The Bible

 

Ezechiel 10

Study

   

1 Et vidi : et ecce in firmamento quod erat super caput cherubim, quasi lapis sapphirus, quasi species similitudinis solii, apparuit super ea.

2 Et dixit ad virum qui indutus erat lineis, et ait : Ingredere in medio rotarum quæ sunt subtus cherubim, et imple manum tuam prunis ignis quæ sunt inter cherubim, et effunde super civitatem. Ingressusque est in conspectu meo.

3 Cherubim autem stabant a dextris domus, cum ingrederetur vir, et nubes implevit atrium interius.

4 Et elevata est gloria Domini desuper cherub ad limen domus : et repleta est domus nube, et atrium repletum est splendore gloriæ Domini.

5 Et sonitus alarum cherubim audiebatur usque ad atrium exterius, quasi vox Dei omnipotentis loquentis.

6 Cumque præcepisset viro qui indutus erat lineis, dicens : Sume ignem de medio rotarum quæ sunt inter cherubim : ingressus ille stetit juxta rotam.

7 Et extendit cherub manum de medio cherubim, ad ignem qui erat inter cherubim, et sumpsit, et dedit in manus ejus qui indutus erat lineis, qui accipiens egressus est.

8 Et apparuit in cherubim similitudo manus hominis subtus pennas eorum.

9 Et vidi : et ecce quatuor rotæ juxta cherubim : rota una juxta cherub unum, et rota alia juxta cherub unum : species autem rotarum erat quasi visio lapidis chrysolithi :

10 et aspectus earum similitudo una quatuor, quasi sit rota in medio rotæ.

11 Cumque ambularent, in quatuor partes gradiebantur, et non revertebantur ambulantes : sed ad locum ad quem ire declinabat quæ prima erat, sequebantur et ceteræ, nec convertebantur.

12 Et omne corpus earum, et colla, et manus, et pennæ, et circuli, plena erant oculis in circuitu quatuor rotarum.

13 Et rotas istas vocavit volubiles, audiente me.

14 Quatuor autem facies habebat unum : facies una, facies cherub : et facies secunda, facies hominis : et in tertio facies leonis, et in quarto facies aquilæ.

15 Et elevata sunt cherubim : ipsum est animal quod videram juxta fluvium Chobar.

16 Cumque ambularent cherubim, ibant pariter et rotæ juxta ea : et cum elevarent cherubim alas suas ut exaltarentur de terra, non residebant rotæ, sed et ipsæ juxta erant.

17 Stantibus illis stabant, et cum elevatis elevabantur : spiritus enim vitæ erat in eis.

18 Et egressa est gloria Domini a limine templi, et stetit super cherubim.

19 Et elevantia cherubim alas suas, exaltata sunt a terra coram me : et illis egredientibus, rotæ quoque subsecutæ sunt : et stetit in introitu portæ domus Domini orientalis, et gloria Dei Israël erat super ea.

20 Ipsum est animal quod vidi subter Deum Israël juxta fluvium Chobar, et intellexi quia cherubim essent.

21 Quatuor vultus uni, et quatuor alæ uni : et similitudo manus hominis sub alis eorum.

22 Et similitudo vultuum eorum, ipsi vultus quos videram juxta fluvium Chobar, et intuitus eorum, et impetus singulorum ante faciem suam ingredi.

   

From Swedenborg's Works

 

Vera Christiana Religio #93

Study this Passage

  
/ 853  
  

93. Quoniam a Gabriele Angelo ad Mariam dictum est, quod SANCTUM, quod nascetur ex te vocabitur Filius Dei, ex Verbo afferentur loca, quod Dominus quoad Humanum dicatur SANCTUS ISRAELIS, quae sunt, "Videns fui in visionibus, ecce Vigil et SANCTUS e Coelo descendens, Daniel 4:10, 20. 1 Deus e Themane veniet, et SANCTUS e monte Paran, Habakuk 3:3. Ego Jehovah SANCTUS, Creator Israelis SANCTUS 2 VESTER, Esaias 43:14-15. 3 Sic dixit Jehovah Redemptor Israelis SANCTUS IPSIUS, Esaias 49:7. Ego Jehovah Deus tuus, SANCTUS ISRAELIS SALVATOR TUUS, Esaias 43:3. 4 Quod ad REDEMPTOREM nostrum, Jehovah Zebaoth nomen 5 Ipsius, SANCTUS ISRAELIS, Esaias 47:4. Dixit Jehovah REDEMPTOR vester, SANCTUS ISRAELIS, Esaias 43:14; 48:17. Jehovah Zebaoth nomen Ipsius, et REDEMPTOR TUUS SANCTUS ISRAELIS, Esaias 54:5. Tentarunt Deum, et SANCTUM ISRAELIS, Psalmus 78:41. Dereliquerunt Jehovam, et provocarunt SANCTUM ISRAELIS, Esaias 1:4. Dixerunt, cessare facite a faciebus nostris SANCTUM ISRAELIS: propterea sic dixit SANCTUS ISRAELIS, Esaias 30:11-12. Qui dicunt, properet opus Ipsius ut videamus, et appropinquet et veniat consilium SANCTI ISRAELIS, Esaias 5:19. In die illo innitentur Jehovae, SANCTO ISRAELIS in veritate, Esaias 10:20. Exclama et jubila filia 6 Sionis, quia magnus in medio tui SANCTUS ISRAELIS, 7 Esaias 12:6. 8 Dictum Dei Israelis, 9 in die illo oculi ejus ad SANCTUM ISRAELIS spectabunt, Esaias 17:6-7. 10 Egeni hominum in SANCTO ISRAELIS exultabunt, Esaias 29:19; 41:16. Terra plena est reatu contra 11 SANCTUM ISRAELIS," Jeremias 51:5. 12 Et praeterea, Esaias 55:5; 60:9, et alibi.

[2] Per Sanctum Israelis intelligitur Dominus quoad Divinum Humanum, nam Angelus ad Mariam dixit, SANCTUM quod 13 nascetur ex te, vocabitur FILIUS DEI, Luca 1:35. Quod JEHOVAH et SANCTUS ISRAELIS unum sint, tametsi distincte nominantur, constare potest ex locis etiam hic allatis, quod Jehovah sit ille Sanctus Israelis. 14 Quod Dominus dicatur DEUS ISRAELIS, constat etiam ex perplurimis locis, ut Esaias 17:6; 21:10, 17; 24:15; 29:23; Jeremias 7:3; 9:14, 15 Jeremias 11:3; 13:12; 16:9; 19:3, 15; 23:2; 24:5; 25:15, 27; 29:4, 8, 21, 25; 30:2; 31:23, 16 32:14-15, 36; 33:4; 34:2, 13; 35:13, 17-18, 19; 37:7; 38:17, 17 Jeremias 39:16; 42:9, 15, 18; 43:10; 44:2, 7, 11, 25; 48:1; 50:18; 51:33; Ezechiel 8:4; 9:3; 10:19-20; 11:22, 18 Ezechiel 43:2; 44:2; Zephanias 2:9; Psalmuses 41:14, 19 59:6; 20 68:9. 21

Footnotes:

1. Sic Schmidt et Biblia Hebraica, sed 4:13, 23 apud Biblia Anglica.

2. Sic prima editio, sed alibi: Rex.
3. Prima editio: Esaias 44:11, 15.
4. Prima editio: 43:1, 3.
5. Prima editio: domen.
6. Nisi legeris: habitatrix sic Schmidt, Biblia Hebraica, Apocalypsis Revelata 44[2], 612[4], praeter alibi.

7. Prima editio: ISRALIS.
8. Prima editio: 16.
9. Prima editio: Isralis.
10. Prima editio: Esaias 17:7.
11. Prima editio: TERRA PLENA EST REATU CONTRA (absque italicis).
12. Prima editio: Jeremias 50:29.
13. Prima editio: quad.
14. Prima editio: Isralis.
15. Sic Schmidt et Biblia Hebraica, sed 9:15 apud Biblia Anglica.

16. Prima editio: 29.
17. Prima editio: 33.
18. Prima editio: 11:2.
19. Sic Schmidt et Biblia Hebraica, sed 41:13 apud Biblia Anglica.

20. Sic Schmidt et Biblia Hebraica, sed 59:5 apud Biblia Anglica.

21. Sic Schmidt et Biblia Hebraica, sed 68:8 apud Biblia Anglica.

  
/ 853  
  

From Swedenborg's Works

 

Apocalypsis Revelata #44

Study this Passage

  
/ 962  
  

44. (Vers. 13.) "Et in medio Septem Candelabrorum similem Filio Hominis," significat Dominum quoad Verbum, a Quo illa. - Notum est ex Verbo, quod Dominus Se vocaverit "Filium Dei," et quoque "Filium Hominis;" quod per "Filium Dei" intellexerit Se quoad Divinum Humanum, et per "Filium Hominis" Se quoad Verbum, plene demonstratum est in Doctrina Novae Hierosolymae de Domino (19-28); et quia ibi plene ex Verbo id confirmatum est, supersedetur hic illud ulterius confirmare. Nunc quia Dominus coram Johanne Se repraesentavit ut Verbum, ideo visus illi vocatur "Filius Hominis." Repraesentavit Se ut Verbum, quia agitur de Nova Ecclesia, quae est Ecclesia ex Verbo, et secundum intellectum ejus; quod Ecclesia sit ex Verbo, et quod talis sit qualis ei est intellectus Verbi, videatur in Doctrina Novae Hierosolymae de Scriptura Sacra 76-79. Quoniam Ecclesia est Ecclesia a Domino per Verbum, ideo visus est Filius Hominis in medio Candelabrorum; "in Medio" significat in Intimo, ex quo illa quae circum sunt aut quae extra sunt, trahunt suam essentiam, hic suam lucem seu intelligentiam; quod Intimum sit omne in illis quae circum aut extra sunt, multis ostensum est in Sapientia Angelica de Divino Amore et Divina Sapientia,' est sicut Lux et Flamma in medio, ex quibus omnes peripheriae lucent et calent. Simile significat "in medio" in sequentibus locis in Verbo:

"Exclama et jubila habitatrix Zionis, quia magnus in Medio tui Sanctus Israelis," (Esaias 12:6);

"Deus Rex meus operans salutes in Medio terrae," (Psalm. 74:12); 1

"Deus operans Misericordiam in Medio Templi," (Psalm. 48:10 (B.A. 9)); 2

"Deus constitit in caetu Dei, in Medio deorum judicabit," (Psalm. 82:1); 3

"dii" vocantur qui in Divinis veris a Domino sunt, et abstracte ipsa Vera:

"Ecce mitto Angelum coram te; caveto tibi a faciebus Ipsius, quoniam Nomen Meum in Medio Ipsius," (Exodus 23:20-21);

"Nomen Jehovae" est omne Divinum; "in Medio" est in Intimo et inde in omni ejus. "Medium" etiam significat Intimum, et inde Omne, in pluribus aliis locis in Verbo, etiam ubi agitur de malis, ut Esaias 24:13; Jeremias 23:9; Psalm. 5:10 (B.A. 9); Jeremias 9:4-5; 4 Psalm. 36:2 (B.A. 1); Psalm. 55:5 (B.A. 4); 5 Psalm. 62:5 (B.A. 4). Haec loca allata sunt, ut Sciatur quod "in Medio Candelabrorum" significet in Intimo a quo Ecclesia et omne ejus, nam Ecclesia et omne ejus est a Domino per Verbum. Quod "Candelabra" significent Novam Ecclesiam, videatur mox supra (43).

Footnotes:

1. lxxiv. pro "lxiv."

2. 48:10 pro "28:10, 11"

3. lxxxii. pro "lxxii."

4. Jerem. pro "Psalmus."

5. 55:5 pro "54:7"

  
/ 962