447. (Vers. 16.) "Et numerus exercituum equitatus duae myriades myriadum," significat ratiocinia de sola fide, quibus interiora mentis illorum referta erant, ex mere falsis mali in copia. - Per "exercitus" significantur bona et vera, et in opposito sensu mala et falsa, hic falsa mali, de quibus sequitur; per "equitatum" significantur ratiocinia de sola fide, quia per "equum" significatur intellectus Verbi (298), et quoque intellectus Verbi deperditus (305, 313, 320); ¹ inde per "equitatum" significantur ratiocinia ex intellectu Verbi deperdito, hic de sola fide, quia de iis, qui in illa sunt, agitur; per "duas myriades myriadum" non intelliguntur totidem numero, sed multa copia; quod dicantur "duae" est quia duo praedicantur de bono, et in opposito sensu de malo (322), et "myriades" praedicantur de veris, et in opposito sensu de falsis (287). ² Ex his videri potest, quod per "numerum exercituum equitatus duas myriades myriadum" significentur ratiocinia de sola fide, quibus interiora mentis illorum plena erant, ex mere falsis mali in copia. Quod per "exercitus" in Verbo significentur bona et vera Caeli et Ecclesiae, et in opposito sensu mala et falsa, constare potest ex locis ubi sol, luna, et stellae vocantur "exercitus," et per "solem" significatur bonum amoris, per "lunam" verum fidei, et per "stellas" cognitiones boni et veri, ac vicissim in opposito sensu (51, 53, 332, 413); illa et haec nominantur "exercitus" in his locis:

"Laudate Jehovam omnes Exercitus Ipsius, laudate Ipsum Sol et Luna, Laudate Ipsum omnes Stellae," (Psalm. 148:2-3);

"Manus Meae expanderunt Caelos, et omni Exercitui eorum praecepi," (Esaias 45:12);

"Per Verbum Jehovae Caeli facti sunt, et per spiritum oris Ipsius omnis Exercitus eorum," (Psalm. 33:6); ³

"Absoluti sunt Caeli et Terra, et omnis Exercitus illorum," (Genesis 2:1);

Cornu Hirci "crevit usque ad Exercitum caelorum, et dejecit in terram de Exercitu et stellis, imo usque ad Principem Exercitus extulit se: et Exercitus traditus super juge in praevaricationem, quia projecit veritatem in terram: Sanctus dixit, Quo usque datur Sanctum et Exercitus conculcationi," (Daniel 8:10-14);

"Jehovah edidit vocem Suam coram Exercitu," (Joel 2:11);

"Super tectis domuum suffiverunt omni Exercitui caelorum," (Jeremias 19:13);

Ne incurves te et servias soli, lunae, stellis, et omni Exercitui Caelorum, (Deuteronomius 4:19; 17:3; Jeremias 8:2).

(Similiter Esaias 13:4; 34:4; 40:26; Jeremias 33:22; Sacharias 9:8; Apocalypsis 19:14).

Quoniam per "exercitus Caelorum" significantur bona et vera Caeli et Ecclesiae, ideo Dominus vocatur "JEHOVAH ZEBAOTH," hoc est, Jehovah (Exemrcituu?); et ideo Ministerium Levitarum vocabatur Militia, (Numeri 4:3, 23, 30, 39);

et dicitur apud Davidem:

"Benedicite Jehovae omnes Exercitus Ipsius, Ministri Ipsius facientes voluntatem Ipsius," (Psalm. 103:21).

Mala et falsa in Ecclesia significantur Per "Exercitum Gentium," (Esaias 34:2);

Per "Exercitum Regis septentrionis," quo venit contra Regem meridiei, (Daniel 11:13, 15, 20);

"rex septentrionis" est falsum mali in Ecclesia, et "rex meridiei" est verum boni ibi. Dicitur a Domino,

"Quando videritis Hierosolymam Exercitibus circumdatam, scito quod prope sit devastatio ejus," (Luca 21:20);

per "Hierosolymam" ibi significatur Ecclesia, et per "exercitus" mala et falsa, quae devastabunt eam; agitur ibi de Consummatione saeculi, quae est ultimum tempus Ecclesiae. Mala et falsa significantur per "exercitus" apud Joelem:

"Compensabo vobis annos, quos consumpsit locusta, melolontha, bruchus et eruca, Exercitus magnus, quos misi inter vos," (2:25).

Quod per "locustam" et reliqua significetur falsum in extremis, videatur supra (424).

Footnotes:

413. "Et percussa est tertia pars solis, et tertia pars lunae, et tertia pars stellarum, et obtenebrabatur tertia pars illorum," significat quod propter mala ex falsis et falsa ex malis non scirent quid amor, quid fides, et ullum verum. - Per "tertiam partem" significatur omne (400); per "solem" significatur amor (53); per "lunam" significatur intelligentia et fides (332); per "stellas" significantur cognitiones veri et boni ex Verbo (51); per "obtenebrari" significatur non videri et sciri propter mala ex falsis et falsa ex malis.

Mala ex falsis sunt illis qui falsa religionis assumunt, et illa confirmant usque dum apparent sicut vera, et dum vivunt secundum illa, faciunt mala ex falsis, seu mala falsi; falsa autem ex malis sunt illis qui mala ut peccata non reputant, et magis qui per ratiocinia ex naturali homine, et insuper ex Verbo, apud se confirmant quod mala non peccata sint; ipsae confirmationes sunt falsa ex malis, et vocantur falsa mali. Quod "tenebrae" significent illa, est quia lux significat Verum, et exstincta luce fiunt tenebrae; ad confirmationem primum adducentur loca, ubi similia dicuntur quae hic in Apocalypsi de "sole, luna et stellis" et de "tenebris" oriundis ab exstinctione illorum:

"Sol vertetur in tenebras, et Luna in sanguinem, antequam venit dies Jehovae magnus et terribilis," (Joel 3:4 (B.A. 2:31));

"Stellae caelorum et Sidera illorum non lucebunt luce sua, obtenebrabitur Sol in ortu suo, et Luna non splendere faciet lumen suum," (Esaias 13:10; tum videatur 24:23); ¹

"Obtegam cum exstinxero te Caelos, Solem nube obtegam, et Luna non lucere faciet lucem suam, omnia Luminaria, lucis in Caelis atrabo super te, et dabo Tenebras super terra tua," (Ezechiel 32:7-8);

Propinquus est dies Jehovae; "Sol et Luna atrati sunt, et Stellae contrahent Splendorem Suum," (Joel 2:10);

"Statim post afflictionem dierum illorum, Sol obscurabitur, et Luna non dabit lumen suum, et Stellae cadent de Caelo," (Matthaeus 24:29; Marcus 13:24-25).

Quis, qui elevat mentem, non videre potest, quod in his locis non sol, luna et stellae mundi intelligantur. Quod per "tenebras" significentur falsa varii generis, constat ex his:

"Vae desiderantibus diem Jehovae, ille tenebrarum et non Lucis; nonne Tenebrae dies Jehovae et non Lux, Caligo et non splendor," (Amos 5:18, 20);

Dies Jehovae "dies Tenebrarum et Caliginis, dies nubis et obnubilationis," (Zephanias 1:15);

"In die illo despiciet in Terram, quae ecce Tenebrae, et Lux Obtenebrescet in ruinis suis," (Esaias 5:30; 8:22);

"Ecce Tenebrae obtegunt terram, et Caligo populos," (Esaias 60:2);

"Date Jehovae gloriam, antequam Tenebras inducat: exspectamus Lucem, sed ponit illam in Caliginem," (Jeremias 13:16); ²

"Exspectamus Lucem, sed ecce Tenebrae, et non Splendores, in Caliginibus ambulamus; offendimus in meridie sicut in crepusculo, inter vivos sicut mortui," (Esaias 59:9-10);

"Vae ponentibus Tenebras in Lucem, et Lucem in Tenebras," (Esaias 5:20);

"Populus ambulans in Tenebris, vidit Lucem magnam," (Esaias 9:1 (B.A. 2); Matthaeus 4:16); ³

"Ortus ab alto apparuit illis qui in Tenebris et in umbra mortis sedent," (Luca 1:78-79); ⁴

"Si des famelico animam tuam, exorietur in Tenebris Lux tua, et Caligo tua sicut meridies," (Esaias 58:10);

"In die illo oculi caecorum, qui in Caligine et Tenebris, videbunt," (Esaias 29:18; 42:16; 49:9); Jesus dixit, "Ego sum Lux mundi: qui Me sequitur non ambulabit in Tenebris, sed habebit Lucem vitae," (Johannes 8:12);

Ambulate quousque Lucem habetis, ne Tenebrae vos apprehendant: Ego Lux in mundum veni, ut omnis qui credit in Me, in Tenebris non maneat," (Johannes 12:35, 46);

"Quando sedeo in Tenebris, Jehovah, Lux mihi," (Micham 7:8);

"Hoc est judicium, quod Lux venerit in mundum, sed dilexerunt homines magis Tenebras quam Lucem," (Johannes 3:19; 1:4-5);

"Si lumen quod in te Tenebrae sunt, Tenebrae quantae," ((Matthaeus 6:23); Luca 11:34-36);

"Haec est vestra hora, et potestas Tenebrarum," (Luca 22:53);

per "tenebras" in illis locis significatur falsum oriundum vel ex ignorantia veri, vel ex falso principio religionis vel ex vita mali. De illis qui in falsis Religionis, et inde malis vitae sunt, dicit Dominus, quod Ejiciendi sint in Tenebras exteriores, (Matthaeus 8:12; 22:13; 25:30).

Footnotes: