16. Absque sensu spirituali non aliquis sciret, quare mandatum est Jeremiae Prophetae,
Ut emeret sibi cingulum, et poneret super lumbis, non traduceret illud per aquas, et absconderet in foramine petrae juxta Euphratem (Jeremias 13:1-7).
Quod mandatum sit Esaiae Prophetae,
Quod dissolveret saccum desuper lumbis, et calceum exueret desuper pede suo, ac iret nudus et discalceatus tres annos (Esaias 20:2-3).
Quod mandatum sit Ezechieli Prophetae,
Quod novaculam traduceret super caput suum et super barbam suam, et postea divideret illa, tertiam partem combureret in medio urbis, tertiam percuteret gladio, tertiam dispergeret in ventum; et parum ex illis alligaret in alis, tandem projiceret in medium ignis (Ezechiel 5:1-4).
Quod eidem Prophetae mandatum sit,
Quod cubaret super latere suo sinistro et dextro, 1
trecentos et nonaginta [dies] et quadraginta dies; et faceret sibi placentam ex triticis, hordeis, miliis, et zeis, cum excrementis bovis, et comederet illam; ac interea poneret vallum et aggerem contra Hierosolymam, et obsideret illam (Ezechiel 4:1-15).
Quod Hoscheae Prophetae bis mandatum sit,
Ut acciperet sibi meretricem in uxorem (Hoschea 1:2-9; 3:2-3):
Et plura similia. Praeterea quis absque sensu spirituali sciret quid significatur per omnia tabernaculi, ut per "arcam," "propitiatorium," "cherubos," "candelabrum," "altare suffitus," "panes facierum" super mensa, perque "vela" et "aulaea" ejus? Quis absque sensu spirituali sciret quid significatur per "vestes sanctitatis Aharonis," ejus "tunicam," "pallium," "ephodum," "urim et thummim," "cidarim," et plura ejus? Quis absque sensu spirituali sciret quid significatur per omnia illa quae mandata sunt de holocaustis, sacrificiis, minchis et libaminibus? tum de sabbathis et festis? Veritas est, quod non minimum de illis fuerit mandatum, quod non aliquid Domini, caeli et ecclesiae significaverit. Ex his paucis evidenter videri potest, quod sensus spiritualis sit in omnibus et singulis Verbi.
Footnotes:
