Zawba 27

¹ Chatawhcha Zawba chata a biereipa pazao lymâ heih ta:

² “Khazohpa hropa, a dona kyh liata na paphasaipa mohta chhie ei sa, Atotaotheipa, ei hrona rie patheisa nata pa bie ta,

³ keima liana heta ei hu a ki ta, ei hnapasu liata Khazohpa hu a y.

⁴ Ei hmao ta sia leina bie papua chachei aw vei, ei palei ta dôna bie reih hra aw vei.

⁵ Thai cha pachâsa beih aw veih ei na; ei thina taih chhaota ei dona cha pahlei aw va na.

⁶ Ei siana cha khâchâ patu aw na ta, pathlie beih aw va na; ei hro chhôhta ei palôhrupa ta na pasi aw vei.

⁷ “Ei khakhaipa cha hmoparaopa châ sala, na thyuhnaotuhpa cha sia leipa tlao châ se.

⁸ Khazohpa a pachâ leipa chata khâpa hnabeiseihna e a y, Khazohpa ta a hrona la ta, a chhawh pathla tina cha?

⁹ A chôta atymâna vaw tlô tina cha, Khazohpa ta a awna cha a thei aw ma?

¹⁰ Atotaotheipa chô liana cha a ly aw ma? Khazohpa cha khâpa no raita a aw aw ma?

¹¹ Khazohpa ku ky la, ei cha pachu aw ei; Atotaotheipa liata a ypa cha phih aw va na.

¹² Nâmo sasyh deita a hmô eichi ta, Kheihta zie ta e, khâpa hrao leipa nama vaw châ tly?

¹³ “Khazohpa hnohta hmoparaopazy tovyuh awpa cha he he a châ, Riepatheisatuhpa zy, Atotaotheipa tawhta ryuto awpa cha:

¹⁴ A sawzy ama pôh khiahta cha zaozi châta ama châ; a pathlazy ta niepa nie khi hmô aw veih ei.

¹⁵ A hnôh lâta a hro chhôhpa cha hri ta pabu aw ta, ama lahpinô zy chhaota mâchhie sa aw veih ei.

¹⁶ Tâkâri cha buchâh hawhta pahmaoh hra sala, beih lei hawhta chysia pacho hra sala;

¹⁷ a pahmaohpa cha chysa siapa ta atobina aw ta, a thaipa zy ta tâkâri cha amâ rai aw.

¹⁸ Chiariapa bu hawhta o cha sa hra sala, avaihtuhpa ta riebu a sapa hawh deita a châ aw.

¹⁹ A hneirôhpa ta a zia ta, Châhrasala thyu khao aw vei; a mo padeih aw ta; châhrasala a hneirôna cha y khao aw vei.

²⁰ Tilaipi hawhta chichhihna ta tlô hnao ta; zâ ta khisô ta cheih ta.

²¹ Nochhi ziza ta phaoh ta, a lei haw; a su tawhta a chanaoh pathla haw.

²² Khazohpa ta ngiachhiena a hlao leipa ta chanaoh ta; a hmotaotheina tawhta a phaoh pahai lymâ aw.

²³ A ku chabai chie aw ta, a su tawhta hmao tô chiepa ta a papua aw.