257. Quod Verbum nec intelligatur nisi per Doctrinam ex Verbo.

Quod doctrina ecclesiae erit ex Verbo (Arcana Coelestia 3464, 5402, 6832, 10763, 10765).

Quod Verbum absque doctrina non intelligatur (Arcana Coelestia 9025, 9409, 9424, 9430, 10324, 10431, 10582).

Quod vera doctrina sit lucerna illis qui legunt Verbum (Arcana Coelestia 10401, [10400?],).

Quod genuina doctrina erit ab illis qui in illustratione sunt a Domino (Arcana Coelestia 2510, 2516, 2519, 2424, [9424?], 10105).

Quod Verbum per doctrinam ab illustrato factam intelligatur (Arcana Coelestia 10324).

Quod qui in illustratione sunt, ex Verbo sibi faciant doctrinam (Arcana Coelestia 9382, 10659).

Discrimen inter illos qui docent et discunt ex doctrina ecclesiae, et inter illos qui ex solo sensu litterae, quale (Arcana Coelestia 9025).

Quod qui in sensu litterae absque doctrina sunt, in nullum intellectum veniant de veris Divinis (Arcana Coelestia 9409, 9410, 10582).

Quod in plures errores cadant (Arcana Coelestia 10431).

Quod qui in affectione veri propter verum sunt, cum adulti fiunt, et ex suo intellectu videre possunt, non simpliciter maneant in doctrinalibus suae ecclesiae; sed quod scrutentur num vera sint ex Verbo (Arcana Coelestia 5402, 5432, 6047).

Quod alioqui foret cuivis verum ex alio, et ex natali solo, sive natus Judaeus sive Graecus (Arcana Coelestia 6047).

Quod usque quae fidei facta sunt ex sensu litterali Verbi non exstinguenda sint, nisi post plenam intuitionem (Arcana Coelestia 9039).

Quod vera doctrina ecclesiae sit doctrina charitatis et fidei (Arcana Coelestia 2417, 4766, 10763, 10765, [10764?],).

Quod doctrina fidei non faciat ecclesiam, sed vita fidei quae est charitatis (Arcana Coelestia 809, 1798, 1799, 1834, 4468, 4677, [4672?], 4766, 5826, 6637).

Quod doctrinalia nihil sint, nisi vivatur secundum illa (Arcana Coelestia 1515, 2049, 2116).

Quod hodie in ecclesiis doctrina fidei sit, et non charitatis; et quod doctrina charitatis rejecta sit in scientiam, quae vocatur theologia moralis (Arcana Coelestia 2417).

Quod ecclesia esset una, si agnoscerentur pro hominibus ecclesiae ex vita, ita ex charitate (Arcana Coelestia 1285, 1316, 2982, 3267, 3445, 3451, 3452).

Quantum valet doctrina charitatis prae doctrina fidei separatae a charitate (Arcana Coelestia 4844).

Quod in ignorantia de caelestibus sint qui non sciunt aliquid de charitate (Arcana Coelestia 2435).

Qui modo habent doctrinam fidei et non simul charitatis, in quot errores labuntur (Arcana Coelestia 2383, [2388?], 2417, 3146, 3325, 3412, 3413, 3416, 3773, 4672, 4730, 4783, 4925, 5351, 7623-7677, [7627?], 7752-7762, 7790, 8094, 8313, 8530, 8765, 9186, 9224, 10555).

Quod illi qui solum in doctrina fidei sunt, et non in vita fidei, quae est charitas, olim dicti fuerint praeputiati seu Philisthaei (Arcana Coelestia 3412, 3413, 8093).

Quod apud antiquos fuerit doctrina amoris in Dominum et charitatis erga proximum, et quod doctrina fidei inserviverit ei (Arcana Coelestia 2417, 3419, 4044, 4955).

Quod doctrina per illustratum facta postea per rationalia confirmari possit, et quod sic plenius intelligatur, et quod corroboretur (Arcana Coelestia 2553, 2719, 2720, 3052, 3310, 6047: plura de hac re videantur supra, 51).

Quod illi qui in fide separata a charitate sunt, velint ut doctrinalia ecclesiae simpliciter credantur absque aliqua intuitione rationali (Arcana Coelestia 3394).

Quod confirmare dogma non sapientis sit, sed videre num verum sit antequam confirmatur; et quod hoc fiat apud illos qui in illustratione sunt (Arcana Coelestia 1017, 4741, 7012, 7680, 7950).

Quod lux confirmationis sit lux naturalis, non spiritualis, dabilis etiam apud malos (Arcana Coelestia 8780).

Quod omnia etiam falsa confirmari possint, usque ut appareant sicut vera (Arcana Coelestia 2482, [2480?], 2490, 5033, 6865, 8521).

5432. ‘Exploratores vos’: quod significet quod solum ad captandum lucrum, constat ex significatione ‘exploratorum’ quod hic sit ad captandum lucrum; quod nihil aliud ¹ in sensu interno per ‘exploratores’ significetur, constat ex serie; agitur enim in sensu interno de veris Ecclesiae quod approprianda naturali, et quod appropriari ei nequeant nisi per influxum a caelesti spiritualis per medium; vera illa Ecclesiae sunt ‘filii Jacobi’, seu ‘fratres Josephi’, caeleste spiritualis est ‘Josephus’, et medium est ‘Benjamin’. Quomodo se res habet ² n. 5402 dictum est, quod nempe vera fidei Ecclesiae, quae doctrinalia vocantur, in prima aetate cum addiscuntur, non aliter capiantur et memoriae mandentur quam sicut alia scientifica, et tamdiu manent ut scientifica, usque dum homo incipit ex suo visu intueri illa et videre num vera sint, et cum viderit quod vera sint, quod agere secundum illa velit; illa intuitio et haec voluntas faciunt ut non amplius scientifica sint sed praecepta vitae, et denique vita; ita enim intrant in vitam, cui ³ appropriantur.

[2] Qui ad aetatem adultam ⁴ pervenerunt, et magis qui ad senilem, et vera Ecclesiae quae vocantur doctrinalia, non ex suo visu ⁴ intuiti sunt, et ⁴ viderunt num vera sint, et dein non secundum illa vivere ⁴ voluerunt, ⁴ illi nec aliter ⁴ retinent illa apud se quam sicut reliqua scientifica; sunt modo in naturali ⁴ eorum memoria, et inde in ore; cumque illa ⁴ loquuntur, non ⁴ loquuntur illa ex interiore suo homine seu ex corde sed modo ab exteriore homine, et ex ore; in hoc statu cum est homo, nequaquam potest credere quod vera Ecclesiae vera sint, utcumque sibi videretur quod credat; quod sibi videatur quod credat illa vera esse, est quia fidit aliis, et quae aliorum sunt, apud se confirmavit; ⁵ confirmare quae ab aliis, sive vera sint sive falsa, perfacile est, id enim est opus solius ingenii;

[3] haec vera Ecclesiae, seu illi qui taliter in veris Ecclesiae sunt, significantur per ‘exploratores venientes ad videndum nuditatem terrae’; doctrinalia enim suae Ecclesiae non credunt ex aliqua affectione veri sed ex affectione aucupandi honores vel captandi lucrum, quapropter apud se vix aliquid credunt utplurimum corde negant, ⁶ considerantes doctrinalia illa sicut mercator suas merces; et tunc sibi docti et sapientes apparent quando ex se vident quod non vera sint, et usque persuadere queant vulgo quod vera sint; quod perplures antistites Ecclesiae tales sint, patet manifeste ab illis in altera vita; ibi enim in sphaera suarum affectionum et inde cogitationum sunt, ubicumque vadunt, quae sphaera manifeste percipitur ab aliis, inde qualis affectio veri eis fuerit, et qualis fides, ad apertum sensum noscitur; in mundo hoc non manifestatur, nam ⁷ talium perceptio spiritualis ibi non est, et quia ita, non ipsa manifestant, privarentur enim suo lucro.

[4] Quod exploratores sint, satis constare potest ex eo quod tales apud illos qui in veris ex bono sunt, nihil aliud quaerant quam naevos, ut incusent et damnent; tales sive sint ex ita dictis Papistis, sive ex Reformatis, sive ex Quakeris, sive ex Socinianis, sive ex Judaeis, cum semel confirmarunt apud se doctrinalia suae Ecclesiae, anne ⁸ alii sunt quam exploratores, nam ipsissima vera, si alicubi sunt, rident et damnant, ⁹ vera enim quod vera sint, non capiunt; causa est quia illis non est affectio veri propter verum, minus propter vitam, sed propter lucrum; tales etiam cum legunt Verbum, scrutantur Verbum solum fine confirmandi doctrinalia scientifica propter lucrum, ac ¹⁰ plures eorum scrutantur Verbum ut videant nuditatem terrae, hoc est, ut videant quod Ecclesiae vera non sint vera, sed modo inserviant ad persuadendum aliis quod vera sint, lucrandi causa.

[5] Qui autem in affectione veri sunt propter verum et propter vitam, consequenter propter regnum Domini, illi quidem fidem habent doctrinalibus Ecclesiae, sed usque scrutantur Verbum non propter alium finem quam propter verum, inde illis sua fides et sua conscientia; si quis eis dicit quod manendum in doctrinalibus Ecclesiae ubi nati, cogitant, si nati fuissent in Judaismo, si in Socinianismo, Quaquerismo, Gentilismo Christiano, aut etiam extra Ecclesiam, quod similiter ab illis qui ibi, ita dictum fuisset, et quod ubivis dicatur, hic Ecclesia, hic Ecclesia, hic vera et non alibi; et cum ita, quod scrutandum Verbum cum devota prece ad Dominum, ut illustratio; tales non perturbant aliquem intra Ecclesiam, nec ¹¹ unquam damnant alios, scientes quod usque unusquisque, qui Ecclesia, vivat ex sua fide.

Footnotes: