significatione ‘serpentis’ quod sit sensuale et corporeum, de qua n. 6949, inde fallaciae, nam sensuale et corporeum separatum a rationali, hoc est, non ei subordinatum, plenum est fallaciis, in tantum ut vix aliud sint quam fallaciae, videatur n. 6948, 6949. Est ‘serpens aqueus’ qui hic significatur, nam in lingua originali hic serpens 1 per eandem vocem exprimitur 2 per quam balaena, quae est piscis maximus maris, et balaena 3 significat 4 scientificum in communi 5 ; cum 6 itaque per Aegyptios significantur falsa ex fallaciis, 7 vox illa significat serpentem, 8 nempe aqueum, quia est pro balaena quae in aquis et quia aquae Aegypti sunt falsa.

[2] Quod Pharao seu Aegyptus dicatur ‘balaena’, constat apud Ezechielem,

Loquere et dic, Sic dixit Dominus Jehovih, Ecce Ego contra te Pharao, rex Aegypti, balaena magna, 9 quae cubat in medio fluviorum suorum, 29:3:

apud eundem,

10 Fili hominis, tolle lamentationem super Pharaonem regem Aegypti, et dic ad illum, Leoni gentium juveni similis factus es; tuque sicut balaenae in maribus, et prodiisti cum fluminibus tuis, conturbasti flumina tua, 32:2;

ibi per ‘balaenam’ significantur scientifica in communi per quae, quia ex sensuali homine, illa quae fidei sunt pervertuntur; quod ‘balaena’ 11 sit scientificum in communi, est quia piscis est scientificum in particulari, n. 40, 991; et quia ‘balaenae’ significant scientifica pervertentia 12 vera fidei, etiam per illas significantur ratiocinia ex fallaciis, unde falsa;

[3] ea significantur per ‘balaenas’ apud Davidem,

Tu 13 perrupisti robore Tuo mare, fregisti capita balaenarum super aquis, Ps. 74:13: similia etiam per ‘Leviathanem’ apud Esaiam,

In die illo visitabit Jehovah gladio Suo duro, et magno, et forti, super Leviathanem serpentem oblongum, et super Leviathanem serpentem tortuosum, et occidet balaenas quae in mari, 27:1:

et apud Davidem,

Confregisti capita Leviathanis, dedisti illum cibum populo Ziim, Ps. 74:14;

‘Leviathan’ in bono sensu pro ratione ex veris, apud Hiobum, 40:25-32 [KJV 41:1-8] et 41:1-26 [KJV 41:9-34]; ratio ex veris est in opposito ratiociniis ex falsis.

[4] Et quia per ‘balaenas’ significantur ratiocinia ex fallaciis pervertentia 14 vera, per ‘serpentes aqueos’, qui eadem voce in lingua originali exprimuntur, significantur ipsa falsa ex fallaciis, ex quibus ratiocinia, et per quae perversiones; 15 falsa per illos serpentes in sequentibus locis significantur:

apud Esaiam,

Respondebunt 16 jim in palatiis ejus, et serpentes in palatiis deliciarum, 13:22:

apud eundem,

Ascendent in palatia ejus spinae, carduus et sentis in munitiones ejus, ut sit habitaculum serpentum, atrium filiabus noctuae, 34:13:

apud eundem,

In habitaculo serpentum cubile ejus, gramen pro calamo et junco, 35:7:

apud Jeremiam,

Dabo Hierosolymam in acervos, habitaculum serpentum, 9:10 [KJV 11]:

apud Malachiam, Posui montes Esavi vastitatem, et hereditatem ejus serpentibus deserti, 1:3;

[5] in his locis ‘serpentes’ pro falsis ex quibus ratiocinia; eadem quoque per ‘dracones’ significantur, sed ‘dracones’ sunt ratiocinia ex amoribus sui et mundi, ita ex cupiditatibus mali, quae non solum pervertunt 17 vera sed etiam bona; quae ratiocinia prodeunt ex illis qui corde negant vera et bona fidei, sed ore propter libidinem imperandi et lucrandi illa confitentur, ita quoque ex illis 18 qui vera et bona profanant 19 ; hi et illi per ‘draconem, serpentem antiquum, qui vocatur diabolus et satanas, qui seducit totum terrarum orbem’, Apoc. 12:9, intelliguntur; et quoque per eundem, nempe ‘draconem’ qui persecutus est mulierem quae peperit filium raptum ad Deum et ad thronum Ipsius, ' ibid. vers. 5, et qui ‘ejecit ex ore suo aquam sicut fluvium, ut mulierem absorberet’, ibid. vers. 13, 15, 15;

[6] ‘filius quem mulier peperit’ est Divinum Verum hodie detectum, ‘mulier’ est Ecclesia, ‘draco serpens’ sunt qui persecuturi, ‘aqua sicut fluvius quam draco ejiceret’ sunt falsa ex malo et inde ratiocinia per quae conaturi mulierem, hoc est, Ecclesiam, destruere; sed quod nihil effecturi sint, describitur per ‘quod adjuverit terra mulierem, et aperuerit terra os suum et deglutiverit fluvium quem ejecit draco’ ibid. vers. 16

Footnotes:

1. The Manuscript places this after exprimitur.

2. quae etiam significat balaenam

3. The Manuscript inserts cum de Aegyptiis agitur, .

4. scientifica

5. The Manuscript inserts Arcana Coelestia 42

6. autem

7. The Manuscript inserts tunc.

8. The Manuscript inserts hic.

9. qui

10. The editors of the third Latin edition made a minor correction here. For details, see the end of the appropriate volume of that edition.

11. sint scientifica

12. verum

13. The editors of the third Latin edition made a minor correction here. For details, see the end of the appropriate volume of that edition.

14. verum fidei

15. ratiocinia ex falsis

16. See Vol. I, page 546, footnote 1.

17. The Manuscript inserts et destruunt.

18. quae

19. The Manuscript inserts et per Babelem significantur.

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org