72. (Vers. 16.) "Et habens in dextra sua manu stellas septem." - Quod significet cognitiones boni et veri omnes ab Ipso, constat ex significatione "habere in dextra sua manu", quod sit ab Ipso; "manus" enim significat potentiam, et inde quicquid est apud illum, ita quoque quicquid ab illo; quod "dextra manus" dicatur, est quia "dextra manus" significat potentiam boni per verum; (quod "manus" significet potentiam, videatur n. 878, 3091, 4931-4937, 6947, ¹ 10019; et inde quod significet quicquid apud illum, ita quoque quicquid ab illo, n. 9133, 10019, 10405; quod "dextra manus" significet potentiam boni per verum, n. 9604, 9736, 10061; et quod "dextra Jehovae" significet Divinam potentiam Domini, ita omnipotentiam, n. 3387, 4592, 4933, 7518, 7673, 8281, 9133, 10019); et ex significatione "stellarum", quod sint cognitiones boni et veri (de qua sequitur); et ex significatione "septem", quod sint omnes (de qua supra, n. 20, 24).

[2] Quod "stellae" significent cognitiones boni et veri, ita bona et vera, est ex apparentia in mundo spirituali; ibi enim Dominus apparet ut Sol, et angeli e longinquo ut stellae; quod angeli ita appareant, est ex receptione lucis ex Domino ut Sole, ita ex receptione Divini Veri quod a Domino, nam hoc est lux caeli. Inde est quod dicatur apud Danielem,

"Intelligentes fulgebunt sicut splendor expansi, et justificantes multos ut stellae in aeternum" (12:3);

"intelligentes" sunt qui in veris, et "justificantes" qui in bonis (videatur in opere De Caelo et Inferno 346-348).

[3] Cum notum est (aliquibus) quod "sol" significet Dominum quoad Divinum Amorem, ita quoque Divinum Amorem a Domino, et quod "stellae" significent vera ecclesiae et illorum cognitiones, illi scire possunt quid in Verbo significatur per quod "sol obscurabitur", et quod "stellae non lucebunt", et quoque quod "cadent e caelo"; et praeterea quid "stellae" significant alibi in Verbo ubi nominantur; ut in sequentibus his locis:

- Apud Esaiam,

Ponam "terram in vastitatem, ut peccatores ejus perdat ex ea: stellae caelorum et sidera eorum non lucebunt luce sua; obtenebrabitur sol in ortu suo, et luna non splendere faciet lucem suam" (13:9, 10):

agitur ibi de vastatione ecclesiae, quae est cum non amplius bonum amoris et vera fidei; "terra" quae in vastitatem: ponetur est ecclesia; quod "terra" sit ecclesia, videatur supra (n. 29).

[4] Apud Ezechielem,

"Obtegam cum exstinxero te (caelos), et atrabo stellas, solem nube obtegam, et luna non lucere faciet lucem suam; omnia luminaria lucis .... atrabo super te, et dabo tenebras super terra" (32:7, 8);

"tenebrae super terra", sunt falsa in ecclesia.

Apud Joelem,

"Sol et luna atrati erunt, et stellae contrahent splendorem suum" (2:10, 11 ; cap. 4:15 [B.A. Joel 3:15);

apud Matthaeum,

In consummatione saeculi "post afflictionem dierum sol obscurabitur, luna non dabit lucem suam, et stellae cadent de caelo, et virtutes caelorum commovebuntur" (24:29; Matthaeum 13:24);

apud Danielem,

Ex uno de cornibus hirci caprarum "exivit cornu unum de exiguo, et crevit valde versus meridiem, et versus ortum, et versus decus, et crevit versus exercitum caelorum, et dejecit .... de exercitu et de stellis, et conculcavit eos; immo usque ad Principem exercitus extulit se" (8:9-11).

"exercitus caelorum" sunt bona et vera ecclesiae in complexu (n. 3448, 7236, 7988, 8019); in specie, quae pugnant contra falsa (n. 7277 ² ); inde Jehovah dicitur "Jehovah Zebaoth", hoc est, Exercituum (n. 3448, 7988).

[5] In Apocalypsi,

Draco cauda "traxit tertiam partem stellarum caeli in terram" (12:4);

"stellae" etiam ibi sunt bona et vera ecclesiae et cognitiones eorum; "tertia pars" est plurima pars; quid autem "draco", dicetur in sequentibus. Alibi,

"Stellae caeli ceciderunt in terram" (Apocalypsis 6:13);

alibi,

"Stella e caelo lapsa est in terram" (Apocalypsis 9:1);

alibi,

"Cecidit e caelo stella magna, ardens velut lampas; cecidit in tertiam partem fluviorum et in fontes aquarum" (Apoc. 8:10 ³ );

quia "stellae" significant vera et bona ecclesiae, et cognitiones eorum, per "cadere illas e caelo" significatur quod illa pereant.

Apud Davidem,

Jehovah "numerat numerum stellarum, omnibus nomina vocat" (Psalmus 147:4);

apud eundem,

"Laudate Jehovam sol et luna, laudate Ipsum omnes stellae lucis" (Psalmus 148:3);

in Libro Judicum,

"Venerunt reges, .... pugnarunt e caelo, pugnarunt stellae de viis suis" ([5:19,] 20).

Quoniam angeli in caelo spirituali lucent ut stellae, et quoniam omnia vera et bona quae apud illos sunt a Domino, ideo Dominus sicut vocatur "Angelus" etiam vocatur "Stella"; ut apud Mosen,

"Orietur Stella ex Jacobo, et Sceptrum surget ex Israele" (Numeri 24:17);

et in Apocalypsi,

"Jesus .... Stella splendida et matutina" (22:16).

Inde patet unde erat quod

Sapientes ex oriente viderint stellam, et secuti illam, et quod illa steterit ubi Jesus erat natus (Matthaeus 2:1, 2, 9).

Ex his nunc sciri potest quid significatur per "septem stellas" quae in dextra manu Filii hominis, qui ibi est Dominus quoad Divinum Humanum (videatur supra, n. 63)

Footnotes:

10061. ‘Et dabis super auriculam auris Aharonis, et super auriculam auris filiorum ejus dextrae’: quod significet omne perceptivum Divini Veri procedentis ex Divino Bono Domini in caelis, constat ex significatione ‘sanguinis qui dabatur super auriculam auris’ quod sit Divinum Verum in caelis et in Ecclesia procedens ex Divino Bono Domini, de qua nunc supra n. 10060; ex significatione ‘auris’ quod sit perceptivum, de qua n. 9397, hic perceptivum Divini Veri ¹ in caelis et in Ecclesia, nam omne perceptivum ibi est illius ² ; in specie hic intelligitur perceptivum in regno caelesti ³ , nam ibi ⁴ percipitur verum ex bono, videantur citata n. 9277; ex significatione ‘auriculae’, quae est extremum auris, quod sit totum seu omne, nam sicut per primum seu supremum significatur totum seu ⁵ omne, ita quoque per ultimum seu extremum, videatur supra n. 10044; et ex significatione ‘dextrae auris’ quod sit perceptivum veri ex bono; quod ‘auris dextra’ id sit, est causa quia illa quae a dextro latere hominis sunt correspondent bono ex quo vera, et quae a sinistro, correspondent veris per quae bonum, n. 9604 ⁶ , 9736; ita in cerebro, ita in facie et in organis sensoriis ibi, ita in pectore, ita in lumbis, ac ita in pedibus;

[2] qui hoc arcanum non scit nequaquam scire potest cur mandatum ⁷ quod sanguis daretur super auriculam auris dextrae, super pollicem manus dextrae, et super pollicem pedis dextri Aharonis et filiorum ejus; et quod ex ariete hoc praeter adipem armus dexter adoleretur super altari, de quo in sequentibus hujus capitis, vers. 22,, 25;

similiter quod sanguis e sacrificio daretur super auriculam auris dextrae mundandi a lepra, ac super pollicem manus dextrae, et super pollicem pedis dextri ejus; et quod sacerdos oleum ex logo funderet super volam suam sinistram, ac intingeret digitum dextrum oleo quod super vola ejus sinistra, et spargeret id digito suo dextro septem vicibus coram Jehovah, Lev. 14:14-18, 25-28. Nec scire potest quid significat quod Dominus dixerit ad discipulos cum piscarentur, quod mitterent rete in dextras partes navigii, et cum miserunt, quod tantum ceperint, ut prae multitudine piscium non valuerint trahere rete, Joh. 21:6;

per hoc repraesentabatur quod ex bono agere et docere sit concludere innumerabilia quae veri sunt, non autem vicissim. Illi etiam qui in veris sunt ex bono, intelliguntur per oves quae a dextris, at ⁵ qui in veris sunt et non ex bono, intelliguntur per hircos qui a sinistris, Matth. 25:32.

[3] Per ‘dextram’ etiam intelliguntur qui in luce veri sunt ex bono, apud Davidem,

Tui caeli, et Tua terra; orbem et plenitudinem ejus Tu fundasti, septentrionem et dextram Tu creasti, Ps. 89:[Ps. 89:12, ] 13 [KJV 11, 12];

per ‘caelos’, ‘terram’, et ‘orbem’, significatur Ecclesia, n. 9325, per ‘plenitudinem’ omne verum et bonum, quae faciunt Ecclesiam, per ‘septentrionem’ illi ibi qui in statu obscuro sunt quoad verum, n. 3708, et per ‘dextram’ illi qui in luce veri sunt ex bono, ita simile quod per meridiem, n. 9642. Inde constare potest quid per ‘sedere a dextris Dei’, ubi de Domino, significatur, Ps. 110:1, 5; Matth. 26:63, 64; Marcus 12:36, 14:61, 62; Luc. 20:42, 43;

quod nempe Divina Potentia per Divinum Verum procedens ex Divino Bono Ipsius, n. 3387, 4592, 4933, 7518, 8281, 9133.

[4] Quoniam pleraque in Verbo etiam oppositum sensum habent, ita quoque dextrum et sinistrum, et in eo sensu ‘dextrum’ significat malum ex quo falsum, et ‘sinistrum’ falsum per quod malum, ut apud Sachariam,

Vae pastori nihili deserenti gregem! gladius super bracchio ejus, et super oculo dextro ejus; bracchium ejus arescendo ⁸ arefiet, et oculus dexter ejus caligando caligabit, 11:17;

‘bracchium’ ibi pro potentia veri applicati ad confirmandum malum, de qua ⁹ potentia quia est nihili, dicitur quod ‘arescendo arefiet’; et ‘oculus dexter’ est scientia boni applicati ad confirmandum falsum, de qua ¹⁰ scientia, quia ¹¹ est nihili, dicitur quod ‘caligando caligabit’; ‘pastor’ est qui docet vera, et per illa ducit ad bonum, n. 343, ¹² 3795, 6044, inde ‘pastor nihili’ est qui docet, ac ¹³ ducit ad malum ‘bracchium’ est potentia quae veri ex bono, n. 4931, 4937, 7205, at ‘bracchium pastoris nihili’ est nulla potentia; ‘oculus’ est intellectus et perceptio veri, n. 4403-4421, 4523-4534, 9051, at ‘oculus dexter pastoris nihili’ est scientia boni absque intellectu et perceptione ejus, quia applicatur ad falsum; ‘caligo’ est falsum ex malo, n. 7711:

[5] apud Matthaeum, Jesus dixit, Si oculus tuus dexter scandalizaverit te, erue illum, et abjice abs te; et si dextra tua scandalizaverit te, amputa illam et abjice abs te; melius est tibi [ut] unum membrorum tuorum pereat, et non totum corpus tuum conjiciatur in gehennam, 5:29, 30;

‘oculus dexter’ est intellectus et fides falsi ex malo, et ‘dextra’ est ipsum falsum ex malo; quisque scire potest quod hic non oculus per oculum intelligatur, et non dextra per dextram, et quod oculus scandalizans non ¹⁴ eruendus, et dextra scandalizans non amputanda, nam inde nihil salutis homini:

apud Johannem, Bestia dedit omnibus ¹⁵ characterem super manum dextram, aut super frontes eorum, ¹⁶ Apoc. 13:16;

‘dextra’ hic est falsum ¹⁷ ex malo, et ‘frons’ est amor mali ex quo falsum; quod ‘frons’ sit amor caelestis, et inde in opposito sensu amor infernalis, videatur n. 9936.

Footnotes: