3268. ¹ Primogenitus Jishmaelis, Nebaioth, et Kedar, et Adbeel, et Mibsam, et Mishma, et Dumah, et Massa, Hadad, et Tema, Jetur, Naphish, et Kedemah: quod significent omnia quae sunt Ecclesiae spiritualis, cumprimis apud gentes, constat ex repraesentatione horam qui nominantur; quidam ² ex illis memorantur in Verbo imprimis prophetico, ut Nebaioth, Kedar, Dumah, et Tema, et ibi significant talia quae sunt Ecclesiae spiritualis cumprimis apud gentes; et praeterea patet ex eo quod duodecim sint, et per ‘duodecim’ significentur omnia quae sunt fidei, ita Ecclesiae, ³ de qua re in sequentibus; et ideo in versu sequente 16 dicitur quod fuerint ‘duodecim principes populorum suorum’.

[2] Quod per ‘Nebaioth et Kedar’ repraesententur illa quae sunt Ecclesiae spiritualis cumprimis apud gentes, nempe ejus bona ac inde vera, constat apud Esaiam,

Turma camelorum obteget te, dromades Midianis et Ephae, omnes a Sheba venient; aurum et tus portabunt, et laudes Jehovae annuntiabunt. Omnis grex Kedaris congregabuntur tibi; arietes Nebaioth ministrabunt tibi, ascendent ad beneplacitum altare Meum, 60:6, 7;

ibi in supremo sensu de Domino, in sensu ⁴ respectivo de regno Ipsius, ‘grex Kedaris’ pro bono spirituali; quod ‘grex’ sit spirituale bonum, videatur n. 343, 415, 2566; ‘arietes Nebaioth’ pro vero spirituali; quod ‘aries’ sit spirituale verum, n. 2833:

[3] quod Kedar sit Arabia, ex sequentibus locis patet, et quod Arabia ⁵ nominata sit Kedar a filio Jishmaelis, constare potest ex eo quod quae in binis illis versibus memorantur, sint terrae vel gentes, omnes a filiis ac nepotibus Abrahami nominatae, ut Midian, Ephah, Sheba, de quibus supra vers. 2, ita hic Kedar et Nebaioth: apud Ezechielem,

Arabia et omnes principes Kedaris, hi negotiatores manus tuae, in agnis, et arietibus, et hircis; in his negotiatores tui, 27:21;

ibi de Tyro, hoc est, de illis qui in cognitionibus boni et veri sunt; quod ‘Tyrus’ illi sint, videatur n. 1201; ‘Arabia’ pro spirituali bono, ‘principes Kedaris’ pro spiritualibus veris; ‘agni, arietes, ⁶ hirci’ sunt spiritualia bona et vera:

[4] apud Jeremiam,

Surgite, ascendite ad Kedarem, et devastate filios orientis, tentoria eorum, et greges eorum sument; cortinas eorum, et omnia vasa eorum, et camelos eorum auferent sibi,

49:28, 29; ⁷ ibi de vastatione Ecclesiae spiritualis per ‘Kedarem ⁸ et filios orientis’ intellectae; ‘tentoria et greges’ pro Ecclesiae illius bonis, ‘cortinae et vasa’ pro ejus veris; sunt ⁹ sancta cultus, quae per ‘tentoria et greges’ et per ‘cortinas et vasa’ significantur, sancta autem cultus omnia se referunt ad bonum et verum.

[5] Qui autem non in vero sunt quia non in bono, sunt qui repraesentantur per ¹⁰ Arabes et per Kedares in deserto ut apud Esaiam,

Babel non habitabitur in aeternum, non morabitur ibi Arabs, 13:20:

apud eundem,

Extollant desertum, et urbes ejus, villae quas habitat Kedar, 42:10, 12:

apud jeremiam, Super viis sedisti illis, sicut Arabs in deserto, 3:2:

apud Davidem,

Vae mihi, quia peregrinor Meshechi, moror cum tentoriis Kedaris, Ps. 120:5:

apud Esaiam,

In silva in Arabia pernoctabitis turmae Dedanim; obviam sitienti afferte aquas, habitatores terrae Tema, cum pane ejus praevenite vagabundum, quia coram gladiis vagabuntur, coram gladio extenso, coram arcu tenso, et coram gravitate belli; quia sic dixit Dominus ad me, In adhuc annum, juxta annum mercenarii, et consumetur omnis gloria Kedaris, et reliquum numeri arcus fortium filiorum Kedaris [paucum erit], 21:13, 14; ‘in silva Arabiae pernoctare’ pro vastari quoad verum, ‘turmae Dedanim’ pro illis qui sunt in cognitionibus, n. 3240, 3241 f; ‘habitatores terrae Tema’ pro illis qui in simplici bono, in quali gentes probae; ¹¹ qui quod ¹² ex filio Jishmaelis Tema dicto ¹³ fuerint, constat; ‘Kedar’ pro illis qui in simplici vero, de quibus dicitur quod ‘vagaturi coram gladiis, et coram gravitate belli’, quo significatur quod non sustinebunt pugnas tentationum, quia non amplius in bono:

[6] apud Jeremiam,

Transite insulas Kittaeorum et videte, et Kedarem mittite, et attendite valde, et videte num factum sicut hoc, num mutavit gens deos, et illi non dii, ¹⁴ 2:10, 11;

‘insulae Kittaeorum’ pro illis qui remotiores a cultu sunt, hoc est, pro gentibus quae in simplici bono et inde in naturale vero, n. 1156, 1158; quod etiam ‘Kedar’ sint illi, patet:

apud eundem,

Accepi calicem e manu Jehovae, et bibere feci omnes gentes, ad quas me misit Jehovah, ... et Dedanem et Temam, et Buz, et omnes abscissos anguli; et omnes reges Arabiae, et omnes reges occidentis, habitantes in deserto, 25:17, 23, 24; ibi etiam agitur de vastatione Ecclesiae spiritualis, ac inter plures nominantur Tema et Arabia, inde patet quod per ‘Temam’, sicut per ‘Arabiam’, significentur illi qui ab Ecclesia spirituali sunt; sed Arabiae tribuuntur reges ¹⁵ tum urbes, at Kedari principes et villae.

[7] Praeter illos etiam Dumah memoratur apud Esai. 21:11, 12. Quod per gentes illas significentur illa quae sunt Ecclesiae spiritualis, inde est quia Antiqua Ecclesia quae spiritualis erat, etiam apud illos fuit, n. 1238, 2385, sed doctrinalia illorum et ritualia varia fuerunt, at usque una Ecclesia, quia non fidem sed charitatem essentialem fecerunt; at temporis tractu, sicut charitas desiit, etiam illud Ecclesiae quod apud illos, nullum factum est, usque tamen mansit repraesentativum Ecclesiae per illos, cum varietate secundum illud Ecclesiae quod fuerat apud illos; inde est ubi nominantur in Verbo, quod non significentur illi, sed significetur modo illud Ecclesiae in communi quod fuerat ibi.

Footnotes: