1020. Quod haec significentur, constare potest ex eo quod omnia quae a primo capite Geneseos usque ad Eberum cap. xi historice concinnata sunt, significent alia quam qualia in littera exstant, et quod historica ibi non sint nisi facta historica secundum morem antiquissimorum; qui cum veritatem rei testatam facerent, dicebant quod ‘Jehovah dixit’, hic autem quod ‘Deus’ quia de Ecclesia spirituali agitur: similiter cum aliquid verum fieret, aut verum factum sit.