128. Quis non scit ex Verbo, quod quisque secundum facta sua sortiatur vitam post mortem; aperi Verbum, lege illud, et clare videbis, sed remove tunc cogitationes a fide et a justificatione per illam solam. Quod Dominus in suo Verbo ubivis id doceat, sint haec pauca in testimonium, "Omnis arbor quae non FACIT FRUCTUM BONUM, exscindetur et in ignem conjicietur; quare ex FRUCTIBUS eorum cognoscetis illos," Matthaeus 7:19-20. "Multi dicent Mihi in die illo, Domine, nonne per Nomen tuum prophetavimus, et in Nomine tuo multas virtutes fecimus; sed tunc confitebor illis, non novi vos, discedite a Me operantes INIQUITATEM," Matthaeus 7:22-23. "Omnem 1 qui audit verba mea et FACIT ILLA, comparabo viro prudenti, qui aedificavit domum super petra: at omnis audiens verba mea et NON FACIENS ILLA, comparabitur viro stulto, qui aedificavit domum suam super humo absque fundamento," Matthaeus 7:24, 26, Lucas 6:47-49. 2
[2] "Venturus est Filius hominis 3 in gloria Patris sui, et tunc REDDET UNICUIQUE SECUNDUM FACTA EJUS," Matthaeus 16:27. "Auferetur a vobis Regnum Dei, et DABITUR GENTI FACIENTI 4 FRUCTUS EJUS," Matthaeus 21:43. 5 "Jesus dixit, 'mater mea et fratres mei hi sunt, qui audiunt verbum Dei et FACIUNT ILLUD,'" Lucas 8:21. "Tunc incipietis stare et pulsare januam, dicentes, 'Domine, aperi nobis,' sed respondens dicet vobis, 6 'non novi vos unde sitis, discedite a Me OMNES OPERARII iniquitatis,'" Lucas 13:25-27. "Exibunt qui bona fecerunt in resurrectionem vitae, qui vero MALA FECERUNT, in resurrectionem judicii," Johannes 5:29.
[3] "Scimus quod PECCATORES Deus non audiat, sed si quis Deum colit, et VOLUNTATEM IPSIUS FACIT, hunc audit," [Johannes] 9:31. "Si haec scitis, beati estis si feceritis illa," Johannes 13:17. "[Si diligis Me, mandata Mea servate.] Qui habet praecepta mea, et FACIT ILLA, ille est qui amat Me, et Ego amabo illum, et ad illum veniam, et mansionem apud illum faciam," Johannes 14:15, 21-23. 7 "Vos amici mei estis, SI FECERITIS quaecunque mando vobis: Ego vos elegi ut fructus FERATIS, et FRUCTUS vester maneat," Johannes 15:14, 16.
[4] "Dominus dixit Johanni, 'Scribe Angelo Ephesinae Ecclesiae, "NOVI OPERA TUA: habeo contra te, quod CHARITATEM priorem reliqueris; AGE POENITENTIAM, ET PRIORA OPERA FAC; si non, movebo candelabrum 8 tuum e loco ejus," '" Apocalypsis 2:1-2, 4-5. "Angelo Ecclesiae Smyrnaeorum scribe, 'novi OPERA TUA,'" Apocalypsis 2:8,[9]. "Angelo Ecclesiae in Pergamo scribe, 'NOVI OPERA 9 TUA,' 10 'POENITENTIAM AGE,'" Apocalypsis 2:[12,] 13, 16. "Angelo Ecclesiae in Thyatiris scribe, 'NOVI OPERA TUA ET CHARITATEM; et OPERA TUA posteriora plura primis," Apocalypsis 2:18-19. 11 "Angelo Ecclesiae in Sardibus scribe, 'NOVI OPERA TUA, quod nomen habeas, quod vivas, sed mortuus es; NON INVENI OPERA TUA PERFECTA CORAM DEO; POENITENTIAM AGE,'" Apocalypsis 3:1-3. "Angelo Ecclesiae quae in Philadelphia scribe, 'NOVI OPERA TUA,'" Apocalypsis 3:7-8. "Angelo Ecclesiae Laodicensium scribe, 'NOVI OPERA TUA; AGE POENITENTIAM,'" Apocalypsis 3:14-15, 19. "Audivi 12 vocem e coelo dicentem, 'scribe, beati mortui, qui in Domino moriuntur a nunc; OPERA 13 ILLORUM SEQUUNTUR ILLOS,'" Apocalypsis 14:13. 14 "Liber apertus est, qui est vitae, et judicati sunt mortui, OMNES SECUNDUM OPERA ILLORUM," Apocalypsis 20:12-13. "Ecce venio cito, et merces mea Mecum, UT DEM UNICUIQUE SECUNDUM OPUS EJUS," Apocalypsis 22:12. Haec in Novo Testamento;
[5] plura adhuc sunt in Veteri, ex quo hoc unicum adducam, "Sta in porta Jehovae, et proclama ibi verbum hoc; sic dixit Jehovah Zebaoth Deus Israelis, 'bonas reddite vias vestras, et Opera vestra; ne confidite vobis super verbis mendacii, dicendo, Templum Jehovae, Templum Jehovae, Templum Jehovae illi; num Furando, Occidendo, et Adulterando, et Jurando per mendacium, deinde venietis, et stabitis coram Me in Domo hac, super qua nominatur Nomen Meum, et dicetis, "erepti sumus," dum facitis abominationes illas; num spelunca latronum facta est Domus haec: etiam Ego, Ecce vidi,' dictum Jehovae," Jeremias 7:2-4, 9-11. 15
Footnotes:
1. Prima editio: Omnis
2. Prima editio: VI:46-49
3. Prima editio: bominis
4. Prima editio: FACIFNTI
5. Prima editio: XXI:53.
6. Prima editio: illis,
7. Prima editio: 24.
8. Prima editio: candelabrum
9. Prima editio: OFRA
10. Prima editio: TUA,"
11. Prima editio habet "Ap:" in loco "Apocalypsis" et "II:26" in loco "2:18,19."
12. Prima editio: Audiui
13. Prima editio: OFERA
14. Prima editio: V:13.
15. Prima editio: VII:1, 3-4, 9-11.
