208. "Et non scis quod tu sis aerumnosus," significat quod nesciant quod omnia quae de veris et bonis Ecclesiae sciunt et cogitant, ne hilum cohaereant, et quod sint maceriae. - Per "aerumnam" significatur hic non cohaerentia; ita per "aerumnosum" qui absque cohaerentia de rebus Ecclesiae cogitat; causa est, quia illi, de quibus haec dicuntur, nunc negant Deum, Caelum, Vitam aeternam, Sanctitatem Verbi, nunc agnoscunt illa; quare quod una manu exstruunt, altera destruunt; ita sunt sicut qui aedificant domum, et mox diruunt illam; aut sicut qui se vestibus decoris amiciunt, et mox discindunt illas; quare domus illorum sunt rudera, et vestes illorum sunt frusta: talia sunt omnia quae de Ecclesia et de Caelo cogitant; sed hoc nesciunt. Haec intelliguntur per "aerumnas" etiam in sequentibus locis:
"Sapientia tua et scientia tua seduxit te, cum dixisti in corde tuo, Ego et non praeterea, ideo cadet super te Aerumna," (Esaias 47:10-11);
"Aerumna super aerumnam veniet, rex lugebit, et princeps induetur stupore," (Ezechiel 7:26-27);
"rex qui lugebit," et "princeps qui induetur Stupore" sunt qui in veris Ecclesiae sunt.
"Non in ore illorum rectum, in medio illorum Aerumna," (Psalm. 5:10 (B.A. 9)).
Similia per "macerias" significantur, (Jeremias 49:3; Ezechiel 13:10-11; 1 Hoschea 2:6). 2
Footnotes: