8815. ‘Et vox buccinae ¹ vehemens valde’: quod significet statum caelestem qui circum, constat ex significatione ‘vocis’ seu ‘soni buccinae’ quod sit verum boni caelestis; ‘vox’ ² est verum, et ‘buccina’ est bonum caeleste, ut supra n. 8802; quod sit status caelestis qui circum, est quia Divinum in caelo est in medio seu intimo, hoc est, in supremo ibi; at caelum respective ad angelos est circum seu extra, hoc est, infra, nam quod circum est etiam est extra, et quod extra est etiam est infra; ipsum verum Divinum in caelo significatur per ‘voces et fulgura’, verum autem caeleste seu angelicum Divino ³ adjunctum, quod infra seu circum est, significatur per ‘vocem buccinae’; similiter ac apud Sachariam, Jehovah super illis apparebit, et exibit sicut fulgur telum Ipsius; et Dominus Jehovih buccina clanget, et procedet in procellis meridiei, 9:14:

et apud Davidem,

Ascendit Deus cum clangore, Jehovah cum voce buccinae, Ps. ⁴ 47:6 [KJV Ps. 47:5];

‘clangor’ pro vero boni spiritualis, ‘vox buccinae’ pro vero boni caelestis.

[2] Divinum Verum quod per caelum transit etiam intelligitur per tubas quibus angeli clanxerunt, Apoc. 8:2, 6-8, 12, 13, 9:14;

repraesentatum etiam est verum Divinum e caelo per septem buccinas quibus septem sacerdotes clanxerunt ante arcam seu coram Jehovah, cum muri urbis Jericho caderent, Jos. vi; tum per buccinas quibus insonuerunt trecenti viri, qui cum Guideone, circum castra Midianis, Amaleki, et filiorum orientis, Jud. vii; causa ⁵ quod buccinae ⁶ illum effectum ederent, fuit, ⁷ quia repraesentabant verum Divinum per caelos, quod tale est ut perficiat bonos at destruat malos; quod perficiat bonos, est quia hi recipiunt Divinum Bonum quod est in Vero, at quod destruat malos, est quia hi non recipiunt Divinum Bonum quod inibi; ⁸ muri Jericho' significabant falsa quae defendebant mala, ac ‘Midian, Amalek, et filii orientis, circum quorum castra trecenti viri Guideonis clanxerunt buccinis’ significabant illos qui in malis et inde falsis.

Footnotes:

8802. ‘In trahendo jobel’: quod significet quibus perceptio communis boni caelestis, constat ex significatione ‘in trahendo jobel’, seu quod idem, ‘in audiendo sonum buccinae’, quod sit perceptio communis boni caelestis, per ‘audiri’ enim significatur perceptio, n. 5017, 8361, et per ‘jobel’ seu ‘sonum buccinae’ significatur bonum caeleste; causa quod per ‘sonum buccinae’ seu ‘jobel’ significetur bonum caeleste, est quia instrumenta musica ex sonis ¹ suis correspondeant affectionibus veri ² aut boni, instrumenta chordacea affectionibus veri, et inflatoria affectionibus boni, n. 418-420, 4138, 8337; buccina quia erat instrumentum inflatorium et grandisonum, ³ correspondebat affectioni boni caelestis, quare etiam jubilaeum inde nominatum est, per quod repraesentatum est conjugium ⁴ boni et veri quod in intimo caelo ⁵ ; inde nunc est quod per ‘in trahendo jobel’ significetur quibus perceptio communis boni caelestis.

[2] Per illos qui in perceptione communi boni caelestis ⁶ intelliguntur qui intermedii sunt inter regnum caeleste et regnum spirituale Domini, per quos ideo influxus, communicatio, et conjunctio fit, videatur mox supra n. 8787, 8796; his est extensio usque in societates caelestes, ⁷ quae significatur per quod illi ascendent in montem; intermedii illi repraesentantur per ‘Moschen’, n. 8787, et quoque per ‘Aharonem’, quibus datum est in montem ascendere, vers. 24seq. Quid extensio in sphaeras societatum angelicarum, et quod talis sit extensio quale bonum cuivis, videatur supra n. 8794. Communis perceptio est apud illos qui in spirituali bono sunt, et influxum communem ⁸ boni caeli superioris, hic caeli intimi, recipere possunt; tales ⁹ intelliguntur per illos qui ascendent montem ‘in audiendo jobel’.

Footnotes: