179. Quia vestes angelorum correspondent intelligentiae illorum, ideo etiam correspondent vero, quoniam omnis intelligentia est ex Divino Vero quapropter sive dicas quod angeli induti sint secundum intelligentiam, sive secundum Divinum Verum, idem est. Quod vestes quorundam coruscent sicut ex flamma, et quorundam splendeant sicut ex luce, est quia flamma correspondet bono, et lux vero ex bono: 1 quod quorundam vestes sint candidae et albae absque splendore, et quorundam diversicolores, est quia Divinum bonum et verum minus fulgent, et quoque varie recipiuntur apud minus intelligentes; 2 candidum etiam et album correspondent vero; 3 et colores varietatibus ejus 4 Quod in intimo caelo sint nudi, est quia in innocentia sunt, et innocentia correspondet nuditati. 5
Footnotes:
1. [Swedenborg's footnote] Quod "vestes" in Verbo significent vera ex correspondentia (1073, 2576, 5319, 5054, 9212, 9216, 9952, 10536).
Quia vera investiunt bonum (5248).
Quod "velamen" significet intellectuale, quia intellectus est recipiens veri (6378).
Quod "vestes candidae ex bysso" significent vera ex Divino (5319, 9469).
Quod "flamma" significet bonum spirituale, et "lux" inde verum ex illo bono (3222, 6832).
2. [Swedenborg's footnote] Quod angeli et spiritus appareant induti vestibus secundum vera, ita secundum intelligentiam (165, 5248, 5954, 9212, 9216, 9812 [9814?] 9952, 10536).
Quod vestes angelorum sint cum splendore, et absque splendore (5248).
3. [Swedenborg's footnote] Quod "candidum" et "album" in Verbo significet verum, quia ex luce in caelo (3301, 3993, 4001 [4007?]).
4. [Swedenborg's footnote] Quod colores in caelo sint variegationes lucis ibi (1042, 1043, 1053, 1624, 3993, 4530, 4742, 4922).
Quod "colores" significent varia quae intelligentiae et sapientiae sunt (4530, 4922, 4677, 9466).
Quod "lapides pretiosi" in Urim et Thummim secundum colores significaverint omnia veri ex bono in caelis (9865, 9868, 9905).
Quod colores quantum trahunt ex rubro, significent bonum; quantum ex albo verum (9476).
5. [Swedenborg's footnote] Quod omnes in intimo caelo sint innocentiae, et quod ideo appareant nudi (154, 165, 297, 2736, 3887, 8375, 9960). Quod innocentia sistatur in caelo per nuditatem (165, 8375, 9960).
Quod innocentibus et castis nuditas non sit pudori, quia absque scandalo (165, 213, 8375).
