Zawba 28

Study

          |

1 “A hmeihseih tly, tâkâri chaona khaoh ta, ngôh pasiana su chhao a y.

2 Thua cha alei tawhta lapa châ ta, alô tawhta dawh patipa a châ hra.

3 Chyhsa zy ta zohna pachhâsa ei ta, su a hla ngaitapa cha tlua ei ta, zohna chhakalupa nata zoh kaluhpa liata alô zy ama tlua.

4 Chyhsa pahrâ leina liazy chao ei ta; a sievawpa zy ta âmo my ei ta, hmo pha leina liata a bahai ei ta, ama thy ngâ kaw.

5 Alei heta niepa chô lâ papua ta; châhrasala a ry lâ deikua mei hawhta a châ.

6 Alôzy cha saphai su châ ta, ngôh dohlei chhao a hnei.

7 “Cha lâpi cha sahhei niepa pavaw ta pahno vei, pahmô mo chhaota hmô beih vei.

8 Sahrâhpa zy chhaota tly beih leipa ei ta; cha liana cha chakeibarôhneipa chhao sie beih hra vei.

9 “Chyhsa ta alô châkaropa liata a ku pathla ta, tlâh laipapi a thaby duata palie ta.

10 Alôpanô zy vieh pahlie ta, a mo ta hmo sôhpa a hmô.

11 Khoh cheita leipa ta vatie zy toh ta, hmo a nyu thlâhpa zy cha khaihna lâta a papua.

12 “Châhrasala khataih liata e sona cha hmô theipa a châ? Pahnona yna su cha khataih ta e?

13 Chyhsa ta a ma ziepa pahno vei, ahropa râh liata hmôpa châ hra vei.

14 Athuna cha ta, ‘Keima lia y vei,’ tah ta, tilaipi chhao chata, ‘Keima lia y vei,’ tah hra ta.

15 Ngôh ta chalei theipa châ leipa ta, a mâ châta tâkâri pathlia theipa châ hra vei.

16 Ôphira ngôh chhaota a tlu leipa ta, saphai lôsôhpa tlyma, bery lôsôhpa tlyma ta chhao a tlu vei.

17 Ngôh nata thlalâ chhaota a tlu leipa ta. ngôh suapa chhaota ri theipa châ vei.

18 Kôra lô tlyma, Krystal lô tlyma nata ripa ri rai châ vei; sona mâ cha lôsôhpa hlâta a chônô via.

19 Ethiôpia râh topazie lôsôhpa chhaota a kho leipa ta, ngôhsuapa nata chhao pakhopa rimâ châ vei.

20 “Cha khiahtala, sona cha khataih tawhtapa ma a châ? Khataih liata ma pahnona su cha a y?

21 Ahropa zydua mohmôna tawhta nyupa a châ, pavaw a zaw ngâpa taw chhao a châ.

22 Leidiana nata thina chata, ‘A pyu la eima nah ta a thei’ ama tah.

23 “Khazohpa deikua cha a lâpi a pahno, a su chhao a pahno hra.

24 Alei chhâna awpa cha sai ta, avâ ry zydua he hmô khai ta.

25 Thlih a hrina zie a pie nona khata, Ti zie chhao panuana ta a panua nona khata;

26 vâsua chata yzie a rao nona khata, tôkalôpa a thuana nata dôhla chata lâpi a tao nona khata;

27 ano cha hmô ta, phuah ta; pa-isa ta, a tlua pasia hra.

28 Chatawhcha chyhsa hnohta, ‘Khazohpa china he, sona cha a châ; moleina tawhta a pachhaihna he pahnona cha a châ,’ a tah,” tah ta.