¹ ויהי בעת ההוא וירד יהודה מאת אחיו ויט עד איש עדלמי ושמו חירה׃

² וירא שם יהודה בת איש כנעני ושמו שוע ויקחה ויבא אליה׃

³ ותהר ותלד בן ויקרא את שמו ער׃

⁴ ותהר עוד ותלד בן ותקרא את שמו אונן׃

⁵ ותסף עוד ותלד בן ותקרא את שמו שלה והיה בכזיב בלדתה אתו׃

⁶ ויקח יהודה אשה לער בכורו ושמה תמר׃

⁷ ויהי ער בכור יהודה רע בעיני יהוה וימתהו יהוה׃

⁸ ויאמר יהודה לאונן בא אל אשת אחיך ויבם אתה והקם זרע לאחיך׃

⁹ וידע אונן כי לא לו יהיה הזרע והיה אם בא אל אשת אחיו ושחת ארצה לבלתי נתן זרע לאחיו׃

¹⁰ וירע בעיני יהוה אשר עשה וימת גם אתו׃

¹¹ ויאמר יהודה לתמר כלתו שבי אלמנה בית אביך עד יגדל שלה בני כי אמר פן ימות גם הוא כאחיו ותלך תמר ותשב בית אביה׃

¹² וירבו הימים ותמת בת שוע אשת יהודה וינחם יהודה ויעל על גזזי צאנו הוא וחירה רעהו העדלמי תמנתה׃

¹³ ויגד לתמר לאמר הנה חמיך עלה תמנתה לגז צאנו׃

¹⁴ ותסר בגדי אלמנותה מעליה ותכס בצעיף ותתעלף ותשב בפתח עינים אשר על דרך תמנתה כי ראתה כי גדל שלה והוא לא נתנה לו לאשה׃

¹⁵ ויראה יהודה ויחשבה לזונה כי כסתה פניה׃

¹⁶ ויט אליה אל הדרך ויאמר הבה נא אבוא אליך כי לא ידע כי כלתו הוא ותאמר מה תתן לי כי תבוא אלי׃

¹⁷ ויאמר אנכי אשלח גדי עזים מן הצאן ותאמר אם תתן ערבון עד שלחך׃

¹⁸ ויאמר מה הערבון אשר אתן לך ותאמר חתמך ופתילך ומטך אשר בידך ויתן לה ויבא אליה ותהר לו׃

¹⁹ ותקם ותלך ותסר צעיפה מעליה ותלבש בגדי אלמנותה׃

²⁰ וישלח יהודה את גדי העזים ביד רעהו העדלמי לקחת הערבון מיד האשה ולא מצאה׃

²¹ וישאל את אנשי מקמה לאמר איה הקדשה הוא בעינים על הדרך ויאמרו לא היתה בזה קדשה׃

²² וישב אל יהודה ויאמר לא מצאתיה וגם אנשי המקום אמרו לא היתה בזה קדשה׃

²³ ויאמר יהודה תקח לה פן נהיה לבוז הנה שלחתי הגדי הזה ואתה לא מצאתה׃

²⁴ ויהי כמשלש חדשים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשרף׃

²⁵ הוא מוצאת והיא שלחה אל חמיה לאמר לאיש אשר אלה לו אנכי הרה ותאמר הכר נא למי החתמת והפתילים והמטה האלה׃

²⁶ ויכר יהודה ויאמר צדקה ממני כי על כן לא נתתיה לשלה בני ולא יסף עוד לדעתה׃

²⁷ ויהי בעת לדתה והנה תאומים בבטנה׃

²⁸ ויהי בלדתה ויתן יד ותקח המילדת ותקשר על ידו שני לאמר זה יצא ראשנה׃

²⁹ ויהי כמשיב ידו והנה יצא אחיו ותאמר מה פרצת עליך פרץ ויקרא שמו פרץ׃

³⁰ ואחר יצא אחיו אשר על ידו השני ויקרא שמו זרח׃

¹ בשנת חמש עשרה למלכות הקיסר טיבריוס בהיות פונטיוס פילטוס הגמון ביהודה והורדוס שר רבע על הגליל ואחיו פילפוס שר רבע על מדינות יטור וטרכונה ולוסניס שר רבע על אבילין׃

² בימי הכהנים הגדולים חנן וקיפא היה דבר אלהים אל יוחנן בן זכריה במדבר׃

³ ויבא אל כל ככר הירדן ויקרא טבילת התשובה לסליחת החטאים׃

⁴ ככתוב בספר דברי ישעיהו הנביא קול קורא במדבר פנו דרך יהוה ישרו מסלותיו׃

⁵ כל גיא ינשא וכל הר וגבעה ישפלו והיה העקב למישור והרכסים לבקעה׃

⁶ וראו כל בשר את ישועת אלהים׃

⁷ ויאמר אל המון העם היצאים להטבל על ידו אתם ילדי הצפעונים מי הורה אתכם להמלט מפני הקצף הבא׃

⁸ לכן עשו פרי הראוי לתשובה ואל תדמו בנפשכם לאמר אברהם הוא אבינו כי אני אמר לכם כי מן האבנים האלה יכל האלהים להקים בנים לאברהם׃

⁹ וכבר הושם הגרזן על שרש העצים והנה כל עץ אשר איננו עשה פרי טוב יגדע והשלך באש׃

¹⁰ וישאלהו המון העם לאמר מה אפוא נעשה׃

¹¹ ויען ויאמר אליהם מי אשר לו כתנות שתים הוא יחלק לאשר אין לו ומי אשר לו מזון ככה יעשה גם הוא׃

¹² ויבאו גם מוכסים להטבל ויאמרו אליו רבי מה נעשה׃

¹³ ויאמר אליהם אל תגבו יותר מחקכם׃

¹⁴ וישאלהו גם אנשי הצבא לאמר ואנחנו מה נעשה ויאמר אליהם איש אל תזעזעו ואל תלשינו איש ויהי די לכם בשכרכם׃

¹⁵ ויהי כאשר חכה העם וכלם חשבים בלבם לאמר אולי יוחנן הוא המשיח׃

¹⁶ ויען יוחנן ויאמר לכלם הן אני טובל אתכם במים אבל בוא יבוא החזק ממני אשר אינני כדי להתיר את שרוך נעליו הוא יטבל אתכם ברוח הקדש ובאש׃

¹⁷ אשר המזרה בידו להבר את גרנו ויאסף את דגנו אל אוצרו ואת המץ ישרפנו באש אשר לא תכבה׃

¹⁸ וכן עוד דברים אחרים הרבה בשר וגם הזהיר את העם׃

¹⁹ והורדוס שר רבע המדינה אשר הוכח על ידו על אדות הורודיה אשת אחיו פילפוס ועל אדות כל הרע אשר עשה הורדוס׃

²⁰ הוסיף על כל אלה גם את זאת ויסגר את יוחנן במשמר׃

²¹ ויהי בהטבל כל העם וגם ישוע נטבל ומתפלל ויפתחו השמים׃

²² וירד עליו רוח הקדש בדמות גוף כיונה ויהי קול מן השמים ויאמר אתה בני ידידי בך רצתה נפשי׃

²³ והוא ישוע בהחלו היה כבן שלשים שנה ויחשבהו לבן יוסף בן עלי׃

²⁴ בן מתת בן לוי בן מלכי בן יני בן יוסף׃

²⁵ בן מתתיה בן אמוץ בן נחום בן חסלי בן נגי׃

²⁶ בן מחת בן מתתיה בן שמעי בן יוסף בן יודה׃

²⁷ בן יוחנן בן רישא בן זרבלל בן שאלתיאל בן גרי׃

²⁸ בן מלכי בן אדי בן קוסם בן אלמדם בן ער׃

²⁹ בן יוסי בן אליעזר בן יורים בן מתת בן לוי׃

³⁰ בן שמעון בן יהודה בן יוסף בן יונם בן אליקים׃

³¹ בן מליא בן מינא בן מתתה בן נתן בן דוד׃

³² בן ישי בן עובד בן בעז בן שלמון בן נחשון׃

³³ בן עמינדב בן ארם בן חצרון בן פרץ בן יהודה׃

³⁴ בן יעקב בן יצחק בן אברהם בן תרח בן נחור׃

³⁵ בן שרוג בן רעו בן פלג בן עבר בן שלח׃

³⁶ בן קינן בן ארפכשד בן שם בן נח בן למך׃

³⁷ בן מתושלח בן חנוך בן ירד בן מהללאל בן קינן׃

³⁸ בן אנוש בן שת בן אדם בן אלהים׃