8038. Eksodus 13
1.UJehovah wakhuluma kuMose wathi:
2. Ngahlukanisele onke amazibulo, konke okuvula isizalo phakathi kwabantwana bakwa-Israyeli, kubantu nasezinkomeni; kungokwami.
3. UMose wayesethi kubantu: Khumbulani lolusuku eniphume ngalo eGibhithe, indlu yobugqila, ngokuba ngesandla esinamandla uJehovah unikhiphile kuleyondawo: akuyukudliwa sinkwa esivutshelweyo.
4. Namuhla niyaphuma, ngenyanga ka-Abhibhi.
5. Kuyokuthi nxa uJehovah ekungenisile ezweni lamaKhanani, nelamaHethi, nelama-Amori, nelamaHivi, nelamaJebhusi alifungela koyihlo ukukunika lona, izwe elivama ubisi nezinyosi, uyogcina lenkonzo kulenyanga.
6. Izinsuku eziyisikhombisa uyokudla isinkwa esingenamvubelo, ngolwesikhombisa kubekhona umkhosi kaJehovah.
7. Isinkwa esingenamvubelo siyodliwa izinsuku eziyisikhombisa; akuyukubonakala sinkwa esivutshelweyo kuwe, kungabonwa namvubelo ezweni lakho lonke.
8. Uzotshela indodana yakho ngalolusuku, uthi: Kungenxa yalokho uJehovah angenzela khona ekuphumeni kwami eGibhithe.
9. Kuyokuba wuphawu kuwe esandleni sakho, kube yisikhumbuzo phakathi kwamehlo akho, ukuze umthetho kaJehovah ube semlonyeni wakho, ngokuba ngesandla esinamandla uJehovah wakukhipha eGibhithe.
10. Ngakho uyokuwugcina lomthetho ngesikhathi sawo iminyaka neminyaka.
11. Kuyokuthi lapho uJehovah esezokungenisa ezweni lamaKhanani, njengalokho wafunga kuwe nakuyihlo, akuphe lona,
12. wodlulisela kuJehovah konke okuvula isizalo nawowonke amazibulo ezinkomo onawo; amaduna onke azokuba ngakaJehovah.
13. Onke amazibulo ezimbongolo wowahlenga ngewundlu; uma ungawahlengi, wowaphula intamo; amazibulo onke abantu kumadodana akho wowahlenga.
14. Kuyokuthi lapho indodana yakho ikubuza ngesikhathi esizayo, ithi: Kuyini lokhu? wothi kuyo: Ngesandla esinamandla uJehovah wasikhipha eGibhithe, indlu yobugqila.
15. Kwathi uFaro evuma kalukhuni ukuba sihambe, uJehovah wabulala onke amazibulo asezweni laseGibhithe, amazibulo abantu namazibulo ezinkomo; ngalokho ngiyahlabela uJehovah konke okuvula isizalo okungamaduna; kepha onke amazibulo amadodana ami ngiyawahlenga.
16. Kuyokuba wuphawu esandleni sakho nesikhumbuzo phakathi kwamehlo akho, ngokuba ngesandla esinamandla uJehova wasikhipha eGibhithe.
17. Kwathi uFaro esebavumele abantu ukuba bahambe, uNkulunkulu kabaholanga ngendlela yasezweni lamaFilisti, yize kwakuyiyona eseduze; ngokuba uNkulunkulu wathi: Funa mhlawumbe abantu bazisole, nxa bebona impi, babuyele eGibhithe.
18. Kepha uNkulunkulu wabagwegwisa abantu ngendlela yasehlane ngasoLwandle oluBomvu; abantwana bakwa-Israyeli bakhuphuka ezweni laseGibhithe behlomile.
19. UMose wathatha amathambo kaJosefa, wahamba nawo, ngokuba uJosefa wayebafungisile nokubafungisa abakwa-Israyeli, ethi: Impela uNkulunkulu uyonihambela nokunihambela, nikhuphule lapha amathambo ami kanye nani.
20. Basuka eSukothi; baya bamisa e-Ethamu eceleni kwehlane.
21. UJehovah wahamba phambi kwabo emini ngensika yefu eyobahola endleleni, nasebusuku ngensika yomlilo eyobakhanyisela ukuba bahambe imini nobusuku.
22. Insika yefu emini nensika yomlilo ebusuku kayisukanga ebusweni babantu.
OKUQUKETHWE
KulesiSahluko isihloko okukhulunywa ngaso engqondweni engaphakathi yinkolo yokukholwa eNkosini. Kukhulunywa futhi ngesikhumbuzo esingenasiphelo sokophulwa yiNkosi ekulahlweni esihogweni. Inkolo yokukholwa eNkosini ifanekiswa ngokwahlukaniselwa kwaYo amazibulo, nesikhumbuzo saphakade sokophulwa kwabo yiNkosi sifanekiswa ngokugubha umkhosi wePhasika.
