724. "Habente capita septem, et cornua decem," significat intelligentiam ex Verbo principio sanctam, postea nullam, et tandem insaniam, ac potentiam ex Verbo continue multam. - Quod "caput" significet intelligentiam et sapientiam cum de Domino et de Verbo, et in opposito sensu insaniam et stultitiam, 538, 568; ¹ quod "septem" non significent septem, sed omne illud, et dicantur de re sancta, 10, 391; quod "cornu" significet potentiam, 270, et quod "cornua decem" significent potentiam multam, 539; quod per "capita septem" significetur intelligentia principio sancta, postea nulla, et tandem insania, patet a vers. 9, 10, hujus capitis, ubi ab Angelo dicitur quid per "capita septem" significatur, de quibus infra. Ex his patet, quod per "Bestiam habentem capita septem et cornua decem" significetur intelligentia ex Verbo principio sancta, postea nulla, et tandem insania, et potentia ex Verbo continue multa.

Footnotes:

568. "Habentem capita septem," significat insaniam ex meris falsis, similiter ac per "septem capita Draconis" (538).