Zawhana 10

¹ “Hmeiseihta ta, hmeiseihta ta, ei cha chho ei chuh, ahyrai mietahkupa sahdô liata ochhi lâta a ngia leipa ta, a hro lâta kiah ta a ngiapa cha, cha chyhsa cha paruhmâhpa nata phihmâhpa a châ;

² ahyrai ochhi lâta a ngiapa deikua cha mietahkupazy mietahkuvaihtuhpa a châ.

³ Ochhivaihtuhpa ta ano cha vaw pahypa tyh ta; mietahkupazy ta a ao thei tyh ei ta, ano mietahkupazy cha ama moh ta aw chyu ta, chhihtha tyh ta.

⁴ Ano eih zydua a papua khaipa ta nahta ama hmia lâta sie ta, mietahkupazy chata ano zi tyh ei ta, a ao pahno tlôh ei ta.

⁵ Mo hropa zi leipa aw ei ta, tlao amâ râsai aw, mo hropazy ao cha ama pahno leipa vâta,” tah ta.

⁶ Cha pakhona bie cha Zisu ta ama hnohta reih ta, châhrasala khâpa bie ma ama hnohta a reih tahpa pahno tlôh ei va.

⁷ Chatanachata Zisu ta ama hnohta reih heih ta, “Hmeiseihta ta, hmeiseihta ta, ei cha chho ei chuh, kei he mietahkupa ochhi cha ei châ.

⁸ Ei hmia lâta a vypa zydua kha paruhmâhpazy, phihmâhpazy châ khai ei ta; châhrasala mietahkupazy chata ama bie zo veih ei.

⁹ Kei ochhi cha ei châ; ahyrai keima liata a ngiapa chata pabohpa ta y aw ta, a ngia aw ta, pua aw ta, niepa a hmô hra aw.

¹⁰ Paruhmâhpa cha paru awpa nata thie awpa nata parao awpa leipa ta cha a vy vei; kei la hro ama hnei nawpa ta a kipa ta ama hnei nawpa ta a vypa ei châ.

¹¹ Kei mietahkuvaihtuhpa phapa ei châ. Mietahkuvaihtuhpa phapa ta mietahkupazy châta a hro a pie.

¹² A hlaopa mietahkuvaihtuhpa hmeiseih leipa ta, mietahkupazy ano eih a châ leipa vâta, changie a vypa a hmô nata mietahkupazy a râsai tyh; changie chata mietahkupazy siehnao ta a papai tyh.

¹³ A hlaopa chata mietahkupazy a papeisa leipa vâta a râsai tyh.

¹⁴ Kei la mietahkuvaituhpa phapa ei châ; Paw ta eina pahnopa nata kei ta Paw ei pahnopa hawhna heta

¹⁵ keima ei pahno nah ta, keima eih chhaota eina pahno; mietahkupazy châta ei hro ei pie.

¹⁶ He mietahkupa sahdô liatahpa leipa he, mietahkupa hropa ei hnei; âmo chhao ei vaw chhi awpa a châ, ei ao chhao ama thei aw. Chatanachata hlao khata y aw ei ta, a vaihtuhpa pakha nahta.

¹⁷ He vâna heta Paw ta kyh eina pachâ, la heih awpa ta ei hro ei piepa vâna heta.

¹⁸ Ahyhma ta na lapa aw veih ei, keima rei ta tlao ei pie aw. A pie theipa ei châ, a la heih theipa chhao ei châ; he biepiepa he ei Paw tawhta ei hmô,” tah ta.

¹⁹ Cha biezy vâna chata Zuzy a pachhaih heih ei ta.

²⁰ Thokha a hluhpi ta, “Ahripa azo ta, a hru ha hih; khazia a bie nama nahthlie?” tah ei ta.

²¹ Thokha ta, “He biezy he ahripa azopa bie reipa châ vei. Ahripa ta mochaopa mo a pavâsa thei ma?” tah ei ta.

²² Zerusale khih liata Ahlâna kyhchhi noh châ ta;

²³ cha cha chasi paw no a châ, Zisu Khazohpa achhyna-o liata Sawlawmaw aika liata a khiekhâ ta.

²⁴ Zuzy a kiapâh liata a vy ei ta, a hnohta, “Khachâ e noraipa ta maniah na tao aw? Mesia na châ khiahtala a siapa ta maniah chho teh,” tah ei ta.

²⁵ Zisu ta ama hnohta, “Ei cha chho haw ei khâ, zo tlôh eichi va. Ei Paw moh ta hmo ei taopa he, hezy heta ei thâtih a pahnosa;

²⁶ châhrasala zo tlôh eichi va, ei mietahkupa hry liatahpa nama châ leipa vâta.

²⁷ Ei mietahkupazy ta ei ao ama thei tyh, kei chhaota âmo ei pahno, âmo chata eina zi tyh ei;

²⁸ ama hnota chhâzaw hrona ei pie, chhâzaw ta leidia leipa aw ei ta, ahyhma ta ei ku tawhtapa na chhu hra aw veih ei.

²⁹ Arao na pietuhpa ei Paw cha chyhsa zydua hlâta rônah chaipa châ ta, ahyhma ta Paw ku tawhtapa cha chhu thei aw veih ei.

³⁰ Keima nata Paw cha pôhkha eima châ,” tahpa ta a chhy ta.

³¹ Zuzy chata a vaw nawpa ta alô a huah heih ei ta.

³² Zisu ta âmo cha chho ta, “Paw tawhta a puapa raihria phapa hluhpi cha pamosa ei na ta; kha raihriazy hry liana khata raihria kheihawhpa vâna khata ma alô ta eina vawh awpa eichi he?” tah ta.

³³ Zuzy chata a hnohta, “Raihria phapa chôta alô ta eima cha vawh lei awpa he; Khazohpa na reipachhiena chôta nata nâ chyhsapa châ tlôh chi ta, Khazohpa ta nâ taopa vâna heta a châ,” tahpa ta a chhy ei ta.

³⁴ Zisu ta ama hnohta, “Nama ryhpa châbu liata, ‘Khazohzy nama châ, ei tah,’ tahpa ropa châ vei mâ?

³⁵ Khazohpa bie tlônazy hmahta khazohzy ama tah khiahta cha, Khazohpa châ bie pathlei theipa châ leipa ta,

³⁶ Paw ta rao ta, khizaw liata a tuapa chô liana heta, ‘Khazohpa Sawchapawpa ei châ,’ ei tahpa vâta, ‘Khazohpa na reipachhie eina tah eichi mâ’?

³⁷ Ei Paw raihria a hriapa ei châ vei khiahtala nâ ngiapâ khah u;

³⁸ anodeikuacha a hriapa ei châ khiahtala, kei nâ ngiapâ vei hra ula, raihriazy chhâ he a ngiapâ teh u. Paw keima liata a ypa nata kei Paw liata ei ypa pahnopa ta namâ ngiapâ nawpa ta,” tah ta a chhy ta.

³⁹ Chatanachata ano cha patu a chhuah heih ei ta, châhrasala âmo ku tawhtapa pua ha ta.

⁴⁰ Zawdâh chavah haosâ liata Zawhana ta cha hlâta chyhsa a bâtina lâna khata sie ha heih ta, cha liana chata y thlâh ha ta.

⁴¹ Chatawhcha chyhsa hluhpi ano lâ a vy ei ta; “Zawhana ta hmonoâhpa khâpahma tao leipa ta, châhrasala Zawhana ta he chyhsa thâtih a reipa maih kha â do kaw na,” tah ei ta.

⁴² Cha liana chata chyhsa hluhpi ta ano a ngiapâ haw ei ta.;