3390. ‘Factum quia prolongabantur ei ibi dies’: quod significet statum receptionis, constat ex significatione ‘prolongare ibi ei’, nempe Jishako, quod sit cum Divinum Bonum quod per Jishakum repraesentatur, aliquamdiu ibi esset, quod reciperetur verum, de receptione enim veri a spiritualibus in sensu interno agitur; et a significatione ‘dierum’ quod sint status, de qua n. 23, 487, 488, 493, 893, 2788.