304. Quod Dominus univerit Divinum Verum Divino Bono, ita Humanum suum ipsi Divino.

Quod Dominus sicut alius homo instructus sit (Arcana Coelestia 1457, 1461, 2523, 3030).

Quod Dominus successive progressus sit ad unionem cum Patre (Arcana Coelestia 1864, 2033, 2632, 3141, 4585, 7014, 10076).

Quod quantum Dominus unitus est Patri, tantum locutus sit ut cum Se Ipso, et quod alioqui sicut cum alio (Arcana Coelestia 1745, 1999, 7058).

Quod Dominus ex propria potentia univerit Humanum Divino (Arcana Coelestia 1616, 1749, 1753, [1752?], 1813, 1921, 2025, 2026, 2523, 3141, 5005, 5045, 6716).

Quod Dominus univerit Divinum Verum, quod Ipse, cum Divino Bono quod in Ipso (Arcana Coelestia 10047, 10052, 10076).

Quod unitio reciproca fuerit (Arcana Coelestia 2004, 10067).

Quod Dominus cum e mundo abivit, Humanum suum fecerit Divinum Bonum (Arcana Coelestia 3194, 3210, 6864, 7499, 8724, 9199, 10076).

Ita quod exiverit ex Pater, et quod redierit ad Patrem (Arcana Coelestia 3194, 3210).

Quod sic unus factus sit cum Patre (Arcana Coelestia 2751, 3704, 4766).

Quod Dominus in unitionem cum ipso Divino, quod erat in Ipso, spectaverit Sui conjunctionem cum genere humano (Arcana Coelestia 2034).

Quod post unitionem Divinum Verum procedat a Domino (Arcana Coelestia 3704, 3712, 3969, 4577, 5704, 7499, 8127, 8241, 9199, 9398).

Quomodo Divinum Verum procedit (illustratum, Arcana Coelestia 7270, 9407).

Nisi Divinum fuisset in Humano Domini ex conceptione, quod Humanum non potuisset uniri ipsi Divino, ob ardorem infiniti Amoris, in quo est ipsum Divinum (Arcana Coelestia 6849).

Quod ideo nusquam aliquis angelus uniri possit ipsi Divino, nisi ad distantiam et per obvelationem; quod alioqui consumeretur (Arcana Coelestia 6849).

Quod Divinus Amor talis sit (Arcana Coelestia 8644).

Inde constare potest quod Humanum Domini non fuerit sicut humanum alius hominis (Arcana Coelestia 10125, 10826).

Quod unio Ipsius cum Patre, ex quo anima Ipsius, non fuerit sicut inter duos, sed sicut inter animam et corpus (Arcana Coelestia 3737, 10824).

Quod unio dicatur de Humano Domini cum Divino, at conjunctio de homine cum Divino (Arcana Coelestia 2021).

7270. ‘Tu loqueris omne quod praecepero tibi, [et Aharon frater tuus loquetur ad Pharaonem]’: quod significet receptionem influxus Divini et communicationem ¹ , constat ex repraesentatione ‘Moschis’ qui loquetur, quod sit Divinum Verum, et ex repraesentatione ‘Aharonis’ ² quod sit doctrina inde, de quibus n. 7089; ex significatione ‘loqui’ quod sit influxus et ejus receptio, de qua n. 5797; et ex significatione ‘praecipere’ quod etiam sit influxus, de qua n. 5486, 5732, hic receptio influxus; ex his patet quod per ‘loqui’ significetur influxus mediatus Divini Veri in doctrinam, hoc est, ³ apud docentem, nam intelligitur quod Moscheh, qui est Divinum Verum, loqueretur quod praeciperet Jehovah, ad Aharonem, qui est doctrina seu docens, ita ad illum qui communicaret; et quod per praecipere significetur influxus immediatus Divinus in ⁴ Divinam Legem, quae repraesentatur per ‘Moschen’.

[2] Quomodo haec intelligenda sunt, constare potest ex illis quae prius n. 7009, 7010, dicta sunt, quod nempe Moscheh repraesentet verum quod immediate a Divino procedit, et quod Aharon repraesentet verum quod mediate; qui non scit quomodo cum ordine in successivis se habet, nec scire potest quomodo cum influxu; paucis ideo dicendum: verum quod immediate a Domino procedit, hoc quia ex Ipso Infinito Divino est, nullatenus potest recipi ab aliqua substantia viva quae finita, ita non ab aliquo angelo; quapropter ⁵ creaverat Dominus successiva per quae ut media communicari posset ⁶ Divinum Verum immediate procedens; ⁷ sed primum ex hoc successivum Divino plenius est quam ut adhuc recipi possit ab aliqua substantia viva quae finita, ita ab aliquo angelo ⁸ ; idcirco Dominus adhuc creavit successivum, per quod Divinum Verum immediate procedens quoad aliquam partem ⁹ receptibile esset; hoc successivum est verum Divinum quod in caelo est; prima bina sunt supra caelos et sunt quasi cingula radiosa ex flammeo ¹⁰ quae circumdant Solem, Qui est Dominus; talis est ordo successivus usque ad caelum Domino proximum, quod est caelum tertium ubi ¹¹ illi qui innocentes et sapientes; inde continuantur ¹² successive usque ad caelum ultimum, et a caelo ultimo usque ad sensuale et corporeum hominis, quod postremo recipit influxum;

[3] ex his constat quod continuae successiones sint a Primo, hoc est, a Domino, usque ad ultima quae sunt apud ¹³ hominem, immo ad ultima quae sunt in natura; ultima quae apud hominem, sicut et in natura, sunt pigra respective et inde frigida, et sunt communia respective ac inde obscura; inde etiam patet ¹⁴ quod per successiones illas sit nexus continuus omnium cum Primo Esse; secundum successiones illas ¹⁵ se habet influxus; nam Divinum Verum quod immediate procedit a Divino Bono, influit successive; et in via seu circa quodlibet novum successivum fit ¹⁶ communius, ita crassius et obscurius, et fit lentius, ita pigrius et frigidius; ex his ¹⁷ liquet qualis est Divinus Ordo successivorum, ac inde influxuum.

[4] Sed probe sciendum quod verum ¹⁸ Divinum quod influit in tertium caelum Domino proximum etiam simul absque ¹⁹ successiva formatione influat usque in ultima ordinis, et ibi ²⁰ a Primo immediate quoque regat et provideat omnia et singula; inde successiva in suo ordine et nexu continentur. Quod ita sit, etiam aliquatenus constare potest a regula eruditis in mundo nec ignota, quod substantia, quae substantia, sit modo unica, et quod reliqua sint formationes inde, et quod in formationibus unica illa substantia regnet, ²¹ non modo ut forma sed etiam ut non forma, prout in sua origine; nisi ita esset, formatum nequaquam posset subsistere et agere; sed haec intelligenti sint dicta.

Footnotes: