447. (Vers. 16.) "Et numerus exercituum equitatus duae myriades myriadum," significat ratiocinia de sola fide, quibus interiora mentis illorum referta erant, ex mere falsis mali in copia. - Per "exercitus" significantur bona et vera, et in opposito sensu mala et falsa, hic falsa mali, de quibus sequitur; per "equitatum" significantur ratiocinia de sola fide, quia per "equum" significatur intellectus Verbi (298), et quoque intellectus Verbi deperditus (305, 313, 320); ¹ inde per "equitatum" significantur ratiocinia ex intellectu Verbi deperdito, hic de sola fide, quia de iis, qui in illa sunt, agitur; per "duas myriades myriadum" non intelliguntur totidem numero, sed multa copia; quod dicantur "duae" est quia duo praedicantur de bono, et in opposito sensu de malo (322), et "myriades" praedicantur de veris, et in opposito sensu de falsis (287). ² Ex his videri potest, quod per "numerum exercituum equitatus duas myriades myriadum" significentur ratiocinia de sola fide, quibus interiora mentis illorum plena erant, ex mere falsis mali in copia. Quod per "exercitus" in Verbo significentur bona et vera Caeli et Ecclesiae, et in opposito sensu mala et falsa, constare potest ex locis ubi sol, luna, et stellae vocantur "exercitus," et per "solem" significatur bonum amoris, per "lunam" verum fidei, et per "stellas" cognitiones boni et veri, ac vicissim in opposito sensu (51, 53, 332, 413); illa et haec nominantur "exercitus" in his locis:

"Laudate Jehovam omnes Exercitus Ipsius, laudate Ipsum Sol et Luna, Laudate Ipsum omnes Stellae," (Psalm. 148:2-3);

"Manus Meae expanderunt Caelos, et omni Exercitui eorum praecepi," (Esaias 45:12);

"Per Verbum Jehovae Caeli facti sunt, et per spiritum oris Ipsius omnis Exercitus eorum," (Psalm. 33:6); ³

"Absoluti sunt Caeli et Terra, et omnis Exercitus illorum," (Genesis 2:1);

Cornu Hirci "crevit usque ad Exercitum caelorum, et dejecit in terram de Exercitu et stellis, imo usque ad Principem Exercitus extulit se: et Exercitus traditus super juge in praevaricationem, quia projecit veritatem in terram: Sanctus dixit, Quo usque datur Sanctum et Exercitus conculcationi," (Daniel 8:10-14);

"Jehovah edidit vocem Suam coram Exercitu," (Joel 2:11);

"Super tectis domuum suffiverunt omni Exercitui caelorum," (Jeremias 19:13);

Ne incurves te et servias soli, lunae, stellis, et omni Exercitui Caelorum, (Deuteronomius 4:19; 17:3; Jeremias 8:2).

(Similiter Esaias 13:4; 34:4; 40:26; Jeremias 33:22; Sacharias 9:8; Apocalypsis 19:14).

Quoniam per "exercitus Caelorum" significantur bona et vera Caeli et Ecclesiae, ideo Dominus vocatur "JEHOVAH ZEBAOTH," hoc est, Jehovah (Exemrcituu?); et ideo Ministerium Levitarum vocabatur Militia, (Numeri 4:3, 23, 30, 39);

et dicitur apud Davidem:

"Benedicite Jehovae omnes Exercitus Ipsius, Ministri Ipsius facientes voluntatem Ipsius," (Psalm. 103:21).

Mala et falsa in Ecclesia significantur Per "Exercitum Gentium," (Esaias 34:2);

Per "Exercitum Regis septentrionis," quo venit contra Regem meridiei, (Daniel 11:13, 15, 20);

"rex septentrionis" est falsum mali in Ecclesia, et "rex meridiei" est verum boni ibi. Dicitur a Domino,

"Quando videritis Hierosolymam Exercitibus circumdatam, scito quod prope sit devastatio ejus," (Luca 21:20);

per "Hierosolymam" ibi significatur Ecclesia, et per "exercitus" mala et falsa, quae devastabunt eam; agitur ibi de Consummatione saeculi, quae est ultimum tempus Ecclesiae. Mala et falsa significantur per "exercitus" apud Joelem:

"Compensabo vobis annos, quos consumpsit locusta, melolontha, bruchus et eruca, Exercitus magnus, quos misi inter vos," (2:25).

Quod per "locustam" et reliqua significetur falsum in extremis, videatur supra (424).

Footnotes:

424. (Vers. 3.) "Et ex fumo exiverunt Locustae in terram," significat quod ex illis falsa in extremis, qualia sunt illis qui sensuales facti sunt, et omnia vident et judicant ex sensibus et eorum fallaciis. - Falsa in extremis dicuntur, quae sunt in extremis vitae hominis, quae vocantur sensualia, de quibus infra; haec per "locustas" in Verbo significantur; at sciendum est, quod non apparuerint sicut locustae in campis, quae subsultant et devastant prata et sata, sed quod apparuerint sicut pygmei seu homunciones, quod etiam a descriptione illarum patet, ut quod "haberent coronas super capitibus, facies sicut hominum, capillos sicut mulierum, dentes sicut leonum, thoraces ferreos, et super se regem Angelum abyssi." Quod homunciones etiam ab antiquis dicti fuerint "locustae," concludi potest ex his:

Exploratores terrae Canaanis dixerunt "vidimus Nephilim filios Enakim, et fuimus in oculis eorum sicut Locustae," (Numeri 13:33); ¹

Jehovah "Qui habitat super circulo terrae, et habitatores ejus sicut Locustae," (Esaias 40:22). ²

Sed quia falsa in extremis, qualia apud illos sunt, in Verbo significantur per "locustas," ideo vocati sunt "locustae," ut quoque "coronati" et "imperantes," apud Nahum:

"Comedet te ignis, comedet te sicut bruchus; multiplicate sicut bruchus, multiplica te sicut Locusta; coronati tui sicut Locusta, et imperantes tui sicut Locusta locustarum," (3:15, 17). ³

Quod falsa in extremis, quia consumunt vera et bona Ecclesiae nascentia apud hominem, per "locustas" quae consumunt gramina in campis et herbas in agris, significentur, constat ex his locis:

Semen multum educes in agrum, sed consumet illud Locusta," (Deuteronomius 28:38);

"Residuum Erucae comedet Locusta, et residuum Locustae comedet melolontha, et residuum melolonthae comedet bruchus," (Joel 1:4); ⁴

"Compensabo vobis annos quos consumpsit Locusta, melolontha, bruchus et eruca," (Joel 2:25). ⁵

Simile significatur per "locustas in Aegypto," de quibus ita apud Mosen:

"Extendit Moses baculum super terram Aegypti, et ventus orientalis produxit Locustam, et ascendit Locusta super omnem terram Aegypti; ante illum non fuit talis Locusta, et comedit omnem herbam agri;" et extendit Moses baculum, "et conjecta est Locusta in Mare Suph," (Exodus 10:12, ⁶ seq.);

et apud Davidem:

"Dedit brucho proventum eorum, et laborem eorum Locustae," ((Psalm. 88:46 [NCBSP: Psalm. 78:46]; videatur etiam) Psalm. 105:34-35);

per miracula in Aegypto describitur Ecclesiae vastatio, et per hoc miraculum vastatio per falsa in extremis: et extrema vitae hominis, quando clausa sunt interiora a quibus pendeant, sunt infernalia; quare "locustae conjectae sunt in mare Suph," per quod significatur Infernum.

Quoniam pauci hodie sciunt, quid intelligitur per Sensuale, et qualis est sensualis homo, ac "locustae" significant illum, ideo adducentur ex Arcanis nostris Caelestibus de illo sequentia: -

Quod Sensuale sit ultimum vitae mentis hominis, adhaerens et cohaerens quinque sensibus corporis ejus (5077, 5767, 9212, 9216, 9331, 9730); ⁷ Quod is sensualis homo dicatur, qui omnia judicat ex sensibus corporis, et qui nihil credit nisi quod oculis videre et manibus tangere potest, haec dicens esse aliquid, reliqua rejiciens (5094, 7693); Quod interiora mentis ejus, quae vident ex luce Caeli, clausa sint, ut ibi nihil veri, quod Caeli et Ecclesiae est (videatur ⁸ 6564, 6844, 6845); Quod talis homo cogitet in extremis, et non interius ex aliqua luce spirituali (5089, 5094, 6564, 7693); Verbo, quod in crasso lumine naturali sint (6201, 6310, 6564, 6844, 6845, 6612, 6612, 6622, 6624); Quod inde interius sint contra illa quae Caeli et Ecclesiae sunt, sed quod exterius possint loqui pro illis, ardenter secundum dominationem per illa (6201, 6316, 6844, 6845, 6948, 6949); Quod docti et eruditi, qui se confirmaverunt profunde in falsis, et plus qui contra vera Verbi, caeteris sensuales sint (6316); Quod sensuales homines ratiocinentur acriter et solerter, quia cogitatio illorum est tam prope loquelam ut paene in illa, et sicut in labiis, et quia in loquela ex sola memoria ponunt omnem intelligentiam: tum quod quidam ex illis dextre possint confirmare falsa, et quod post confirmationem credant quod vera sint (195, 196, 5700, 10236); Sed quod ex fallaciis sensuum ratiocinentur et confirment, a quibus captatur et persuadetur vulgus (5084, 6948, 6949, 7693); Quod sensuales homines astuti sint et malitiosi prae reliquis (7693, 10236); Quod avari, adulteri, voluptuosi et dolosi, imprimis sensuales sint, tametsi coram mundo non tales apparent (6310); Quod interiora mentis eorum sint foeda et spurca (6201); Quod per illa communicent cum infernis (6311); Quod illi qui in infernis sunt, sensuales sint, et eo plus quo profundius (4623, 6311); Quod sphaera spirituum infernalium se conjungat cum sensuali hominis a tergo (6312); Quod illi qui ratiocinati sunt ex solis sensualibus, et inde contra genuina vera Ecclesiae, ab antiquis dicti fuerint serpentes arboris scientiae (195, 196, 197, 6398, 6399, 10313); ⁹ Porro, sensuale hominis et sensualis homo describitur (10236); et extensio sensualium apud hominem (9731); Quod sensualia ultimo loco esse debeant, et non primo; et quod apud hominem sapientem et intelligentem ultimo loco sint, et subjecta interioribus, at quod apud hominem insipientem primo loco sint, et dominantia; hi sunt qui proprie dicuntur sensuales (5077, 5125, 5128, 7645); Si sensualia ultimo loco sunt, quod per illa aperiatur via ad intellectum, ac elimentur vera per modum extractionis (5580); Quod sensualia illa proxime exstent mundo, et admittant quae e mundo alluunt, et quasi cribrent illa (9726); Quod homo per sensualia illa communicet cum mundo, et per rationalia cum Caelo (4009); Quod sensualia subministrent illa quae inserviunt interioribus mentis (5077, 5081); Quod sint sensualia subministrantia parti intellectuali et subministrantia parti voluntariae (5077); Quod nisi cogitatio a sensualibus elevatur, homo parum sapiat (5089); Quod sapiens homo supra sensualia cogitet (5089, 5094); Quod homo, cum cogitatio ejus supra sensualia elevatur, in lumen clarius veniat, et tandem in lucem caelestem (6183, 6313, 6315, 9407, 9730, 9922); Quod elevatio supra sensualia, et abductio ab illis, antiquis nota fuerit (6313); Quod homo spiritu suo animadvertere possit quae in mundo spirituali fiunt, si abduci possit a sensualibus, et elevari in lucem Caeli a Domino (6622); Causa est, quia corpus non cogitat sed spiritus hominis in corpore: et quantum in corpore, tantum obscure et in tenebris, et quantum non in corpore, tantum clare et in luce; sed in spiritualibus (4622, 6614, 6622); Quod ultimum intellectus sit scientificum sensuale, ac ultimum voluntatis sit jucundum sensuale (9996); Quae differentia inter sensualia communia cum bestiis, et inter sensualia non communia cum illis (10236); Quod sint sensuales non mali, quia interiora illorum non ita clausa sunt, de quorum statu in altera vita (6311).

Footnotes: