New Christian Bible Study

The Bible

 

Joel 3

Study

   

1 Quia ecce in diebus illis, et in tempore illo, cum convertero captivitatem Juda et Jerusalem,

2 congregabo omnes gentes, et deducam eas in vallem Josaphat ; et disceptabo cum eis ibi super populo meo, et hæreditate mea Israël, quos disperserunt in nationibus, et terram meam diviserunt.

3 Et super populum meum miserunt sortem ; et posuerunt puerum in prostibulo, et puellam vendiderunt pro vino ut biberent.

4 Verum quid mihi et vobis, Tyrus et Sidon, et omnis terminus Palæstinorum ? numquid ultionem vos reddetis mihi ? et si ulciscimini vos contra me, cito velociter reddam vicissitudinem vobis super caput vestrum.

5 Argentum enim meum et aurum tulistis, et desiderabilia mea et pulcherrima intulistis in delubra vestra.

6 Et filios Juda et filios Jerusalem vendidistis filiis Græcorum, ut longe faceretis eos de finibus suis.

7 Ecce ego suscitabo eos de loco in quo vendidistis eos, et convertam retributionem vestram in caput vestrum.

8 Et vendam filios vestros et filias vestras in manibus filiorum Juda, et venundabunt eos Sabæis, genti longinquæ, quia Dominus locutus est.

9 Clamate hoc in gentibus, sanctificate bellum, suscitate robustos : accedant, ascendant omnes viri bellatores.

10 Concidite aratra vestra in gladios, et ligones vestros in lanceas. Infirmus dicat : Quia fortis ego sum.

11 Erumpite, et venite, omnes gentes de circuitu, et congregamini ; ibi occumbere faciet Dominus robustos tuos.

12 Consurgant, et ascendant gentes in vallem Josaphat, quia ibi sedebo ut judicem omnes gentes in circuitu.

13 Mittite falces, quoniam maturavit messis ; venite, et descendite, quia plenum est torcular, exuberant torcularia : quia multiplicata est malitia eorum.

14 Populi, populi, in valle concisionis, quia juxta est dies Domini in valle concisionis.

15 Sol et luna obtenebrati sunt, et stellæ retraxerunt splendorem suum.

16 Et Dominus de Sion rugiet, et de Jerusalem dabit vocem suam, et movebuntur cæli et terra ; et Dominus spes populi sui, et fortitudo filiorum Israël.

17 Et scietis quia ego Dominus Deus vester, habitans in Sion monte sancto meo ; et erit Jerusalem sancta, et alieni non transibunt per eam amplius.

18 Et erit in die illa : stillabunt montes dulcedinem, et colles fluent lacte, et per omnes rivos Juda ibunt aquæ ; et fons de domo Domini egredietur, et irrigabit torrentem spinarum.

19 Ægyptus in desolationem erit, et Idumæa in desertum perditionis, pro eo quod inique egerint in filios Juda, et effuderint sanguinem innocentem in terra sua.

20 Et Judæa in æternum habitabitur, et Jerusalem in generationem et generationem.

21 Et mundabo sanguinem eorum, quem non mundaveram ; et Dominus commorabitur in Sion.

   

From Swedenborg's Works

 

Apocalypsis Revelata #51

Study this Passage

  
/ 962  
  

51. (Vers. 16.) "Et habens in dextra Sua manu Stellas septem," significat omnes cognitiones boni et veri in Verbo, quae inde apud angelos Caeli et apud homines Ecclesiae sunt. - Circum angelos, cum infra Caelos sunt, apparent sicut stellulae in multa copia; similiter circum spiritus, qui, dum in mundo vixerunt, cognitiones boni et veri, seu vera vitae et doctrinae sibi ex Verbo acquisiverunt: at stellulae illae apparent fixae apud illos qui in genuinis veris ex Verbo sunt, sed erraticae apud illos qui in veris falsificatis sunt. De his stellulis, tum de stellis apparentibus in expanso ibi, mirabilia possum referre, sed hoc non hujus operis est: ex his patet, quod per "Stellas" significentur cognitiones boni et veri ex Verbo. Quod "Filius Hominis haberet illas in dextra Sua manu," significat quod sint a Solo Domino per Verbum: quod "septem" significent omnes, videatur supra (10). Quod cognitiones boni et veri ex Verbo per "Stellas" significentur, videri etiam potest ex his locis:

"Ponam terram in vastitatem; Stellae Caelorum et Sidera illorum non lucebunt luce sua," (Esaias 13:9-10); 1

"terra," quae ponetur in vastitatem, est Ecclesia, qua vastata Cognitiones boni et veri in Verbo non apparent.

"Obtegam cum exstinxero te Caelos, 2 et atrabo Stellas: omnia Luminaria lucis atrabo super te, et dabo tenebras super terra," (Ezechiel 32:7-8);

"tenebrae super terra" sunt falsa in Ecclesia.

"Sol et Luna atrati sunt, et Stellae contraxerunt splendorem," (Joel 2:10; 4:15 (B.A. 3:15)) 3

"Post afflictionem dierum istorum Sol obscurabitur, Luna non dabit lumen suum, et Stellae cadent de Caelo," (Matthaeus 24:29; Marcus 13:24); 4

"Stellae Caeli ceciderunt in terram, sicut ficus abjicit grossos suos, (Apocalypsis 6:13);

"Stella e Caelo lapsa est in terram," (Apocalypsis 9:1);

per "stellas cadentes e caelo" non intelliguntur stellae, sed quod periturae cognitiones boni et veri sint: hoc patet adhuc ex eo, quod Draco detraxerit tertiam partem Stellarum de Caelo, (Apocalypsis 12:4);

tum quod Hircus caprarum dejecerit de Stellis, et conculcaverit illas, (Daniel 8:9-11);

quare in versu sequente apud Danielem etiam dicitur, quod Projecerit Veritatem in terram (vers. 12).

Cognitiones boni et veri per "Stellas" etiam significantur in his locis:

"Jehovah numerat Stellas; omnibus nomina vocat," (Psalm. 147:4);

"Laudate Jehovam omnes Stellae lucis," (Psalm. 148:3); "Pugnarunt Stellae de viis suis," (Judicum 5:20).

Ex his patet, quid intelligitur per haec apud Danielem:

"Intelligentes splendebunt sicut splendor expansi, justificantes multos sicut Stellae in saecula saeculorum," (12:3);

"intelligentes" sunt qui in veris, et "justificantes" qui in bonis.

Footnotes:

1. 9, 10 pro "10"

2. te Caelos pro "te"

3. 10 pro "10, 11"

4. 24 pro "23"

  
/ 962  
  

©2024 New Christian Bible Study Corporation. All rights reserved. Printed from newchristianbiblestudy.org