428. "Et cruciatus illarum sicut cruciatus scorpii cum percutit hominem," significat quod hoc sit ex persuasivo illorum. - Hoc sequitur ex nunc ((n.) 427) dictis; per "cruciatum" enim significatur stupor, quem persuasivum eorum inducit intellectui, sicut scorpius corpori cum pungit; "scorpius" significat persuasivum illud (425). In mundo spirituali datur persuasivum, quod aufert intellectum veri, et inducit stuporem et sic dolorem animo, sed hoc persuasivum in mundo naturali ignotum est.

425. "Et data illis potestas; sicut habent potestatem scorpii terrae," significat potentiam persuadendi quod falsa illorum sint vera. - Per "scorpium" significatur lethale persuasivum, et per "Scorpium terrae" persuasivum in rebus Ecclesiae, nam "terra" significat Ecclesiam (285); scorpius enim, cum pungit hominem, inducit membris Stuporem, et si non sanatur, lethum; simile inducit illorum persuasivum intellectui. Tale etiam per "scorpium" significatur in his:

"Ne timeto tibi ab illis et verbis illorum; sunt spinosi; inter Scorpios tu habitas; sunt duri faciebus et obfirmati corde," (Ezechiel 2:4, 6);

Jesus dixit ad septuaginta quos emisit, "Ecce do vobis potestatem calcandi super serpentes et Scorpios, et super omnem potestatem inimici, ut nihil tamen vobis quicquam noceat"Luca 10:19).