Zawba 28

¹ “A hmeihseih tly, tâkâri chaona khaoh ta, ngôh pasiana su chhao a y.

² Thua cha alei tawhta lapa châ ta, alô tawhta dawh patipa a châ hra.

³ Chyhsa zy ta zohna pachhâsa ei ta, su a hla ngaitapa cha tlua ei ta, zohna chhakalupa nata zoh kaluhpa liata alô zy ama tlua.

⁴ Chyhsa pahrâ leina liazy chao ei ta; a sievawpa zy ta âmo my ei ta, hmo pha leina liata a bahai ei ta, ama thy ngâ kaw.

⁵ Alei heta niepa chô lâ papua ta; châhrasala a ry lâ deikua mei hawhta a châ.

⁶ Alôzy cha saphai su châ ta, ngôh dohlei chhao a hnei.

⁷ “Cha lâpi cha sahhei niepa pavaw ta pahno vei, pahmô mo chhaota hmô beih vei.

⁸ Sahrâhpa zy chhaota tly beih leipa ei ta; cha liana cha chakeibarôhneipa chhao sie beih hra vei.

⁹ “Chyhsa ta alô châkaropa liata a ku pathla ta, tlâh laipapi a thaby duata palie ta.

¹⁰ Alôpanô zy vieh pahlie ta, a mo ta hmo sôhpa a hmô.

¹¹ Khoh cheita leipa ta vatie zy toh ta, hmo a nyu thlâhpa zy cha khaihna lâta a papua.

¹² “Châhrasala khataih liata e sona cha hmô theipa a châ? Pahnona yna su cha khataih ta e?

¹³ Chyhsa ta a ma ziepa pahno vei, ahropa râh liata hmôpa châ hra vei.

¹⁴ Athuna cha ta, ‘Keima lia y vei,’ tah ta, tilaipi chhao chata, ‘Keima lia y vei,’ tah hra ta.

¹⁵ Ngôh ta chalei theipa châ leipa ta, a mâ châta tâkâri pathlia theipa châ hra vei.

¹⁶ Ôphira ngôh chhaota a tlu leipa ta, saphai lôsôhpa tlyma, bery lôsôhpa tlyma ta chhao a tlu vei.

¹⁷ Ngôh nata thlalâ chhaota a tlu leipa ta. ngôh suapa chhaota ri theipa châ vei.

¹⁸ Kôra lô tlyma, Krystal lô tlyma nata ripa ri rai châ vei; sona mâ cha lôsôhpa hlâta a chônô via.

¹⁹ Ethiôpia râh topazie lôsôhpa chhaota a kho leipa ta, ngôhsuapa nata chhao pakhopa rimâ châ vei.

²⁰ “Cha khiahtala, sona cha khataih tawhtapa ma a châ? Khataih liata ma pahnona su cha a y?

²¹ Ahropa zydua mohmôna tawhta nyupa a châ, pavaw a zaw ngâpa taw chhao a châ.

²² Leidiana nata thina chata, ‘A pyu la eima nah ta a thei’ ama tah.

²³ “Khazohpa deikua cha a lâpi a pahno, a su chhao a pahno hra.

²⁴ Alei chhâna awpa cha sai ta, avâ ry zydua he hmô khai ta.

²⁵ Thlih a hrina zie a pie nona khata, Ti zie chhao panuana ta a panua nona khata;

²⁶ vâsua chata yzie a rao nona khata, tôkalôpa a thuana nata dôhla chata lâpi a tao nona khata;

²⁷ ano cha hmô ta, phuah ta; pa-isa ta, a tlua pasia hra.

²⁸ Chatawhcha chyhsa hnohta, ‘Khazohpa china he, sona cha a châ; moleina tawhta a pachhaihna he pahnona cha a châ,’ a tah,” tah ta.