822. "Cujus sanata est plaga mortis." Quod significet et sic submotam discordantiam per inventas conjunctiones operum cum fide, constat ex significatione "plagae mortis sanatae" apud bestiam priorem, quod sit discordantia apparenter submota per inventas conjunctiones operum cum fide (de qua supra, n. 786, ubi eadem verba). Dicitur, discordantia submota per inventas conjunctiones operum cum fide; sed quales sunt conjunctiones ab illis inventae, quod nempe sint potius separationes, videatur in loco supra citato.

[2] Quoniam ostensum est quod per Johannem Apostolum in Verbo Evangelistarum significentur bona opera, quae etiam vocantur bona charitatis, et bona vitae, et quod Johannes, quia illa significabat, accubuerit ad pectus Domini, velim in nunc sequentibus ostendere quid sunt bona opera; sed hic modo, quod bona opera in se contineant omnia charitatis et fidei quae sunt apud hominem. Hactenus nemo novit quod in operibus sint omnia vitae hominis, quia apparent solum sicut motus, qui quia apud hominem vivunt, vocantur actiones, et qui fiunt per motus oris, linguae et laryngis, loquelae; sed usque sunt illa, quae [non solum] manifestant charitatem et fidem apud hominem, sed etiam complent et perficiunt illas; et hoc ex causa, quia non fides nec charitas est apud hominem priusquam actualiter existunt, et actualiter existunt in operibus.

[3] Quod in operibus sint omnia fidei et charitatis, quae sunt apud hominem, est quia opera sunt activitates oriundae ex voluntate et ex cogitatione ejus; et harum omnia se egerunt et effundunt in opera, prorsus sicut omnia causae in effectus, ac omnia seminis et arboris in fructus; sunt enim opera complementa earum. Quod ita sit, non apparet coram oculis hominis, sed perceptibiliter coram angelis. Quando homo in exercitio charitatis est, tunc sphaera omnium affectionum et inde cogitationum ejus, sicut tenuis aqua, et quandoque sicut nubes candida vel obscura, apparet circum illum, in qua sphaera sunt omnia mentis ejus in complexu, ex qua cognoscitur homo ab angelis qualis est quoad omnia sua: causa est, quia unusquisque est suus amor, et opera inde faciunt ut amor activus sit; et dum activus fit, effundit se circum illum. Eadem sphaera spiritualis non modo manifestat se coram visu sicut undatio, sed etiam coram visu in variis formis repraesentativis; et hoc adeo, ut ex repraesentativis illis appareat homo, spiritus aut angelus, prorsus qualis est.

[4] Quod opera contineant in se omnia mentis, est quoque causa, quia omnia successiva, quae progrediuntur in suo ordine a supremis ad infima, seu a primis ad ultima, formant in infimis seu in ultimis simultaneum, in quo omnia superiora seu priora coexistunt; sed qualis est ordo successivus et inde ordo simultaneus, videatur supra (n. 595, 666), et in Arcanis Caelestibus (n. ¹ 634, 3691, 4145, ² 5114, 5897, 6239, 6326, 6465, ³ 9215, 9216, 9828, 9836, 10044, ⁴ 10099, 10329, 10335); ac opera sunt ultima hominis oriunda ex interioribus ejus, quae in ordine successivo sunt; ex quibus patet quod in illis coexistant omnia voluntatis et cogitationis hominis, proinde omnia amoris et fidei ejus. Inde nunc est quod toties in Verbo a Domino mandentur opera, et quod homo secundum opera judicandus sit.

[5] Ex his patet qualis homo est, qui separat fidem ab operibus; quod sit absque fide, et quod opera ejus sint mala, scaturientia ex amore sui et mundi, obvelata et circumdata talibus quae fidei sunt, sed quae a malis, quae intus sunt, contaminata et profanata: quare cum homo talis in interiora sua immittitur, quod fit post mortem, dum fit spiritus, tunc omnia quae fidei ejus fuerunt, quae fecerunt peripherias, disjiciuntur et dissipantur. Ex his constare potest unde est quod Johannes, qui repraesentavit bona charitatis seu bona opera, ad pectus Domini accubuerit, quodque secutus Dominum sit, et non Petrus; tum quod post resurrectionem Domini una cum matre Domini habitaverit.

Footnotes:

9836. ‘Duo umeri conjuncti erit illi ad duas extremitates [ejus], et conjungetur’: ¹ quod significet conservationem boni et veri undequaque et in perpetuum omni opera et potentia per unitionem omnimodam, constat ex significatione ‘umerorum’ quod sint omnis vis et potentia, de qua n. 1085, 4931-4937; at ² ponere super umeris, et portare super illis, ut in sequentibus dicitur de binis lapidibus schoham, quibus insculpta erant nomina filiorum Israelis, ³ est conservatio ⁴ boni et veri in perpetuum; per nomina enim filiorum Israelis significantur omnia bona et vera in complexu, de qua re in sequentibus; ex significatione ‘conjuncti esse’ et ‘conjungi’ quod sit unitio omnimoda; et ex significatione ‘duarum extremitatum’ seu ad dextrum et ad sinistrum, quod sit undequaque, de qua n. 8613.

[2] Cum his ita se habet: per ephodum, ut supra ostensum est, repraesentabatur externum regni spiritualis Domini, ita per umeralia ejus, ⁵ quibus impositi erant bini lapides schoham cum nominibus filiorum Israelis, conservatio perpetua boni et veri; perque conjunctionem ephodi super umeris, et quoque ante pectus et post tergum unitio omnimoda; inde constare potest quid significatur per illa quae sequuntur de umeralibus et de sculpturis ibi, quod nempe ⁶ conservatio boni et veri in perpetuum omni opera et potentia, ita conservatio caelorum; lapides illi cum nominibus filiorum Israelis impositi erant umeralibus ephodi, per quod repraesentabatur externum regni spiritualis, ex causa quia omnis conservatio dependet a statu ultimorum, interiora enim omnia ibi desinunt, ⁷ et formant ibi planum in quo subsistant; sunt ultima veluti plantae et pedes quibus totum corpus insistit, et quoque sicut manus et bracchia, per quae corpus potentias suas exercet; etiam corporis vires illuc ⁸ translatae sunt; inde quoque est quod manus et bracchia, tum ⁹ plantae et pedes, correspondeant ultimis caeli; quod in ultimis consistat potentia et robur, repraesentatum est in Antiqua Ecclesia per crines apud Naziraeos, in quibus consistebat illorum robur, ut patet a Simsone, Jud. xiv-xvi; tum sanctitas, n. 3301; quod crinis, qui apud illos erat Naziraeatus, correspondeat ultimis boni et veri, seu bono et vero in ultimis, videatur n. 3301, 5247, 6437.

[3] Quod in ultimis sit potentia, et quoque conservatio interiorum in suo statu, intelligere possunt illi qui sciunt quomodo se habet cum successivis et inde simultaneis in natura, quod nempe successiva tandem in ultimis forment simultaneum, in quo simili ordine sunt collateraliter; quapropter simultanea, quae ultima, inserviunt successivis, quae priora, pro correspondentibus fulcris quibus innituntur, et sic per quae illis conservatio ¹⁰ .

[4] Quod ‘umeri’ significent omnem vim et potentiam in resistendo, ¹¹ frangendo, et agendo, constat apud Ezechielem,

Latere et umero impellitis, et cornibus vestris feritis omnes oves infirmas, donec disperseritis eas foras, 34:21:

apud eundem,

Aegyptus baculus arundinis domui Israelis; quando tenuerunt te manu, confractus es, et perfodisti ¹² illis omnem umerum, 29:6, 7;

‘perfodere omnem umerum’ pro deprivare omni potentia capiendi vera; ‘Aegyptus’ est scientificum perversum quod deprivat:

[5] apud Sachariam,

Renuerunt auscultare, et dederunt umerum refractarium, 7:11;

‘dare umerum refractarium’ pro resistere:

apud Davidem,

Cogitarunt facinus, non praevaluerunt, quoniam pones illis umerum, Ps. 21:12, 13 [KJV Ps. 21:11, 12]; ¹³ 'ponere illis umerum' etiam pro resistere, ita pro potentia: quod ‘umerus’ sit potentia, patet ex repraesentativis in altera vita, ubi illi qui resistunt videntur umerum opponere.

[6] Quod ponere super umeros et portare sit conservare in statu boni et veri in perpetuum omni opera et potentia, constat apud Esaiam,

Gentes adferent filios tuos in sinu, et filias tuas super umero apportabunt, 49:22;

agitur ibi de nova Ecclesia, et per ‘filios’ significantur vera, ac per ‘filias’ bona, ‘apportare super umero’ pro conservare illa; conservatio boni in suo statu etiam repraesentabatur per quod filii Israelis, cum exirent Aegypto, portaverint massam super umero, Exod. 12:34;

et quod filii Kehathi portarent opera sancti super umero, Num. 7:9;

inde est quod Dominus, Qui per correspondentias locutus est, dixerit de ove perdita cum inventa, quod imposuerit super umero suo gaudens, Luc. 15:5; 'ovis perdita et inventa' est bonum apud hominem qui resipiscit.

[7] Quia per ‘portare super umero’ id significabatur, ideo etiam dicitur de auro et argento, quae amant et conservant, quod portent illa super umero suo, Esai. 46:7;

quod etiam portare sit continere in suo statu, videatur n. 9500. Ex his patet quid significaverit quod nomina filiorum Israelis insculpta binis lapidibus schoham posita fuerint super umeralibus ephodi, et quod dicatur quod Aharon feret seu portabit illa super duobus umeris suis ad recordationem, vers. 12 Quod ‘portare super umero’ cum de subjectione, significet servitium, videatur Gen. 49:15; Ps. 81:7 ¹⁴ [KJV 6]; Esai. 9:3 ¹⁵ [KJV 4], 10:27; Matth. 23:4; Zeph. 3:9; at cum de imperio, quod significet summam potestatem, Esai. 9:5 [KJV 6], 22:22.

Footnotes: