3695. ‘Et posuit subcapitalia sua’: quod significet communicationem communissimam cum Divino, constat a significatione ‘subcapitalium’ seu cervicalium quod sit communicatio cum externis, ita communissima; ‘cervix’ enim seu collum quod sit communicatio interiorum cum exterioribus, seu quod idem, superiorum cum inferioribus, ac inde conjunctio, videatur n. 3542, 3603, inde quae sub cervice seu collo, hoc est, cervicalia, significant hic communicationem intimorum seu Divinorum cum extimis, quae communicatio etiam est communissima; externum enim est commune respective ad internum, et extimum est communissimum, singularia enim interiorum apparent ut unum, ita ut commune in exterioribus; haec quoque sunt quae repraesentantur et significantur per ‘scalam statutam terrae, cujus caput pertingeret caelum, et angeli Dei ascenderent et descenderent in illa’, de qua sequitur.