Zawhana 10

Study

         

1 “Hmeiseihta ta, hmeiseihta ta, ei cha chho ei chuh, ahyrai mietahkupa sahdô liata ochhi lâta a ngia leipa ta, a hro lâta kiah ta a ngiapa cha, cha chyhsa cha paruhmâhpa nata phihmâhpa a châ;

2 ahyrai ochhi lâta a ngiapa deikua cha mietahkupazy mietahkuvaihtuhpa a châ.

3 Ochhivaihtuhpa ta ano cha vaw pahypa tyh ta; mietahkupazy ta a ao thei tyh ei ta, ano mietahkupazy cha ama moh ta aw chyu ta, chhihtha tyh ta.

4 Ano eih zydua a papua khaipa ta nahta ama hmia lâta sie ta, mietahkupazy chata ano zi tyh ei ta, a ao pahno tlôh ei ta.

5 Mo hropa zi leipa aw ei ta, tlao amâ râsai aw, mo hropazy ao cha ama pahno leipa vâta,” tah ta.

6 Cha pakhona bie cha Zisu ta ama hnohta reih ta, châhrasala khâpa bie ma ama hnohta a reih tahpa pahno tlôh ei va.

7 Chatanachata Zisu ta ama hnohta reih heih ta, “Hmeiseihta ta, hmeiseihta ta, ei cha chho ei chuh, kei he mietahkupa ochhi cha ei châ.

8 Ei hmia lâta a vypa zydua kha paruhmâhpazy, phihmâhpazy châ khai ei ta; châhrasala mietahkupazy chata ama bie zo veih ei.

9 Kei ochhi cha ei châ; ahyrai keima liata a ngiapa chata pabohpa ta y aw ta, a ngia aw ta, pua aw ta, niepa a hmô hra aw.

10 Paruhmâhpa cha paru awpa nata thie awpa nata parao awpa leipa ta cha a vy vei; kei la hro ama hnei nawpa ta a kipa ta ama hnei nawpa ta a vypa ei châ.

11 Kei mietahkuvaihtuhpa phapa ei châ. Mietahkuvaihtuhpa phapa ta mietahkupazy châta a hro a pie.

12 A hlaopa mietahkuvaihtuhpa hmeiseih leipa ta, mietahkupazy ano eih a châ leipa vâta, changie a vypa a hmô nata mietahkupazy a râsai tyh; changie chata mietahkupazy siehnao ta a papai tyh.

13 A hlaopa chata mietahkupazy a papeisa leipa vâta a râsai tyh.

14 Kei la mietahkuvaituhpa phapa ei châ; Paw ta eina pahnopa nata kei ta Paw ei pahnopa hawhna heta

15 keima ei pahno nah ta, keima eih chhaota eina pahno; mietahkupazy châta ei hro ei pie.

16 He mietahkupa sahdô liatahpa leipa he, mietahkupa hropa ei hnei; âmo chhao ei vaw chhi awpa a châ, ei ao chhao ama thei aw. Chatanachata hlao khata y aw ei ta, a vaihtuhpa pakha nahta.

17 He vâna heta Paw ta kyh eina pachâ, la heih awpa ta ei hro ei piepa vâna heta.

18 Ahyhma ta na lapa aw veih ei, keima rei ta tlao ei pie aw. A pie theipa ei châ, a la heih theipa chhao ei châ; he biepiepa he ei Paw tawhta ei hmô,” tah ta.

19 Cha biezy vâna chata Zuzy a pachhaih heih ei ta.

20 Thokha a hluhpi ta, “Ahripa azo ta, a hru ha hih; khazia a bie nama nahthlie?” tah ei ta.

21 Thokha ta, “He biezy he ahripa azopa bie reipa châ vei. Ahripa ta mochaopa mo a pavâsa thei ma?” tah ei ta.

22 Zerusale khih liata Ahlâna kyhchhi noh châ ta;

23 cha cha chasi paw no a châ, Zisu Khazohpa achhyna-o liata Sawlawmaw aika liata a khiekhâ ta.

24 Zuzy a kiapâh liata a vy ei ta, a hnohta, “Khachâ e noraipa ta maniah na tao aw? Mesia na châ khiahtala a siapa ta maniah chho teh,” tah ei ta.

25 Zisu ta ama hnohta, “Ei cha chho haw ei khâ, zo tlôh eichi va. Ei Paw moh ta hmo ei taopa he, hezy heta ei thâtih a pahnosa;

26 châhrasala zo tlôh eichi va, ei mietahkupa hry liatahpa nama châ leipa vâta.

27 Ei mietahkupazy ta ei ao ama thei tyh, kei chhaota âmo ei pahno, âmo chata eina zi tyh ei;

28 ama hnota chhâzaw hrona ei pie, chhâzaw ta leidia leipa aw ei ta, ahyhma ta ei ku tawhtapa na chhu hra aw veih ei.

29 Arao na pietuhpa ei Paw cha chyhsa zydua hlâta rônah chaipa châ ta, ahyhma ta Paw ku tawhtapa cha chhu thei aw veih ei.

30 Keima nata Paw cha pôhkha eima châ,” tahpa ta a chhy ta.

31 Zuzy chata a vaw nawpa ta alô a huah heih ei ta.

32 Zisu ta âmo cha chho ta, “Paw tawhta a puapa raihria phapa hluhpi cha pamosa ei na ta; kha raihriazy hry liana khata raihria kheihawhpa vâna khata ma alô ta eina vawh awpa eichi he?” tah ta.

33 Zuzy chata a hnohta, “Raihria phapa chôta alô ta eima cha vawh lei awpa he; Khazohpa na reipachhiena chôta nata nâ chyhsapa châ tlôh chi ta, Khazohpa ta nâ taopa vâna heta a châ,” tahpa ta a chhy ei ta.

34 Zisu ta ama hnohta, “Nama ryhpa châbu liata, ‘Khazohzy nama châ, ei tah,’ tahpa ropa châ vei mâ?

35 Khazohpa bie tlônazy hmahta khazohzy ama tah khiahta cha, Khazohpa châ bie pathlei theipa châ leipa ta,

36 Paw ta rao ta, khizaw liata a tuapa chô liana heta, ‘Khazohpa Sawchapawpa ei châ,’ ei tahpa vâta, ‘Khazohpa na reipachhie eina tah eichi mâ’?

37 Ei Paw raihria a hriapa ei châ vei khiahtala nâ ngiapâ khah u;

38 anodeikuacha a hriapa ei châ khiahtala, kei nâ ngiapâ vei hra ula, raihriazy chhâ he a ngiapâ teh u. Paw keima liata a ypa nata kei Paw liata ei ypa pahnopa ta namâ ngiapâ nawpa ta,” tah ta a chhy ta.

39 Chatanachata ano cha patu a chhuah heih ei ta, châhrasala âmo ku tawhtapa pua ha ta.

40 Zawdâh chavah haosâ liata Zawhana ta cha hlâta chyhsa a bâtina lâna khata sie ha heih ta, cha liana chata y thlâh ha ta.

41 Chatawhcha chyhsa hluhpi ano lâ a vy ei ta; “Zawhana ta hmonoâhpa khâpahma tao leipa ta, châhrasala Zawhana ta he chyhsa thâtih a reipa maih kha â do kaw na,” tah ei ta.

42 Cha liana chata chyhsa hluhpi ta ano a ngiapâ haw ei ta.;