500. "Bestia ascendens ex abysso faciet bellum cum illis, et vincet illos, et occidet illos," significat quod illi qui in internis doctrinae de sola fide sunt, se opposituri sint, et illa duo Essentialia Novae Ecclesiae impugnaturi, et apud se, et quantum valent apud alios, rejecturi. - Per "Bestiam ascendentem ex abysso" intelliguntur qui ex abysso ascenderunt, et visi sunt sicut Locustae, (9:1-12). Qui quod fuerunt qui in internis doctrinae de sola fide sunt, videatur in Explicatione ibi per "bellum facere" significatur se opponere, et illa duo Essentialia Ecclesiae impugnare, de quo sequitur per "vincere illos et occidere" significatur illa apud se, et quantum valent apud alios, rejicere et exstirpare.

Causa quod illi qui in internis doctrinae de sola fide sunt, duo illa Essentialia impugnaturi et rejecturi sint, est quia apud se confirmaverunt duo illis adversantia, Primum, quod non Dominus, sed quod Deus Pater adeundus sit; et Alterum, quod vita secundum praecepta Decalogi non sit vita spiritualis, sed solum vita moralis et civilis, et hoc confirmant, ne aliquis credat quod salvetur per opera, sed per solam illorum fidem.

Omnes illi qui haec dogmata alte impresserunt mentibus suis in scholis et gymnasiis, postea non recedunt ab illis. Causae sunt tres, hactenus ignotae: - Prima; quod se in societatem cum similibus in mundo spirituali quoad spiritum suum immiserint, ubi plerique sunt satanae, qui unice falsis delectantur, a quibus nullatenus possunt exsolvi, nisi rejiciant falsa illa; quod nec fieri potest nisi immediate adeant Deum Salvatorem, et inchoent vitam Christianam secundum praecepta Decalogi. Secunda causa est, quod credant dari remissionem peccatorum et sic salvationem momento in Actu Fidei, et postea in Statu seu in Progressione per eundem Actum a Spiritu Sancto continuatum, conservatum et retentum separatim a charitatis exercitiis; ac qui semel illa imbuerunt, illi postea nihili faciunt peccata coram Deo, et sic in suis immundis vivunt: et quia talia sciunt argute confirmare per falsificationes Verbi apud ineruditos, et per sophistica apud eruditos, dicitur hic quod "Bestia ex abysso binos illos testes vicerit et occiderit;" sed hoc non fit apud alios, quam apud illos qui amant vivere genio, et feruntur a jucundis concupiscentiarum suarum; hi cum cogitant de salute, corde illis favent, et ambabus manibus amplectuntur fidem illorum, quia sic possunt per aliquas voces cum sono fiduciae enuntiatas salvari, et non opus habere ut attendant ad aliquod vitae suae propter Deum, sed modo propter mundum. Tertia causa est, quod qui fidei istius interna, quae vocantur arcana justificationis, in adolescentia hauserant, postea Ministerio honorato admoti, apud se non cogitent de Deo et Caelo, sed de se et mundo, solum retinendo arcana suae fidei propter famam ut sicut sapientes honorentur, et propter sapientiam digni aestimentur remunerari opibus. Quod hoc sit effectus illius fidei, est quia nihil religionis in illa est; quod ita sit, videatur Tertium Memorabile supra (484). Quod per "bella" in Verbo significentur bella spiritualia, quae sunt impugnationes veri, et fiunt per ratiocinia ex falsis, constat ex his locis:

"Spiritus daemonum exeunt ad congregandum illos in Bellum in die magno Dei Omnipotentis," (Apocalypsis 16:14);

Iratus Draco contra Mulierem, et abivit ut faceret Bellum cum reliquis seminis ejus qui tenebant mandata Dei, et habebant testimonium Jesu Christi," (Apocalypsis 12:17);

Datum est Bestiae Draconis "facere Bellum cum sanctis," (Apocalypsis 13:7);

"Sacrate contra filiam Sionis Bellum, et ascendamus in meridie," (Jeremias 6:4); ¹

"Non ascendistis in rupturas ad standum in Bello in die Jehovae," (Ezechiel 13:5);

"In Schalem habitaculum Dei, et habitatio in Sione, ubi fregit jacula ignita arcus, et Bellum," (Psalm. 76:3(, 4) (B.A. 2-3));

"Jehovah sicut Heros exibit, sicut Vir Bellorum suscitabit zelum," (Esaias 42:13; Psalm. 24:8);

"In die illo erit Jehovah in spiritum judicii, sedenti super judicio, qui repellunt Bellum a porta," (28:(5,) 6);

"Libera me ab homine malo, et a viro violentiarum serva me; toto die congregant ad Bella, exacuunt linguam suam sicut serpentes," (Psalm. 111:2-4 (B.A. 1-3));

"Multi venient in Nomine Meo, dicentes Ego sum Christus, et multos seducent: et audituri estis Bella et rumores Bellorum, videte ne turbemini," (Matthaeus 24:5-6; ² Marcus 13:6-7; ³ Luca 21:8-9). ⁴

Bella regum septentrionis et meridiei, et reliqua apud Danielem 10; 11; 12; non alia bella quam spiritualia significant; praeter "bella" aliis in locis (Ut Esaias 2:3-5; 13:4; 21:14-15; 31:4; Jeremias 49:25-26; Hoschea 2:18; Sacharias 10:5; 14:3; Psalm. 27:3; ⁵ Psalm. 46:9-10 (B.A. 8-9)).

Quoniam per "bella" in Verbo significantur bella spiritualia, ideo ministerium levitarum vocabatur "militia," ut patet ex his:

Mandatum est ut numerarentur Levitae, ad exercendum Militiam, ad faciendum opus in Tentorio conventus, (Numeri 4:23, 35, 39, 43, 47);

"Hoc Levitarum officium ad Militandum Militiam in ministerio Tentorii conventus; sed a filio quinquaginta annorum recedet a Militia ministerii, nec ministrabit amplius," (Numeri 8:24-25);

videatur etiam supra (447), ubi confirmatur ex Verbo, quod "exercitus" significent bona et vera Ecclesiae, et in opposito sensu mala et falsa ejus.

Footnotes:

285. Dicitur "regnabunt super terra," quia per "terram" hic et alibi intelligitur Ecclesia Domini in Caelis et in terris; Ecclesia utrobivis est Regnum Domini: ne itaque quis credat, quod omnes qui a Domino redempti sunt, fiant Reges et Sacerdotes, et quod regnaturi super terra, interest ut ex Verbo demonstretur, quod terra significet Ecclesiam: hoc videri potest ex sequentibus locis:

"Ecce Jehovah evacuans Terram, et exinaniens Terram, et evertet facies ejus: evacuando evacuabitur Terra: lugebit et confundetur Terra habitabilis: Terra prophanabitur sub habitatoribus suis propterea maledictio comedet Terram et exurentur habitatores Terrae, et relictus erit homo rarus: erit in medio Terrae sicut strictura oleae. Cataractae ab alto apertae sunt, et commota sunt fundamenta Terrae: confringendo confracta est Terra: disrumpendo disrupta est Terra: commovendo commota est Terra: titubando titubat Terra sicut ebrius," (Esaj. 24:1-23);

"Ascendit leo ex vepreto ad redigendum Terram tuam in vastitatem: vidi Terram, cum ecce vacuum et inane: dixit Jehovah, vastitas erit tota Terra, propterea lugebit Terra," (Jeremias 4:7, 23-28);

"Quousque lugebit Terra: desolata est tota Terra, quia non vir ponens super cor," (Jeremias 12:4, 11-13);

"Luget et elanguescit Terra, erubuit Libanus et emarcuit," (Esaias 33:9);

Erit Terra in picem ardentem, et vastata," (Esaias 34:9-10);

"Consummationem et decisionem audivi a Domino super universam Terram," (Esaias 28:2, 22);

"Ecce dies Jehovae veniet ad ponendum Terram in vastitatem, et concutietur Terra e loco suo, (Esaias 13:9, 13);

"Commota est et contremuit Terra, et fundamenta montium trepidarunt," (Psalm. 18:8 (B.A. 7)); ¹

"Non timebimus cum mutabitur Terra: cum dederit vocem, liquescet Terra," (Psalm. 46:3-4, 7, 9 (B.A. 2-3, 6, 8));

"Annon intelligitis fundamenta Terrae," (Esaias 40:21, 23)

"Deus deseruisti nos, tremefecisti Terram: sana fracturas ejus, quia commota est," (Psalm. 60:3-4 (B.A. 1-2));

"Liquescent Terra et omnes habitatores ejus: Ego firmabo columnas ejus," (Psalm. 75:4 (B.A. 3)); ²

"Vae Terrae inumbratae alis: ite legati ad gentem conculcatam, cujus Terram depraedati sunt fluvii," (Esaias 18:1-2);

"In excandescentia Jehovae Zebaoth obscurata est Terra," (Esaias 9:18 (B.A. 19)); ³

"Eritis vos Terra beneplaciti," (Malachias 3:12); ⁴

"Dedi Te in foedus populi ad restituendum Terram: cantate Caeli et exulta Terra," (Esaias 49:8, 13);

"Non videbo ⁵ Jah in Terra viventium," (Esaias 38:11);

"Qui dederunt terrorem in Terra viventium," (Ezechiel 32:23-27);

"Nisi crederem videre bonum in Terra vitae," (Psalm. 27:13);

"Beati mites, quia haereditatem Terrae accipient," (Matthaeus 5:5)

"Ego Jehovah faciens omnia, expandens Caelos Solus, extendens Terram a Me Ipso," (Esaias 44:23-24; Sacharias 12:1; Jeremias 10:11-13; 51:15; Psalm. 136:6); ⁶

"Aperiat se Terra, fructificent salutem: sic dixit Jehovah, creans Caelos formans Terram," (Esaias 45:8, 12, 18-19);

"Ecce Ego creans Caelos novos, et Terram novam," (Esaias 65:17; 66:22);

praeter multis aliis in locis, quae si adducerentur, implerent membranam. Causa quod per "terram" significetur Ecclesia, est quia multoties per "terram" intelligitur Terra Canaan, et in illa fuit Ecclesia; "Canaan caelestis" non aliud est: tum quia cum nominatur "terra," Angeli, qui spirituales sunt, non cogitant terram, sed humanum genus quod super illa, et ejus statum spiritualem, et status spiritualis est status Ecclesiae. "Terra" etiam oppositum sensum habet, et in eo significat damnationem, quoniam cum nulla Ecclesia est apud hominem, est damnatio; in hoc sensu nominatur "Terra," (Esaias 14:12; 21:9; 26:19, 21; 29:4; 47:1; 63:6; Threni 2:2, 10; Ezechiel 26:20; 32:24; Numeri 16:29-33; 26:10; et alibi).

Footnotes: