From Swedenborg's Works

 

Apocalypsis Revelata #492

Study this Passage

  
/ 962  
  

492. "Circuminduti saccis," significat luctum interea ob non receptionem veri. - Per "indui sacco" significatur luctus propter devastatum verum in Ecclesia; "vestimenta" enim significant vera (166, 212, 328, 378, 379); 1 quare "indui sacco," qui non est vestis, significat luctum quod non verum, et ubi non verum ibi non est Ecclesia. Filii Israelis luctum repraesentabant per varia, quae ex correspondentiis erant significativa, ut quod cinerem mitterent super caput, quod in pulvere se volutarent, quod super terra sederent diu in silentio, quod se raderent, quod plangerent et ejularent, quod vestes scinderent, et quoque quod "saccos induerent," praeter alia: et singula significabant aliquod malum Ecclesiae apud illos, propter quod puniebantur; et cum puniebantur, per talia repraesentabant paenitentiam, et propter repraesentationem paenitentiae, et simul humiliationis tunc, audiebantur. Quod luctus propter devastatum verum in Ecclesia repraesentatus sit per "induere saccos," videri potest ex his:

"Ascendit leo ex vepreto, exivit e loco suo ad redigendum terram in vastitatem: propter hoc Accingite Saccos, plangite, ejulate," (Jeremias 4:7-8);

"Filia populi Mei, Cinge te Sacco, et volve te in cinere, quia subito veniet vastator super nos," 2 (Jeremias 6:26);

"Vae tibi Chorazin et Bethsaida, quia si in Tyro et Sidone factae fuissent virtutes quae factae sunt in vobis, in Sacco et Cinere paenitentiam egissent," (Matthaeus 11:21; Luca 10:13);

Rex Ninives, postquam audivit verba Jonae, deposuit chlamydem desuper se, et obduxit Saccum, et sedit super cinere et proclamavit jejunium, ac ut Operirentur Saccis homo et bestia, (Jonas 3:5-6, 8).

(Praeter alibi, ut Esaias 3:24; 15:2-3; 22:12; 37:1-2; 50:3; Jeremias 48:37-38; 49:3; Threni 2:10; Ezechiel 7:17-18; 27:31; Daniel 9:3; Joel 1:8, 13; Amos 8:10; Hiob 16:15-16; Psalm. 30:12 (B.A. 11); Psalm. 35:13; Psalm. 69:11-12 (B.A. 10-11); 2 Samuelis 3:31; 1 Regnum 21:27; 2 Regnum 6:30; 19:1-2). 3

Footnotes:

1. 328 pro "318"

2. nos pro "vos"

3. vi. pro "vii."

  
/ 962  
  

From Swedenborg's Works

 

Apocalypsis Revelata #328

Study this Passage

  
/ 962  
  

328. (Vers. 11.) "Et datae singulis stolae albae," significat quod illis data sit Communicatio et Conjunctio cum Angelis qui in Divinis veris erant. -"Vestes" significant vera (166); ac "vestes albae" genuina vera (n, 212); quod haec significentur per "vestes," est quia omnes in Caelis sunt vestiti secundum vera apud illos, et cuique est vestis secundum conjunctionem cum Societatibus Angelicis; quare cum datur conjunctio, apparent illico similiter vestiti; inde est quod per "datae sint singulis stolae albae" significetur quod illis data sit communicatio et conjunctio cum angelis qui in Divinis veris erant. "Stolae," "togae," "pallia," significant vera in communi, quia indumenta communia erant. Qui hanc significationem illorum novit, potest nosse arcana quae in sequentibus latent:

Quod Elias, cum invenit Elisaeum, "projecerit Togam super illum," (1 Regnum 19:19);

Quod Elias per Togam suam diviserit aquas Jordanis, (2 Regnum 2:8);

Similiter Elisaeus, (2 Regnum 2:14);

Quod Toga desuper Elia, cum sublatus est, deciderit, et Elisaeus sustulerit illam, (2 Regnum 2:12-13);

per Eliam enim et Elisaeum repraesentatus est Dominus quoad Verbum, et inde "toga" illorum significabat Divinum Verum Verbi in communi: tum quid significabat Pallium Ephodi Aharonis, super cujus fimbriis malogranata hyacinthini et purpurae, et tintinnabula auri, (Exodus 28:31-35);

quod significaverit Divinum Verum in communi, videantur Arcana Caelestia Londini edita (9825). Similia per "pallia" et "togas" significantur in his locis:

"Descendent desuper thronis suis omnes principes maris, et abjicient Pallia sua," (Ezechiel 26:16);

Scribae et Pharisaei "ut spectentur ab hominibus, magnificant fimbrias Palliorum suorum," (Matthaeus 23:5);

Populus Meus pro hoste sibi statuit propter Vestem, Togam extrahitis a transeuntibus," (Micham 2:8).

(Et alibi.)

  
/ 962