3072. ‘Illam destinasti servo tuo Jishako’: quod significet conjunctionem veri Divini cum Divino Bono in Rationali, constat a significatione ‘destinare’, nempe in mulierem, quod sit conjungere per foedus conjugii; et a repraesentatione Jishaki, quod sit Bonum Divinum Rationalis, de qua supra n. 3024; ‘illa’ seu Rebecca, quod repraesentet verum Divinum quod conjungendum Divino Bono Rationalis, supra passim dictum, et ex singulis in sensu interno in hoc capite patet.