160. "Non enim inveni tua opera plena coram Deo," significat quod interiora cultus eorum non conjuncta sint Domino. - Quod per "opera" intelligantur interiora et exteriora, et quod per "Novi opera tua," quod Dominus videat omnia interiora et exteriora hominis simul, videatur supra (76); quae vocantur "plena coram Deo" quando conjuncta sunt Domino. Sciendum est, quod cultus mortuus seu cultus solummodo externus, faciat praesentiam Domini, sed non conjunctionem; at cultus externus, in quo interiora vivunt, facit et praesentiam et conjunctionem; nam conjunctio Domini est cum illis apud hominem quae a Domino sunt, quae sunt vera ex bono, quae nisi in cultu sunt, opera non sunt plena coram Deo, sed sunt vacua: "vacuum" in Verbo dicitur de homine, in quo mere sunt falsa et mala (ut Matthaeus 12:44, et alibi); inde "plenum" dicitur de homine in quo vera et bona sunt.

76. (Vers. 2.) "Novi opera tua," significat quod Ipse videat omnia interiora et exteriora hominis simul. - "Opera" saepius leguntur in Apocalypsi, sed quid per opera intelligitur, pauci sciunt; hoc notum est, quod decem homines possint facere opera quae in externis apparent similia, sed quae usque apud omnes dissimilia sunt, quia ex alio fine et ex alia causa procedunt, ac finis et causa faciunt quod opera vel bona vel mala sint; omne enim opus est mentis opus, inde qualis est mens tale est opus; si mens est charitas, fit opus charitas; si autem mens non est charitas, opus non fit charitas; utrumque usque potest simile apparere in externis. Opera apparent hominibus in externa forma, at vero angelis in interna, et Domino qualia sunt ab intimis ad extrema. Opera in externa forma non aliter apparent quam sicut fructus in superficie, at opera in interna forma apparent sicut fructus intra superficiem, ubi sunt innumerabiles partes edules, et in medio semina in quibus iterum sunt innumerabilia quae longe intra omnem oculorum aciem sunt, imo supra intellectualem hominis sphaeram: talia sunt omnia opera, quae qualia sunt intus, Solus Dominus videt, et quoque ex Domino percipiunt angeli, cum homo illa operatur. Sed de his videantur plura in Sapientia Angelica de Divino Amore et Divina Sapientia (209-220, 277-281) et quoque infra (141, 641, 868). Ex his constare potest, quod per "Novi opera tua" significetur quod Dominus videat omnia interiora et exteriora hominis simul.