9401. ‘Quod pepigit Jehovah [cum vobis] super omnia verba haec’: quod significet quod conjunctio a Domino per omnia et singula Verbi, constat ex significatione ‘foederis quod pepigit Jehovah’ quod sit conjunctio a Domino, 1 nam ‘pangere foedus’ est sibi conjungere, n. 9396, et ‘Jehovah’ in Verbo est Dominus, n. 9373, et ex significatione ‘omnium verborum horum’ quod sint omnia et singula Verbi, nam per leges promulgatas e monte Sinai in sensu universali significatur omne Divinum Verum, ita Verbum quoad omnia et singula, n. 6752; quod Verbum sit inspiratum quoad omnem iotam, videatur n. 7933, 2 9094 fin. , 9198 fin. , 9349, consequenter quod per Verbum sit conjunctio cum caelo, et per caelum 3 Domino, per omnia et singula ejus.
[2] Dicitur conjunctio a Domino, quoniam Dominus Sibi conjungit hominem, non autem vicissim, nam omne bonum amoris et verum fidei influit a Domino, et recipitur ab homine quantum is desistit a malis, n. 9399; influxus enim reciprocus, nempe ab homine ad Dominum, qui ab eruditis vocatur influxus physicus, non datur, n. 6322, 9110, 9111, 9216; et praeterea quicquid ab homine exit ut ab ipso, non est nisi quam malum et inde falsum, n. 210, 215, 987, 5660, 5786; inde constat quod conjunctio hominis cum Domino sit a Domino et non ab homine; quod secus appareat, est fallacia.
Footnotes:
1. foedus enim pangere
2. The editors of the third Latin edition made a minor correction here. For details, see the end of the appropriate volume of that edition.
3. The Manuscript inserts cum.
