New Christian Bible Study

The Bible

 

Hoschea 10

Study

   

1 Vitis frondosa Israël, fructus adæquatus est ei : secundum multitudinem fructus sui multiplicavit altaria, juxta ubertatem terræ suæ exuberavit simulacris.

2 Divisum est cor eorum, nunc interibunt ; ipse confringet simulacra eorum, depopulabitur aras eorum.

3 Quia nunc dicent : Non est rex nobis, non enim timemus Dominum ; et rex quid faciet nobis ?

4 Loquimini verba visionis inutilis, et ferietis fœdus ; et germinabit quasi amaritudo judicium super sulcos agri.

5 Vaccas Bethaven coluerunt habitatores Samariæ ; quia luxit super eum populus ejus, et æditui ejus super eum exsultaverunt in gloria ejus, quia migravit ab eo.

6 Siquidem et ipse in Assur delatus est, munus regi ultori. Confusio Ephraim capiet, et confundetur Israël in voluntate sua.

7 Transire fecit Samaria regem suum quasi spumam super faciem aquæ.

8 Et disperdentur excelsa idoli, peccatum Israël ; lappa et tribulus ascendet super aras eorum : et dicent montibus : Operite nos, et collibus : Cadite super nos.

9 Ex diebus Gabaa peccavit Israël ; ibi steterunt. Non comprehendet eos in Gabaa prælium super filios iniquitatis.

10 Juxta desiderium meum corripiam eos : congregabuntur super eos populi, cum corripientur propter duas iniquitates suas.

11 Ephraim vitula docta diligere trituram, et ego transivi super pulchritudinem colli ejus : ascendam super Ephraim, arabit Judas ; confringet sibi sulcos Jacob.

12 Seminate vobis in justitia, et metite in ore misericordiæ. Innovate vobis novale ; tempus autem requirendi Dominum, cum venerit qui docebit vos justitiam.

13 Arastis impietatem, iniquitatem messuistis : comedistis frugem mendacii, quia confisus es in viis tuis, in multitudine fortium tuorum.

14 Consurget tumultus in populo tuo ; et omnes munitiones tuæ vastabuntur, sicut vastatus est Salmana a domo ejus qui judicavit Baal in die prælii, matre super filios allisa.

15 Sic fecit vobis Bethel, a facie malitiæ nequitiarum vestrarum.

   

From Swedenborg's Works

 

Arcana Coelestia #10187

Study this Passage

  
/ 10837  
  

10187. ‘Et facies [ei] limbum auri circumcirca’: quod significet terminationem ex bono ne adeantur et laedantur a malis, constat ex significatione ‘limbi’ quod sit terminatio ne adeantur et laedantur malis, de qua n. 9492, et ex significatione ‘auri’ quod sit bonum, de qua n. 9874, 1 9881. Quod limbus ex auro factus fuerit, erat quia repraesentabat clausuram ex bono, bonum enim non potest adiri a malis, nam mala non sustinent ullo modo sphaeram boni; cum 2 mala, hoc est, 3 illi qui in malis sunt, seu qui ab inferno, in illam sphaeram veniunt, quae sphaera est sphaera caeli, dire anguntur, et quantum in illam sphaeram intrant, tantum infernales cruciatus in se sentiunt, et fiunt inde sicut illi qui in agone mortis jacent, quapropter dejiciunt se actutum in infernum, et non audent amplius elevare caput; haec causa est quod qui in caelo sunt, 4 in tuto sint ab infestatione malorum quae ab inferno; hoc intelligitur per Abrahami verba ad divitem in inferno,

Inter nos et vos hiatus ingens firmatus est, ut qui volunt transcendere hinc ad vos, non possint, neque qui ibi ad nos transire, Luc. 16:26:

et per haec,

Dicent montibus et petris, Ruite super nos, et abscondite nos a facie sedentis super throno, et ab ira Agni, Apoc. 6:16; 10:8.

Quod autem 5 verum attinet, hoc adiri potest a malis, ex causa quia mali pervertunt vera per sinistras interpretationes, et sic applicant ad favorem suarum cupiditatum; sed quantum boni in veris adest, tantum non adiri 6 vera possunt. Inde constare potest quam tutelam possunt habere in altera vita qui solum in veris, quae vocantur fidei, sunt, et non simul in bono; per bonum 7 intelligitur 8 charitas erga proximum et amor in Dominum, nam omnia bona inde sunt. Ex his nunc 9 patet cur factus fuerit limbus auri circumcirca parietes altaris suffitus.

Footnotes:

1. The editors of the third Latin edition made a minor correction here. For details, see the end of the appropriate volume of that edition.

2. The Manuscript inserts enim.

3. The Manuscript inserts cum.

4. The Manuscript inserts quia in bono, .

5. The Manuscript inserts ad.

6. verum potest

7. significatur

8. The editors of the third Latin edition made a minor correction here. For details, see the end of the appropriate volume of that edition.

9. constare potest

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org